BTV NEWS

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

សន្តិសុខ និង សង្គម

មនុស្សយ៉ាងតិច ៦ នាក់ស្លាប់ និងរាប់សិបនាក់បាត់ខ្លួនក្នុងបំណាក់ដីនៅប្រទេសអេក្វាឌ័រ

យោងតាមព័ត៌មានបឋមពីអាជ្ញាធរអេក្វាឌ័រកាលពីថ្ងៃអាទិត្យ (១៦ មិថុនា) បានឱ្យដឹងថា បំណាក់ដីនៅប្រទេសអេក្វាឌ័រ បានសម្លាប់មនុស្សយ៉ាងហោចណាស់ ៦ នាក់ និង ៣០ នាក់ទៀតបាត់ខ្លួន។ លេខាធិការដ្ឋានគ្រប់គ្រងហានិភ័យអេក្វាឌ័រ បាននិយាយនៅក្នុងរបាយការណ៍មួយថា បំណាក់ដី «ទ្រង់ទ្រាយធំ» បានកើតឡើងនៅកណ្តាលប្រទេសក្នុងទីក្រុង បានញូស ដឺអាក្វ័រ សាន់តា (Banos de Agua Santa)។ព្យុះភ្លៀងដ៏ខ្លាំងដែលបង្កឡើងដោយសម្ពាធទាបបានបោកបក់ពាសពេញផ្នែកខ្លះនៃភាគកណ្តាល និងភាគខាងត្បូងនៃទ្វីបអាមេរិកកាលពីថ្ងៃអាទិត្យ ដោយប្រទេសផ្សេងៗបានព្រមានអំពីការកើនឡើងហានិភ័យនៃបំណាក់ដី ការបាក់ធ្លាក់ថ្ម និងទឹកជំនន់។នៅក្នុងប្រទេសអែលសាល់វ៉ាឌ័រ ទីភ្នាក់ងារការពារជនស៊ីវិលរបស់ប្រទេសនេះបានប្រកាសអាសន្នកម្រិតពណ៌ក្រហម ដោយសារតែភ្លៀងធ្លាក់ខ្លាំងនៅទូទាំងប្រទេសដ៏តូចមួយនេះ ខណៈដែលក្រុមហ៊ុនអាកាសចរណ៍នៅប្រទេសជិតខាងហ្កាតេម៉ាឡា ជាច្រើនបានបង្វែរជើងហោះហើរ នេះបើយោងតាមក្រសួងទំនាក់ទំនង ហេដ្ឋារចនាសម្ព័ន្ធ និងលំនៅដ្ឋានរបស់ហ្កាតេម៉ាឡា៕

កម្លាំងជំនាញមន្ទីរប្រឆាំងគ្រឿងញៀន បង្ក្រាបករណីជួញដូរគ្រឿងញៀន ឃាត់ខ្លួនជនល្មើសម្នាក់ រឹបអូសថ្នាំញៀនជាង ៥គីឡូក្រាម

ភ្នំពេញ៖ អនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និង ឯកឧត្តម ឧត្តមសេនីយ៍ឯក ប៊ុន ប៉ាម៉ារីលុច អគ្គស្នងការរងទទួលដឹកនាំ មន្ទីរប្រឆាំងបទល្មើសគ្រឿងញៀន និងឯកឧត្តម ឧត្តមសេនីយ៍ឯក ព្រុំ សន្ធរ អគ្គស្នងការរងទទួលសហការដឹកនាំមន្ទីរប្រឆាំងគ្រឿនញៀន និងដឹកនាំបញ្ជាផ្ទាល់ពី ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀននៅថ្ងៃទី១៤ ខែមិថុនា ឆ្នាំ២០២៤ វេលាម៉ោង០២៖០៧នាទី កម្លាំងជំនាញនៃមន្ទីរប្រឆាំងគ្រឿងញៀន(ក៥) ដឹកនាំដោយលោក វរសេនីយ៍ឯក ឈូក គា នាយករងមន្ទីរ សហការជាមួយកម្លាំងស្នងការដ្ឋាននគរបាលរាជធានីភ្នំពេញ ដោយមានការដឹកនាំ និងសម្របសម្រួលដោយលោក គឹម ហុងសាន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចុះស្រាវជ្រាវស៊ើបអង្កេតរហូតឈានទៅបង្ក្រាបករណីជួញដូរ-រក្សារទុក ដោយខុសច្បាប់នូវសារធាតុញៀន ស្ថិតនៅចំណុច តាមផ្លូវព្រះមុនីវង្ស (ជិតវិទ្យាស្ថានជាតិប៉ាស័រកម្ពុជា) សង្កាត់ស្រះចក ខណ្ឌដូនពេញ រាជធានីភ្នំពេញ។ប្រតិបត្តិការនេះ កម្លាំងជំនាញចាប់ខ្លួនជនល្មើស១នាក់ ឈ្មោះ ចាំង យ៉ាំងតង (TRANG VANG TOAN)ភេទប្រុស អាយុ៣៣ឆ្នាំ ជនជាតិវៀតណាម និងចាប់យកវត្ថុតាងរួមមានគ្រឿងញៀនប្រភេទអុិចស្តាស៊ី (MDMA) ទម្ងន់ ៥៤២៧.៣២៦ ក្រាម (៥គីឡូ ៤២៧.០៧ក្រាម)។បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕

នគរបាលប្រឆាំងការជួញដូរមនុស្ស និងការពារអនីតិជន ចុះឡោមព័ទ្ធ ពាក់ព័ន្ធទីតាំងក្លឹប យីហោ ប៉ាវ លី ជី និងឃាត់ខ្លួនមនុស្សជិត ២០០នាក់

ភ្នំពេញ៖ កម្លាំងនគរបាល ជំនាញពាក់ព័ន្ធ សហការជាមួយអាជ្ញាធរមូលដ្ឋានខណ្ឌទួលគោក បានចុះឡោមព័ទ្ធ ពាក់ព័ន្ធទីតាំងក្លឹប យីហោ ប៉ាវ លី ជី និងឃាត់ខ្លួនមនុស្សប្រុសស្រីចំនួន១៩៤នាក់ជាក់ស្ដែងនៅវេលាម៉ោង១២យប់រំលងអាធ្រាតកម្លាំងនគរបាលនៃ នាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ និងកម្លាំងតម្រួតបទបញ្ជា សហការជាកម្លាំងនគរបាល ប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលរាជធានីភ្នំពេញ ធ្វើការចុះឡោមព័ន្ធទីតាំងក្លឹបមួយកន្លែងយីហោ ប៉ាវ លីជីង ដែលស្ថិតនៅតាមបណ្ដោយផ្លូវលេខ៥៩៨ សង្កាយ់បឹងកក់ទី២ ខណ្ឌទួលគោក រាជធានីភ្នំពេញ។ក្នុងរង្វង់ប្រតិបត្តិការនេះកម្លាំងនគរបាលជំនាញបានឲ្យដឹងថា កម្លាំងនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ ទទួលបានសេចក្ដីរាយការ និងធ្វើការស៉ើបអង្កេត ច្បាស់លាស់ថាទីតាំងក្លឹប យីហោ ប៉ាវលីជីង នេះពិតជាលួចលាក់បម្រើសេវាផ្លូវភេទ ពិតប្រាកដ។ ដូច្នេះ ដោយសុំគោលការណ៍ដាក់កម្លាំងឡោមព័ន្ធ ចុះបង្ក្រាបជាក់ស្ដែងតែម្ដង។ ដោយបានធ្វើការឃាត់ខ្លួនមនុស្សប្រុសស្រី ចំនួន១៩៤នាក់ និងដកហូតវត្ថុតាងមួយចំនួនទៀតផងដែរ។ក្រោយប្រតិបត្តិការមនុស្សប្រុសស្រីទាំង១៩៤នាក់ ត្រូវបាននគរបាល បញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីចាត់ការតាមនីតិវិធី៕ អត្ថបទ៖ កុម្ភៈ

អាវុធហត្ថរាជធានីបញ្ជូនជនសង្ស័យ០៦នាក់ ទៅតុលាការ ពាក់ព័ន្ធករណីគ្រឿងញៀន

ភ្នំពេញ ៖ កម្លាំងជំនាញការិយាល័យប្រឆាំងបទល្មើសគ្រឿងញៀន កងរាជអាវុធហត្ថរាជធានីភ្នំពេញ បញ្ជូនសង្ស័យប្រុសស្រី ០៦នាក់ ទៅតុលាការ ពាក់ព័ន្ធករណី ជួញដូរ និងប្រើប្រាស់នូវសារធាតុញៀនដោយខុសច្បាប់ ក្រោយពីបង្ក្រាបបាន ០២ករណីផ្សេងគ្នា។ករណីទី១៖ កម្លាំងជំនាញការិយាល័យប្រឆាំងបទល្មើសគ្រឿងញៀន នៃ កងរាជអាវុធហត្ថរាជធានីភ្នំពេញ បានចុះបង្រ្កាប និងឃាត់ខ្លួន ជនសង្ស័យចំនួន ០២នាក់ ពាក់ព័ន្ធករណី ជួញដូរ រក្សាទុក និងប្រើប្រាស់នូវសារធាតុញៀនដោយខុសច្បាប់កាលពីថ្ងៃទី១០ និង ទី១១ ខែមិថុនា ឆ្នាំ២០២៤ នៅចំណុចមុខបន្ទប់ជួលគ្មានលេខ ផ្លូវបេតុង ភូមិជម្ពូរវ័ន្ត សង្កាត់ចោមចៅទី៣ ខណ្ឌពោធិ៍សែនជ័យ និងបន្តឆែកឆេរបន្ទប់ជួល នៅភូមិកន្ទោកជើង សង្កាត់កន្ទោក ខណ្ឌកំបូល ចាប់យកវត្ថុតាង ក្រាមសថ្លា សរុប ចំនួន ១៥កញ្ចប់តូចធំ, ជញ្ជីងថ្លឹង ០១គ្រឿង, សម្ភារៈសម្រាប់ប្រើប្រាស់គ្រឿងញៀន និងសម្ភារៈពាក់ព័ន្ធមួយចំនួនទៀត ។ ជនសង្ស័យទាំង ០២នាក់ ១-ឈ្មោះ ប៉ាក ស្រីម៉ៅ ហៅយួន ភេទស្រី អាយុ៣៤ឆ្នាំ, ២-ឈ្មោះ ថន សំណាង ហៅណាង ភេទប្រុស អាយុ២៤ឆ្នាំ។ ជនសង្ស័យទាំង០២នាក់ក៏ជាមុខសញ្ញាប្រើប្រាស់គ្រឿងញៀនផងដែរ។ករណីទី២៖ កម្លាំងកងរាជអាវុធហត្ថរាជធានីភ្នំពេញ ខណ្ឌដង្កោបង្រ្កាប និងឃាត់ខ្លួន ជនសង្ស័យប្រុសស្រី ០៤នាក់ ពាក់ព័ន្ធករណី ជួញដូរ និងប្រើប្រាស់នូវសារធាតុញៀនដោយខុសច្បាប់ កាលពីថ្ងៃទី១២ ខែមិថុនា ឆ្នាំ២០២៤ នៅចំណុច ផ្ទះគ្មានលេខ ផ្លូវលំ ភូមិជើងឯក សង្កាត់ជើងឯក ខណ្ឌដង្កោ ។ វត្ថុតាងចាប់យក ក្រាមសថ្លាចំនួន ០៩កញ្ចប់, ជញ្ជីងថ្លឹង ០១គ្រឿង, សម្ភារៈសម្រាប់ប្រើប្រាស់គ្រឿងញៀន, ដាវ កាំបិត ពូថៅ ចំនួន ០៤ដើម រួមនិងសម្ភារៈពាក់ព័ន្ធមួយចំនួនទៀត។ ជនសង្ស័យទាំង ០៤នាក់ ១-ឈ្មោះ សាន ស្រីណែត ហៅណែត ភេទស្រី អាយុ២៥ឆ្នាំ, ២-ឈ្មោះ ធួក ប៊ុននាង ហៅនាង ភេទប្រុស អាយុ៤២ឆ្នាំ, ៣-ឈ្មោះ ង្វៀង សៀវម៉ី ហៅម៉ី ភេទស្រី អាយុ២៤ឆ្នាំ, ៤-ឈ្មោះ ហន គន្ធា ហៅធា ភេទស្រី អាយុ ៣២ឆ្នាំ ។ ជនសង្ស័យទាំង០៤នាក់ក៏ជាមុខសញ្ញាប្រើប្រាស់គ្រឿងញៀនផងដែរ។ ចំពោះជនសង្ស័យប្រុសស្រីទាំង ០៦នាក់ និងវត្ថុតាងទាំងអស់ ត្រូវបានកម្លាំងជំនាញការិយាល័យប្រឆាំងបទល្មើសគ្រឿងញៀន នៃ កងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីធ្វើការផ្តន្ទាទោសតាមច្បាប់៕ ដោយ ៖ តារាវុទ្ធី

ស្លាប់៧នាក់ និងរបួសធ្ងន់ម្នាក់ ក្នុងហេតុការណ៍គ្រោះថ្នាក់ចរាចរណ៍នៅស្រុកត្បូងឃ្មុំ

ត្បូងឃ្មុំ៖ រថយន្ត២គ្រឿងបុកគ្នាពេញទំហឹងលើកំណាត់ផ្លូវជាតិលេខ៧១C បណ្តាលឱ្យមនុស្ស ៧នាក់បានស្លាប់ និងម្នាក់នាក់រងរបួសធ្ងន់ ក្នុងហេតុការណ៍ កើតឡើងនៅថ្ងៃទី១៤ ខែមិថុនា ឆ្នាំ២០២៤ វេលាម៉ោង០៤ និង៣០នាទីទាបភ្លឺ ស្ថិតនៅភូមិព្រះអង្គ ឃុំរកាពប្រាំ ស្រុកត្បូងឃ្មុំ ខេត្តត្បូងឃ្មុំ ។ប្រភពពីសមត្ថកិច្ច បានឲ្យដឹងថា ហេតុការណ៍នេះ បង្កដោយរថយន្តម៉ាក ហ៊ីយ៉ិនដាយ ពណ៌ស ពាក់ផ្លាកលេខ កំពង់ធំ 3A-3053 បើកបរដោយឈ្មោះ ឈាង ហ៊ាង ភេទប្រុស អាយុ១៨ឆ្នាំ ជនជាតិខ្មែរ រស់នៅភូមិសំរោង ឃុំទំរីង ស្រុកសណ្តាន់ ខេត្តកំពង់ធំ បុកជាមួយ រថយន្តម៉ាកហ៊ីយ៉ិនដាយ ពណ៌ទឹកប្រាក់ ពាក់ផ្លាក់លេខ ត្បូងឃ្មុំ 3A-4487 មិនស្គាល់ឈ្មោះ ។ ប្រភពដដែលឲ្យដឹងទៀតថា រថយន្តទាំង២ បើកបរមានទិសដៅ បញ្រ្ចាសទិសគ្នា រថយន្តពាក់ផ្លាកលេខ កំពង់ធំ 3A-3053 បើកបរមកពីជើងទៅត្បូងប្រើប្រាស់ល្បឿន ទៅបុករថយន្ត ពាក់ស្លាកលេខ ត្បូងឃ្មុំ 3A-4487 បើកបរមកពីត្បូងទៅជើង បណ្តាលអោយរថយន្តទាំង០២គ្រឿង ខូចខាតធ្ងន់ធ្ងរ និងមានមនុស្សស្លាប់ចំនួន០៥នាក់ភ្លាមៗនៅកន្លែងកើតហេតុ និងរងរបួសធ្ងន់ចំនួន០៣នាក់ លុះបញ្ជូនទៅមន្ទីពេទ្យមិត្តភាពកម្ពុជា.ចិន បានស្លាប់នៅមន្ទីពេទ្យចំនួន២នាក់បន្ថែមទៀត សរុបស្លាប់៧នាក់ របួសធ្ងន់១នាក់។ បន្ទាប់ពីកើតហេតុសមត្ថកិច្ចមូលដ្ឋានជំនាញចរាចរណ៍ ចុះមកដល់វាស់វែង និងធ្វើកំណត់ហេតុយករថយន្តទាំងពីរគ្រឿង ទៅរក្សាទុករង់ចាំឲ្យភាគីសងខាងដោះស្រាយគ្នាតាមច្បាប់ ៕

មនុស្សស្លាប់៦នាក់ និងភ្ញៀវទេសចរ១.៥០០នាក់ជាប់ខ្លួន ខណៈមានបំណាក់ដីនិងទឹកជំនន់នៅតំបន់ទេសចរណ៍ ស៊ីកគីម របស់ឥណ្ឌា

មន្ត្រីបាននិយាយកាលពីថ្ងៃព្រហស្បតិ៍សប្ដាហ៍នេះ ថា មនុស្សយ៉ាងហោចណាស់៦ នាក់ បានស្លាប់ ៥នាក់កំពុងបាត់ខ្លួន និងភ្ញៀវទេសចរ១.៥០០នាក់ បានជាប់ខ្លួន ខណៈបំណាក់ដីដ៏ធំបង្កឡើងដោយភ្លៀងធ្លាក់ឥតឈប់ បានបបង្កការបំផ្លិចបំផ្លាញនៅក្នុងស្រុក ម៉ាន់ហ្គាន (Mangan)ភាគខាងជើង ទីក្រុង ស៊ីកគីម (Sikkim)ប្រទេសឥណ្ឌា ។ មន្ត្រីក្នុងតំបន់បាននិយាយថា បំណាក់ដីបានបិទផ្លូវ ហើយផ្ទះសម្បែងពលរដ្ឋជាច្រើនខ្នងត្រូវបានទឹកជន់លិច ឬខូចខាត ខណៈបង្គោលភ្លើង ត្រូវបានទឹកហូរកួច។ ស្ថានភាពកាន់តែគ្រោះថ្នាក់ ស្របពេលទឹកក្នុងទន្លេ ទីស្តា (Teesta) ដែលហក់ឡើងខ្លាំងបានជន់លិចកីឡដ្ឋាន ម៉េលី (Melli) នៅភាគខាងត្បូង ទីក្រុង ស៊ីកគីម ទន្ទឹមនឹងមនុស្សមួយចំនួនបាត់បង់លំនៅឋាន។ ភាគខាងជើងទីក្រុងនេះ ត្រូវបានឯកោទាំងស្រុង ដោយសារតែបំណាក់ដីនៅលើផ្លូវហាយវ៉េលេខ ១០ ដែលជាផ្លូវដ៏សំខាន់តភ្ជាប់តំបន់នេះ ទៅកាន់ទីក្រុង កាលីមប៉ុង ( Kalimpong) ក្នុងរដ្ឋ វ៉េស ប៊ែងហ្គាល់(West Bengal)របស់ប្រទេសឥណ្ឌា ។ ទឹកជំនន់ និងបំណាក់នេះ កើតឡើង ខណៈផ្នែកមួយចំនួនរបស់ប្រទេសឥណ្ឌា នៅតែរងគ្រោះពីរលកកម្ដៅរហូតដល់មានមនុស្សជាច្រើនបានស្លាប់ ហើយប្រជាពលរដ្ឋនៅក្នុងរដ្ឋធានីដេលី របស់ប្រទេសឥណ្ឌា កំពុងខ្វះខាតទឹកប្រើប្រាស់ និងប្រឈមរលកកម្ដៅខ្ពស់៕

ការសិក្សា៖ សង្រ្គាមរុស្ស៊ី-អ៊ុយក្រែន បង្កឱ្យមានការបំភាយឧស្ម័នរាប់លានតោនទៅបរិយាកាស

របាយការណ៍រួមមួយបាននិយាយនៅថ្ងៃព្រហស្បតិ៍ (១៣ មិថុនា) នេះថា សង្រ្គាមរបស់រុស្ស៊ី លើអ៊ុយក្រែន បានបង្កដោយផ្ទាល់ ឬបើកផ្លូវដល់ការបញ្ចេញឧស្ម័នកាបូនឌីអុកស៊ីត (CO2) ចំនួន ១៧៥ លានតោនទៅក្នុងបរិយាកាស។របាយការណ៍ដែលចេញផ្សាយដោយក្រសួងបរិស្ថាន និងអង្គការក្រៅរដ្ឋាភិបាលអាកាសធាតុ របស់ប្រទេសអ៊ុយក្រែន បាននិយាយថា ការប៉ាន់ប្រមាណរបស់ពួកគេរួមមានទាំងការបំភាយឧស្ម័នដែលត្រូវបានបញ្ចេញ និងដែលនឹងត្រូវបានផលិតក្នុងអំឡុងពេលការងារជួសជុលបន្ទាប់ពីការបំផ្លិចបំផ្លាញដែលបណ្តាលមកពីការវាយលុកទ្រង់ទ្រាយធំកាលពីខែកុម្ភៈ ឆ្នាំ២០២២ ហើយសកម្មភាពបំភាយឧស្ម័នសំខាន់ៗមួយចំនួន គឺបណ្តាលមកពីការប្រយុទ្ធគ្នា។របាយការណ៍នោះបាននិយាយថា «ប្រេងឥន្ធនៈរាប់លានលីត្រដែលប្រើប្រាស់ដោយរថយន្តយោធា ហើយវាលស្រែ និងព្រៃឈើជិតមួយលានហិកតាបានឆាបឆេះ រចនាសម្ព័ន្ធប្រេង និងឧស្ម័នរាប់រយកន្លែងត្រូវបានបំផ្ទុះ។ ការប៉ាន់ប្រមាណ ១៧៥ លានតោននេះគឺស្មើនឹងការបំភាយប្រចាំឆ្នាំដែលផលិតដោយរថយន្ត ៩០ លានគ្រឿង ឬប្រហែលតួលេខបំភាយសរុបនៃប្រទេសហូឡង់ក្នុងមួយឆ្នាំ»។សង្រ្គាមដែលចាប់ផ្តើមដោយទីក្រុងមូស្គូ បានសម្លាប់មនុស្សរាប់ម៉ឺននាក់ និងរាប់លាននាក់ទៀតភៀសខ្លួន ហើយក៏បានបង្កការខូចខាតបរិស្ថានយ៉ាងធំធេងផងដែរ នៅពេលដែលកងទ័ពភាគីទាំងពីរចូលរួមនៅក្នុងសង្គ្រាមដីគោកអឺរ៉ុបដ៏ធំបំផុតក្នុងរយៈពេល ៨០ ឆ្នាំមួយនេះ៕

មន្ត្រីនគរបាលចរាចរណ៍ ២រូបត្រូវបានកោះហៅមកសួរនាំពាក់ព័ន្ធឃាត់ម៉ូតូ ១គ្រឿង គ្មានបទល្មើស

ស្នងការនគរបាលរាជធានីភ្នំពេញ កោះហៅមន្ត្រីនគរបាលចរាចរណ៍ ២រូប ដែលឈរជើងនៅចំណុចគោលដៅ ស្តុបផ្លូវជាតិលេខ៤ កែងមហាវិថី ឈ្នះឈ្នះ ទឹកដីខណ្ឌពោធិ៍សែនជ័យ ពាក់ព័ន្ធករណីឃាត់ម៉ូតូ ១គ្រឿង ដោយគ្មានបទល្មើស ។ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សូមបញ្ជាក់ជូនសាធារណជនមេត្តាជ្រាបថា ក្រោយពី ទទួលបានព័ត៌មានដែលបង្ហោះលើបណ្តាញសង្គមនៅថ្ងៃទី១២ ខែមិថុនា ឆ្នាំ២០២៤ ពាក់ព័ន្ធមន្ត្រីនគរបាលចរាចរណ៍ដែលឈរជើងនៅគោលដៅខាងលើ កាក់ហៅម៉ូតូប្រជាពលរដ្ឋ ១គ្រឿងកំពុងបើកបរគ្មានបទល្មើស ដែលនាំឲ្យរងការរិះគន់ពីប្រជាពលរដ្ឋអ្នកលេងបណ្តាញសង្គម ។ក្រោយពីព័ត៌មាននេះឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកស្នងការរងទទួលការងារចរាចរណ៍ និងលោកនាយការិយាល័យនគរបាលចរាចរណ៍ផ្លូវគោកកោះហៅមន្រ្តី ២រូប ដែលកាក់ហៅម៉ូតូប្រជាពលរដ្ឋឲ្យចូលមកបំភ្លឺនៅការិយាល័យនគរបាលចរាចរណ៍ផ្លូវគោក ដើម្បីសុំគោលការណ៍ពី អគ្គស្នងការរង និងជាស្នងការនគរបាលរាជធានីភ្នំពេញ ពិនិត្យសម្រេច ៕ តារាវុទ្ធី

ក្រុមបាតុករប្រទេសអេក្វាឌ័រនិយាយថា គោលនយោបាយរដ្ឋាភិបាល ថ្កោលទោសពួកគេចំពោះទុក្ខលំបាក

អង្គការ និងសហជីពឆ្វេងនិយម នៅក្នុងប្រទេសអេក្វាឌ័រ បានធ្វើការតវ៉ាក្នុងទីក្រុងគីតូ កាលពីថ្ងៃពុធ ប្រឆាំងគោលនយោបាយរបស់ប្រធានាធិបតី លោក ដេនញែល ណូបាវ(Daniel Noboa) ដោយចោទប្រកាន់រដ្ឋបាលរបស់លោកថា បានបង្កើនថ្លៃប្រើប្រាស់សម្រាប់ជីវភាពរស់នៅ និងជំរុញគ្រួសារជាច្រើនឱ្យធ្លាក់ចូលក្នុងភាពក្រីក្រ។ក្រុមបាតុករ បានដុតផ្ទាំងរូបថតក្រដាស របស់ប្រធានាធិបតី លោក Noboa ដោយបង្ហាញពីការព្រួយបារម្ភ អំពីការដកការឧបត្ថម្ភធនប្រេងដ៏មានសក្តានុពល ដោយរដ្ឋាភិបាល។បាតុកម្ម បានចូលទៅដល់ពាសពេញទីក្រុង ហើយបានបញ្ចប់នៅអគារធនាគារកណ្តាល ដោយពុំមានរបាយការណ៍អំពីជម្លោះ ការចាប់ខ្លួន ឬរងរបួសឡើយ។យុទ្ធសាស្ត្រសេដ្ឋកិច្ចរបស់ លោក Noboa រួមមានទាំងការកើនឡើងដ៏ចម្រូងចម្រាស នៃពន្ធលើតម្លៃបន្ថែមពី ១៣ភាគរយ ទៅ១៥ភាគរយ ដើម្បីផ្តល់មូលនិធិដល់យុទ្ធនាការសន្តិសុខ ធ្វើឲ្យមានការមិនពេញចិត្តពីក្រុមប្រឆាំង។

ការតវ៉ា ផ្ទុះឡើងនៅប្រទេសអាមេនី ប្រឆាំងកិច្ចព្រមព្រៀងសន្តិភាពរបស់នាយករដ្ឋមន្ត្រី ជាមួយអាស៊ែរបៃហ្សង់

នាយករដ្ឋប្រទេសមន្ត្រីអាមេនី លោក នីកូល ប៉ាស៊ីនីយ៉ាន(Nikol Pashinyan) បាននិយាយកាលពីថ្ងៃពុធថា សន្ធិសញ្ញាសន្តិភាពជាមួយប្រទេសអាស៊ែរបៃហ្សង់ ជិតមកដល់ទីបញ្ចប់ហើយ ប៉ុន្តែប្រទេសរបស់លោកនឹងមិនទទួលយកការទាមទាររបស់ទីក្រុង Baku ដែលចង់ឲ្យកែប្រែរដ្ឋធម្មនុញ្ញរបស់ខ្លួន ។ការអត្ថាធិប្បាយរបស់ លោក Pashinyan មុនពេលការផ្ទុះឡើងនៃការប៉ះទង្គិចគ្នារវាងនគរបាល និងក្រុមបាតុករ ក្នុងការតវ៉ាជាបន្តបន្ទាប់ ដែលបានបរិហារគោលនយោបាយរបស់លោក រួមទាំងការប្រគល់ភូមិមួយចំនួនដែលត្រូវបានបំផ្លាញ ទៅឱ្យប្រទេសអាស៊ែរបៃហ្សង់វិញ និងបានទាមទារឱ្យលោកលាលែងពីតំណែង។រូបភាពវីដេអូពីទីក្រុង Yerevan បង្ហាញពីនគរបាល បានបាញ់គ្រាប់បែកផ្សែង ទៅលើក្រុមអ្នកតវ៉ាដែលប្រមូលផ្តុំនៅជុំវិញសភា។ ក្រោយមក ក្រុមអ្នកតវ៉ា បានបន្តដំណើរទៅកាន់អគាររដ្ឋាភិបាល។មន្ត្រីនគរបាល ដែលត្រូវបានដកស្រង់ដោយទីភ្នាក់ងារសារព័ត៌មានរុស្ស៊ី បាននិយាយថា មន្ត្រី ១៧ នាក់ បានរងរបួស ខណៈក្រសួងមហាផ្ទៃបាននិយាយថា ជនស៊ីវិល៧៩នាក់ បានរងរបួស និង៩៨នាក់ត្រូវបានឃុំខ្លួន។

បណ្ដាញសង្គម

ព័ត៌មានថ្មីៗ

ព្រះសង្ឃ និងពុទ្ធបរិសទ្ធនៅសៀមរាប រួមគ្នាយកអំណោយចែកជូនវីរកងទ័ពនៅព្រំដែនកម្ពុជា-ថៃ

សម្ដេច ម៉ែន សំអន អញ្ជើញចូលថ្វាយបង្គំ ថ្វាយភួងផ្កា ថ្វាយរបាំ ដល់ព្រះប្រតិមាទើបប្រទះឃើញ នៅសារមន្ទីរខេត្តកំពង់ធំ

សម្តេច ម៉ែន សំអន អញ្ជើញបួងសួងសុំសេចក្តីសុខ សេចក្តីចម្រើនជូនជាតិ និងប្រជាពលរដ្ឋ នៅប្រាសាទសំបូរព្រៃគុក

លោក Trump នឹងជួបលោកZelensky នៅអាមេរិក បន្ទាប់ពីកិច្ចពិភាក្សាដោយជោគជ័យ ជាមួយលោក Putin

ចំនួនអ្នកស្លាប់កើនឡើង ខណៈចំហេះព្រៃនៅតែបន្តឆាបឆេះពាសពេញអឺរ៉ុបភាគខាងត្បូង

ទឹកជំនន់នៅភាគខាងជើងប្រទេសចិន សម្លាប់មនុស្ស៨នាក់ និងបាត់ខ្លួន៤នាក់

បណ្ដាប្រទេសអារ៉ាប់ និងឥស្លាម ថ្កោលទោសការលើកឡើងរបស់លោក Netanyahu ដែលចង់ពង្រីកអ៊ីស្រាអែលកាន់តែអស្ចារ្យ

BREAKING NEWS! រញ្ជួយដីដ៏ខ្លាំងក្លាវាយប្រហារឥណ្ឌូនេស៊ី បានបណ្តាលឲ្យមនុស្សរាប់សិបនាក់រងរបួស និងពីរនាក់របួសធ្ងន់

ពលរដ្ឋខ្មែរនិងព្រះសង្ឃ ជាង ១០០០អង្គ/នាក់ ជួបជុំគ្នាបាតុកម្ម សុំឱ្យសហគមន៍អន្តរជាតិ អន្តរាគមន៍ឱ្យប្រទេសថៃ គោរពបទឈប់បាញ់ និងដោះលែងកងទ័ពកម្ពុជាដោយឥតលក្ខខណ្ឌ

មន្ត្រីសង្ឃខេត្តសៀមរាប នាំយកជំនួយសប្បុរសជននៅអាមេរិក ជូនកងទ័ពជួរមុខ ក្នុងខេត្តឧត្តរមានជ័យ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877