BTV NEWS

ចាប់ខ្លួនជនសង្ស័យ៥នាក់ពាក់ពន្ធ័ករណីចាប់ ឃុំឃាំង និងបង្ខាំងមនុស្សដោយខុសច្បាប់

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

សន្តិសុខ និង សង្គម

[UPDATE] អគ្គិភ័យឆេះ អគារនៅប្រទេសគូវ៉ែត បណ្ដាលឱ្យកម្មករបរទេសជិត ៥០ នាក់ស្លាប់

យ៉ាងហោចណាស់មនុស្ស ៤៩ នាក់ បានស្លាប់នៅក្នុងប្រទេសគូវ៉ែត កាលពីថ្ងៃពុធ (១២ មិថុនា) បន្ទាប់ពីអគ្គិភ័យបានឆាបឆេះអគារស្នាក់នៅរបស់កម្មករបរទេស ដោយឧបនាយករដ្ឋមន្ត្រីគូវ៉ែត បានចោទប្រកាន់ម្ចាស់អចលនទ្រព្យថាបានប្រព្រឹត្តការរំលោភបំពានច្បាប់សាងសង់ដែលរួមចំណែកដល់ឧប្បត្តិហេតុបែបនេះ។សញ្ជាតិរបស់អ្នកដែលបានស្លាប់មិនត្រូវបានអាជ្ញាធរប្រាប់ភ្លាមៗទេ។ ឯកអគ្គរដ្ឋទូតរបស់ប្រទេសឥណ្ឌា បានទៅសួរសុខទុក្ខនៅមន្ទីរពេទ្យដែលកម្មកររងរបួសក្នុងអគ្គិភ័យកំពុងសម្រាកព្យាបាល។ អ្នករួចជីវិតម្នាក់ពីហេតុការណ៍នោះបាននិយាយថា អគ្គិភ័យចាប់ផ្ដើមពីជាន់ខាងក្រោមនៃអគារ ហើយអ្នកដែលនៅជាន់ខាងលើមិនអាចគេចខ្លួនបានទេ។កម្មកររាប់សិបនាក់ត្រូវបានរាយការណ៍ថារងរបួសក្នុងឧបទ្ទវហេតុនោះ។ ប្រជាជនឥណ្ឌា ជាច្រើននាក់ត្រូវគេរាយការណ៍ថាបានស្លាប់នៅក្នុងអគ្គិភ័យ បើយោងតាមលិខិតមួយដែលផ្ញើទៅកាន់រដ្ឋមន្ត្រីការបរទេសឥណ្ឌា ដែលត្រូវបានចែករំលែកជាមួយសារព័ត៌មាន។អាជ្ញាធរក្នុងតំបន់មិនបានបង្ហាញពីប្រភេទនៃការងារដែលកម្មករទាំងនោះកំពុងធ្វើទេ ប៉ុន្តែដូចទៅនឹងរដ្ឋឈូងសមុទ្រផ្សេងទៀតដែរ ប្រទេសគូវ៉ែត ពឹងផ្អែកខ្លាំងលើការងារបរទេសនៅក្នុងឧស្សាហកម្មដូចជាសំណង់ រួមទាំងកម្មករមកពីអាស៊ីខាងត្បូង និងអាស៊ីអាគ្នេយ៍៕

នគរបាល ធ្វើសន្និសីទបង្ហាញមុខជនសង្ស័យ២៧នាក់ ពាក់ព័ន្ធក្មេងទំនើង ទទួលផលចោរកម្ម និងហិង្សា

ភ្នំពេញ ៖ ជនសង្ស័យចំនួន២៧នាក់ ពាក់ព័ន្ធនឹងករណីក្រុមក្មេងទំនើងកាប់ចាក់គ្នា , ទទួលផលចោរកម្ម និងបង្កអំពើហិង្សាវាយតប់គ្នាតាមទីសាធារណះ ត្រូវបាននគរបាលធ្វើសន្និសិទសារព័ត៌មានបង្ហាញមុខជាសាធារណះ ។ សន្និសិទនេះ បានធ្វើឡើងនារសៀលថ្ងៃទី១២ ខែមិថុនា ឆ្នាំ២០២៤នេះ នៅស្នងការដ្ឋាននគរបាលរាជធានីភ្នំពេញ ក្រោមវត្តមានលោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ និងមានការចូលរួមពី លោកអធិការ អធិការរងនគរបាលខណ្ឌចំនួន០៣ពាក់ព័ន្ធ ។ លោកវរសេនីយ៍ សំ វិច្ឆិកា បានប្រាប់ឱ្យដឹងថា ៖ ជនទាំង២៧នាក់ខាងលើនេះ ត្រូវបានបង្ក្រាប នៅខណ្ឌសែនសុខ ខណ្ឌកំបូល និងដូនពេញ ក្នុងករណី០៣ផ្សេងគ្នា ដោយទាំង៣ករណី សមត្ថកិច្ចបានដកហូតវត្ថុតាងពាក់ព័ន្ធជាច្រើន ។ លោកវរសេនីយ៍បន្តថា កិច្ចការងារបង្ក្រាបក្មេងទំនើងនេះ គឺនគរបាលមិនបានបន្ធូរដៃនោះឡើយ ពោលឱ្យតែកើតមានឡើង គឺនឹងបង្ក្រាបឱ្យមានប្រសិទ្ធិភាព ដើម្បីរក្សាសន្តិសុខសុវត្ថិភាពជូនពលរដ្ឋ និងជាការឆ្លើយតបទៅនឹងបទបញ្ជារដ៏ម៉ឺងម៉ាត់របស់សម្តេច នាយករដ្ឋមន្ត្រី ។ គួរបញ្ជាក់ថា សកម្មភាពក្រុមក្មេងទំនើងកាប់ចាក់អុកឡុកក្នុងរាជធានីភ្នំពេញ ក្នុងមួយរយះក្រោយមកនេះ ហាក់មានភាពស្ងប់ស្ងាត់ និងថបថយចុះច្រើន បន្ទាប់ពីប្រតិបត្តិការបង្ក្រាបរបស់សមត្ថកិច្ចនៅតែបន្ត និងបង្កើនការយកចិត្តទុកដាក់ខ្ពស់បំផុត ក្នុងការបង្ការទប់ស្កាត់ និងបង្ក្រាបដោយមិនដកដៃនោះឡើយ ៕ អត្ថបទ ៖ លីហេង

អាជ្ញាធរសង្កាត់វាលវង់ ខណ្ឌ៧មករាបន្តចុះរៀបចំសណ្ដាប់ធ្នាប់ ក្នុងមូលដ្ឋាន

កម្លាំងគណៈបញ្ជាការឯកភាពសង្កាត់វាល់វង បានចុះអប់រំណែនាំ និងធ្វើកិច្ចសន្យាដល់ក្រុមអាជីវករមួយចំនួនបានយកផ្លូវ ធ្វើអាជីវកម្មលក់ដូរ ធ្វើឲ្យបាត់បង់សណ្ដាប់ធ្នាប់ សាធារណៈ បង្កការកក់ស្ទះចរាចរណ៍ផងដែរ។ជាក់កាលពីល្ងាចថ្ងៃទី១១ ខែមិថុនា ឆ្នាំ២០២៤ ម្សិលមិញកម្លាំងគណៈបញ្ជាការឯកភាពសង្កាត់វាល់វង ខណ្ឌ៧មករា ដែលដឹកនាំផ្ទាល់ ដោយលោក សេង ជី ចៅសង្កាត់វាលវង់ ចុះអប់រំណែនាំ និងធ្វើកិច្ចសន្យាដល់ក្រុមអាជីវក មួយចំនួនបានយកផ្លូវ ធ្វើអាជីវកម្មលក់ដូរ តាមបណ្ដោយផ្លូវលេខ១០៩ និងផ្លូវលេខ១៦៤ជាប់របងសាលាបឋមសិក្សាបាក់ទូក ធ្វើឲ្យបាត់បង់សណ្ដាប់ធ្នាប់ សាធារណៈ បង្កការកក់ស្ទះចរាចរណ៍ ។ ដោយធ្វើកិច្ចសន្យាមិនអនុញ្ញាតឲ្យលក់ដូរ និងតាំងរបស់របរលក់ មកលើផ្លូវសាធារណៈ បែបនេះបន្តទៀតឡើយ បើពុំដូចនេះទេ អាជ្ញាធរសង្កាត់ និងរាយការណ៍បន្តដល់ គណៈបញ្ជាការឯកភាពខណ្ឌចុះធ្វើការ ចាត់វិធានការដ្ឋបាល។ក្នុងនោះដែរ លោក សេង ជី ចៅសង្កាត់វាលវង់ បានឲ្យដឹងថា អាជ្ញាធរសង្កាត់បានចុះអប់រំណែនាំជាប្រចាំ តែក្រុមអាជ្ញាធរមួយចំនួនហាក់មិនចូលរួមជាមួយអាជ្ញាធរឡើយ ដោយបន្តដាក់តាំងលក់ របស់របរ នៅលើចិញ្ជើមផ្លូវ លើសពី១ភាគ៣ អ្នកខ្លះបានដាក់លក់លើផ្លូវតែម្ដង។ ដោយបង្កការកក់ស្ទះចរាចរណ៍យ៉ាងខ្លាំង ជាពិសេសចំណុចផ្លូវលេខ១៦៤ ជាប់របងសាលាបឋមសិក្សាបាក់ទូក ដាក់រទះ លក់លើផ្លូវ បង្កការកកស្ទះ ពេលសិស្សចេញចូលពីសាលា លំបាកធ្វើដំណើរដោយថ្មើរជើង ឬអាចបង្កគ្រោះថ្នាក់ ជាយថាហេតុផងដែរ។ជាចុងក្រោយអាជ្ញាធរសំណូមពរដល់ក្រុមអាជីវករទាំងអស់ ក្នុងមូលដ្ឋានសង្កាត់វាលវង់សូមចូលរួម ថែរក្សាបរិស្ថានអនាម័យ សណ្ដាប់ធ្នាប់ឲ្យមានរបៀបរៀបរយ ក្នុងករណីមិនចូលរួមសហការជាមួយ អាជ្ញាធរមានសមត្ថកិច្ច នោះនិងចាត់វិធានការរដ្ឋបាលឬវិធានការក្ដៅមិនខាន៕ អត្ថបទ៖ កុម្ភៈ

មានរបាយការណ៍ថាអ្នកស្លាប់ក្នុងរលកកម្ដៅនៅរដ្ឋអូឌីសាប្រទេសឥណ្ឌា ១៥៩នាក់ តែអាជ្ញាធរបញ្ជាក់ត្រឹមតែ៤១នាក់

មនុស្សយ៉ាងហោចណាស់១៥៩ នាក់បានស្លាប់ក្នុងករណីសង្ស័យថាបានស្លាប់ដោយសារជំងឺសុរិយរោគ ឬបណ្ដាលមកពីអាកាសធាតុក្ដៅខ្លាំងពេក នៅទូទាំងរដ្ឋ អូឌីសា (Odisha) ប្រទេសឥណ្ឌា ។ ទោះជាយ៉ាងណាក៏ដោយ រដ្ឋាភិបាលរដ្ឋបានបញ្ជាក់ថា ចំនួនអ្នកស្លាប់មានតែ៤១នាក់ប៉ុណ្ណោះ ដែលទាក់ទងនឹងអាកាសធាតុក្ដៅខ្លាំងពេក។ ការស្លាប់ផ្សេងទៀតកំពុងស្ថិតក្រោមការស៊ើបអង្កេតនៅឡើយ។ ស្នងការជំនួយសង្គ្រោះពិសេស (SRC) បាននិយាយនៅក្នុងសេចក្តីប្រកាសព័ត៌មានមួយថា នៅរដូវក្តៅនេះ ករណីស្លាប់ដោយសារជំងឺសុរិយរោគ ឬថ្ងៃក្ដៅខ្លាំងពេក ចំនួន ១៥៩ ករណីជាប់ៗគ្នាត្រូវបានរាយការណ៍។ យោងតាមការសាកសួរលម្អិត មានការស្លាប់ចំនួន ៤១ នាក់ ដោយសារសីតុណ្ហភាពក្ដៅខ្លាំង និង៤៥ ករណីត្រូវបានច្រានចោល ថាមិនមែនបណ្ដាលមកពីថ្ងៃក្ដៅពេកនោះទេ។ យ៉ាងណា ៧៣ ករណី កំពុងស្ថិតក្រោមការសាកសួរនៅថ្នាក់ស្រុក។ ស្នងការផ្ដល់ជំនួយសង្គ្រោះពិសេស បានបន្ថែមថា ករណីស្លាប់៨នាក់ ដែលត្រូវបានដាក់ការស្ដីបន្ទោសលើរលកកម្ដៅខ្លាំង ត្រូវបានរាយការណ៍ក្នុងរយៈពេល ៧២ ម៉ោងចុងក្រោយ ។ស្របពេលចំនួនអ្នកស្លាប់បណ្ដាលមកពីថ្ងៃក្ដៅខ្លាំងកើនឡើង រដ្ឋាភិបាលប្រចាំរដ្ឋ អូឌីសា បានស្នើសុំកុំឲ្យមនុស្សចេញពីផ្ទះបន្ទាប់ពីម៉ោង ១១ ព្រឹក។ ក្រុមអាជ្ញាធរក៏បានស្នើដល់អង្គការផ្សេងៗផងដែរ កុំឲ្យមនុស្សចូលរួមការងារនៅខាងក្រៅផ្ទះចន្លោះពីម៉ោង ១១ ព្រឹកដល់ម៉ោង ៣ រសៀល៕

កាណាដា នឹងជួបប្រទះរដូវក្តៅដែលក្តៅខ្លាំងជាងធម្មតា ខណៈរដូវចំហេះព្រៃជិតមកដល់

មន្ត្រីរដ្ឋាភិបាលបាននិយាយកាលពីថ្ងៃអង្គារ (១១ មិថុនា) ថា ប្រទេសកាណាដា កំពុងរំពឹងថានឹងមានរដូវក្តៅដែលក្តៅខ្លាំងជាងធម្មតា ជាមួយនឹងភ្លៀងធ្លាក់កម្រិតទាបជាងមធ្យមបន្តិច នៅភាគកណ្តាលប្រទេស ដោយផ្តល់នូវភាពធូរស្រាលតិចតួចប៉ុណ្ណោះពីគ្រោះរាំងស្ងួតដែលកំពុងបន្ត និងហានិភ័យនៃរដូវកាលចំហេះព្រៃដ៏អាក្រក់មួយផ្សេងទៀត។កាលពីឆ្នាំមុន កាណាដា បានជួបប្រទះនូវរដូវកាលឆេះព្រៃដ៏អាក្រក់បំផុតមិនធ្លាប់មានរបស់ខ្លួន ជាមួយនឹងចំហេះច្រើនជាង ៦.៦០០ កន្លែងដែលឆាបឆេះផ្ទៃដី ១៥ លានហិកតា ដែលជាតួលេខប្រហែល ៧ ដងនៃមធ្យមភាគប្រចាំឆ្នាំ។ ការធ្លាក់ព្រិលកម្រិតទាបពេញមួយរដូវរងា ដែលមិនសូវត្រជាក់ និងគ្រោះរាំងស្ងួតដ៏រីករាលដាល បានជំរុញឱ្យរដ្ឋាភិបាលព្រមានក្នុងខែមេសា ថា ឆ្នាំ២០២៤ នេះអាចជាឆ្នាំ «មហន្តរាយ» មួយផ្សេងទៀតសម្រាប់ចំហេះព្រៃ។ចំហេះដែលមិនអាចគ្រប់គ្រងបាននៅក្នុងខេត្តភាគខាងលិច ប្រ៊ីដធីស កូឡំប៊ី (British Columbia) និងខេត្ត អាល់ប៊ឺតតា (Alberta) បានបង្ខំឱ្យមានការជម្លៀសជាទ្រង់ទ្រាយធំនៅនិទាឃរដូវនេះ ទោះបីជាអាកាសធាតុត្រជាក់បន្តិចនៅចុងខែឧសភា និងដើមខែមិថុនា បានជួយបន្ថយសកម្មភាពចំហេះក្នុងប៉ុន្មានសប្តាហ៍ថ្មីៗនេះក៏ដោយ។លោកស្រី ជេននីហ្វឺ ស្មីត (Jennifer Smith) អ្នកជំនាញនៃសេវាឧតុនិយមកាណាដា បាននិយាយថាគំរូអាកាសធាតុបង្ហាញថាសីតុណ្ហភាពក្នុងរយៈពេលបីខែខាងមុខ នឹងក្តៅជាងធម្មតានៅទូទាំងប្រទេស លើកលែងតែនៅតាមឆ្នេរសមុទ្រនៃខេត្ត ប្រ៊ីដធីស កូឡំប៊ី៕

លោក Biden បង្ហាញកិច្ចប្រឹងប្រែងលើសុវត្ថិភាពអាវុធ បន្ទាប់ពីសាលក្រមមានទោសរបស់កូនប្រុស

ប្រធានាធិបតីសហរដ្ឋអាមេរិក លោក ចូ បៃដិន (Joe Biden) កាលពីថ្ងៃអង្គារ (១១ មិថុនា) បានបង្ហាញពីកិច្ចខិតខំប្រឹងប្រែងរបស់ខ្លួនក្នុងការកាត់បន្ថយអំពើហិង្សាដោយកាំភ្លើង និងបានអំពាវនាវឱ្យមានការរឹតបន្តឹងបន្ថែមទៀតលើអាវុធ នៅក្នុងការជួបជុំមួយក្នុងទីក្រុងវ៉ាស៊ីនតោន។ ព្រឹត្តិការណ៍ ដែលបង្ហាញពីកិច្ចខិតខំប្រឹងប្រែងរបស់លោកក្នុងការទប់ស្កាត់អាវុធខុសច្បាប់នេះ បានកើតឡើងតែប៉ុន្មានម៉ោងប៉ុណ្ណោះបន្ទាប់ពីកូនប្រុសរបស់លោកឈ្មោះ ហាន់ធឺ បៃដិន (Hunter Biden) ត្រូវបានកាត់ទោសពីបទកាន់កាប់អាវុធដោយខុសច្បាប់ពេលកំពុងប្រើប្រាស់គ្រឿងញៀន។នៅលើឆាក ប្រធានាធិបតីបក្សប្រជាធិបតេយ្យរូបនេះមិនបាននិយាយពីការផ្តន្ទាទោសកូនប្រុសខ្លួនទេ ប៉ុន្តែបានលើកឡើងពីខួបពីរឆ្នាំនៃច្បាប់ទ្វេរបក្សស្ដីពីសុវត្ថិភាពសហគមន៍ (BSC)។ ច្បាប់នោះត្រូវបានជំរុញដោយការបាញ់ប្រហារទ្រង់ទ្រាយធំនៅសាលាបឋមសិក្សាមួយនៅរដ្ឋតិចសាស់ (Texas) និងផ្សារទំនើបក្រុងញូវយ៉ក (New York)។ ច្បាប់នេះបានបង្កើតបទល្មើសព្រហ្មទណ្ឌថ្មីសម្រាប់ការទិញអាវុធពីឈ្មួញកណ្ដាលដោយអ្នកទិញដែលមិនប្រាប់ពីម្ចាស់ពិតប្រាកដនៃកាំភ្លើង ក្នុងចំណោមបទប្បញ្ញត្តិផ្សេងទៀត ហើយលោក បៃដិន បានគូសបញ្ជាក់ថា នោះគឺជាការវិនិយោគរបស់រដ្ឋបាលលោកក្នុងសុវត្ថិភាពសាធារណៈ។ទន្ទឹមនឹងនេះ ប្រធានាធិបតីបក្សប្រជាធិបតេយ្យរូបនេះក៏កំពុងប្រឈមមុខនឹងការតស៊ូដ៏ស្វិតស្វាញប្រឆាំងនឹងអតីតប្រធានាធិបតី ដូណាល់ ត្រាំ (Donald Trump) ដើម្បីឈ្នះអាណត្តិទីពីរនៅក្នុងការបោះឆ្នោតប្រធានាធិបតីខែវិច្ឆិកា។ កាលពីខែមុន លោក ត្រាំ បានទទួលការគាំទ្រពីក្រុមសិទ្ធិប្រើប្រាស់កាំភ្លើង ដ៏ល្បីល្បាញរបស់ប្រទេស ហើយបានសន្យាថានឹងលុបចោលបទប្បញ្ញត្តិកាំភ្លើងដែលដាក់ដោយលោក បៃដិន៕

អង្គការសហប្រជាជាតិ៖ ជនអន្តោប្រវេសន៍៤៩នាក់ស្លាប់ និង១៤០នាក់បាត់ខ្លួនក្នុងពេលលិចទូកជិតប្រទេសយេម៉ែន

អង្គការទេសន្តរប្រវេសន៍អន្តរជាតិ បាននិយាយកាលពីថ្ងៃអង្គារសប្ដាហ៍នេះថា ទូកជនអន្តោប្រវេសន៍មួយគ្រឿង បានលិចនៅក្បែរឆ្នេរសមុទ្ររបស់ប្រទេសយេម៉ែន ឆក់យកជីវិតជនអន្តោប្រវេសន៍យ៉ាងហោចណាស់៤៩នាក់ និងបណ្ដាលឲ្យ១៤០នាក់ផ្សេងទៀត បាត់ខ្លួន។ អង្គការទេសន្តរប្រវេសន៍អន្តរជាតិ បាននិយាយ នៅក្នុងសេចក្ដីថ្លែងការណ៍ថា ទូកដែលផ្ទុកជនអន្តោប្រវេសន៍២៦០នាក់ បានក្រឡាប់លិចកាលពីថ្ងៃចន្ទ ជិតចំនុច អាល់ហ្គារីហ្វ (Alghareef Point) ក្នុងខេត្ត សាប់វ៉ា(Shabwah)របស់ប្រទេសយេម៉ែន ។ អង្គការនេះ បានបន្ថែមថា អ្នកដែលបាត់បង់ជីវិតទាំងនោះរួមមានស្ត្រី ៣១ នាក់ និងកុមារ៦នាក់។ អ្នកនាំពាក្យអង្គការខាងលើ លោក មហាំម៉េដាលី អាប៊ូណាចេឡា (Mohammedali Abunajela)បាននិយាយថា សោកនាដកម្មថ្មីៗនេះគឺជាការក្រើនរម្លឹកមួយផ្សេងទៀតពីតម្រូវការចាំបាច់បន្ទាន់ឲ្យ ធ្វើការរួមគ្នាដោះស្រាយភាពប្រឈមបន្ទាន់របស់ជនអន្តោប្រវេសន៍ និងធានាសុវត្ថិភាព និងសន្តិសុខតាមផ្លូវធ្វើដំណើររបស់ជនអន្តោប្រវេសន៍។ យោងតាមអ្នករួចផុតពីសេចក្ដីស្លាប់ ទូកនោះបានចេញដំណើរពីទីក្រុងបូសាសូ(Bossaso)ក្នុងប្រទេសសូម៉ាលី នៅម៉ោងប្រហែល៣ ព្រឹកម៉ោងក្នុងស្រុកកាលពីថ្ងៃចន្ទ ដោយដឹកជនជាតិសូម៉ាលី១១៥នាក់ ជនជាតិអេត្យូពី ១៤៥នាក់ ក្នុងនោះមានស្ត្រី៩០នាក់ ។ ទីភ្នាក់ងារនេះបានគូសបញ្ជាក់ថាប្រតិបត្តិការស្វែងរក និងជួយសង្រ្គោះនៅតែបន្ត។កាលពីឆ្នាំ២០២៣ ការិយាល័យតាមដានការភៀសខ្លួនរបស់អង្គការទេស្តរប្រវេសន៍ បានកត់ត្រាការមកដល់នៃជនអន្តោប្រវេសន៍ក្នុងប្រទេសយេម៉ែន ជាង៩៧.២០០នាក់ ជាចំនួនលើសជាងកាលពីឆ្នាំមុន ដែលមានត្រឹមជាង២៤.២០០នាក់ប៉ុណ្ណោះ៕

ការបន្តប៉ះទង្គិចគ្នាក្នុងទីក្រុង El Faser ប្រទេសស៊ូដង់ បានធ្វើឲ្យបុគ្គលិកមនុស្សធម៌បាត់បង់ជីវិត

ទីភ្នាក់ងារអង្គការសហប្រជាជាតិ (UN) បានព្រមានកាលពីថ្ងៃអង្គារថា ការប៉ះទង្គិចគ្នាដែលនៅបន្តនៅក្នុងនិងជុំវិញទីក្រុង El Fasher រដ្ឋធានីនៃរដ្ឋ North Darfur នៅភាគខាងលិចប្រទេសស៊ូដង់ កំពុងធ្វើឱ្យបុគ្គលិកមនុស្សធម៌ស្លាប់ជាច្រើននាក់ និងបង្អាក់ដល់ប្រតិបត្តិការ។ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយនៅក្នុងសេចក្តីថ្លែងការណ៍ថា បុគ្គលិកផ្តល់ជំនួយរបស់អង្គការមិនមែនរដ្ឋាភិបាល រីលីហ្វ អ៊ីនធឺណេសិនណល( Relief International) ម្នាក់ទៀតបានស្លាប់ កាលពីថ្ងៃចន្ទក្នុងទីក្រុង Darfur បន្ទាប់ពីត្រូវបានបាញ់ឲ្យរងរបួស ក្នុងអំឡុងពេលប៉ះទង្គិចគ្នា កាលពីថ្ងៃទី១ ខែមិថុនា។សេចក្តីថ្លែងការណ៍និយាយថា លោកគឺជាបុគ្គលិកផ្តល់ជំនួយទីប្រាំមួយ ដែលត្រូវបានសម្លាប់នៅក្នុងប្រទេសស៊ូដង់ ក្នុងរយៈពេលប្រាំមួយសប្តាហ៍កន្លងទៅនេះ ដោយបានបញ្ជាក់ថា បុគ្គលិកផ្នែកមនុស្សធម៌ គួត្រូវតែបានការពារ ក្នុងអំឡុងពេលជម្លោះ ហើយមិនត្រឹមតែនៅក្នុងប្រទេសស៊ូដង់ប៉ុណ្ណោះទេ ប៉ុន្តែនៅគ្រប់ទីកន្លែងផ្សេងទៀតនៅក្នុងពិភពលោក ខណៈពួកគេដឹកជញ្ជូនជំនួយសង្គ្រោះជីវិតទៅដល់ប្រជាជនដែលខ្វះខាត ទោះបីក្នុងពេលមានគ្រោះថ្នាក់ក៏ដោយ។អង្គការ OCHA បាននិយាយថា ការងារមនុស្សធម៌ នាពេលបច្ចុប្បន្នគឺខ្វះការផ្តល់មូលនិធិ នៅក្នុងប្រទេសស៊ូដង់ ដែលកំពុងប្រឈមមុខទៅនឹងវិបត្តិមនុស្សធម៌ធ្ងន់ធ្ងរ រួមទាំងគ្រោះទុរ្ភិក្ស និងការភៀសខ្លួនចេញ។ ទីភ្នាក់ងារអង្គការសហប្រជាជាតិ បាននិយាយថា ការអំពាវនាវផ្នែកមនុស្សធម៌នៅឆ្នាំនេះ សម្រាប់ប្រទេសស៊ូដង់ គឺទទួលបានមូលនិធិត្រឹមតែ១៦ភាគរយប៉ុណ្ណោះ ដោយមានចំនួនតិចជាង៤៤១ លានដុល្លារអាមេរិកដែលទទួលបាន ពីចំនួន២,៧ ពាន់លានដុល្លារ ដែលត្រូវការ។ យោងតាមការប៉ាន់ស្មានចុងក្រោយរបស់អង្គការ OCHA បានឲ្យដឹងថា ការប៉ះទង្គិចគ្នានៅទីក្រុង El Fasher បានកើនឡើងក្នុងជម្លោះកាន់តែរីកធំរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា(RSF) នៅទូទាំងប្រទេស ចាប់តាំងពីថ្ងៃទី ១៥ ខែមេសា ឆ្នាំ ២០២៣ ដែលរហូតមកដល់ពេលនេះបានឆក់យកជីវិតមនុស្ស ១៥.៥៥០នាក់ និងមនុស្សជាង៨,៨លាននាក់ បានភៀសខ្លួនចេញនៅនៅទូទាំងប្រទេស ។

បុរសវ័យ ៥៥ ឆ្នាំម្នាក់ត្រូវឃាត់ខ្លួន ពាក់ព័ន្ធនឹងការចាក់ឱ្យរបួសលើជនជាតិអាមេរិក ៤ នាក់នៅប្រទេសចិន

នគរបាលបាននិយាយកាលពីថ្ងៃអង្គារ (១១ មិថុនា) ថា ជនសង្ស័យម្នាក់ត្រូវបានចាប់ខ្លួនពីបទចាក់ឱ្យមានរបួសលើគ្រូបង្រៀនមហាវិទ្យាល័យជនជាតិអាមេរិក ៤ នាក់នៅភាគឦសានប្រទេសចិន ដែលទីក្រុងប៉េកាំង បានពណ៌នាការវាយប្រហារនោះថាជាឧបទ្ទវហេតុ «ដាច់ដោយឡែក»។សាស្ត្រាចារ្យទាំងបួននាក់ ដែលបានរងរបួសនៅក្នុង «ឧបទ្ទវហេតុដ៏ធ្ងន់ធ្ងរ» នោះ កំពុងស្ថិតក្នុងកម្មវិធីផ្លាស់ប្តូរការសិក្សា និងធ្វើការជាគ្រូបង្រៀននៅមហាវិទ្យាល័យ ខនែល (Cornell) ក្នុងរដ្ឋ អាយអូវ៉ា (Iowa) សហរដ្ឋអាមេរិក។ ការវាយប្រហារបានកើតឡើងកាលពីថ្ងៃចន្ទ នៅក្នុងសួនសាធារណៈក្នុងខេត្ត ជីលីន (Jilin) ជាទីដែលនគរបាលបានបញ្ជាក់ថាពួកគេបានចាប់ខ្លួនជនសង្ស័យ ដែលជាបុរសវ័យ ៥៥ ឆ្នាំម្នាក់។នគបាលមូលដ្ឋានបាននិយាយថា៖ «ជនសង្ស័យនោះមានឈ្មោះលោក សួយ (Cui) ត្រូវបានចាប់ខ្លួននៅក្នុងថ្ងៃតែមួយដែលការវាយប្រហារបានកើតឡើង»។ អ្នកនាំពាក្យ លោក លីន ជាន (Lin Jian) បានប្រាប់អ្នកយកព័ត៌មាននៅឯសន្និសីទសារព័ត៌មានជាប្រចាំរបស់ក្រសួងការបរទេសថា «នគរបាលបានវិនិច្ឆ័យជាបឋមថាករណីនេះជាសំណុំរឿងដាច់ដោយឡែក ហើយការស៊ើបអង្កេតបន្ថែមទៀតកំពុងដំណើរការ»។សេតវិមានបាននិយាយថា សហរដ្ឋអាមេរិកមាន «ការព្រួយបារម្ភយ៉ាងខ្លាំង» ចំពោះឧប្បត្តិហេតុនេះ ដោយបន្ថែមថា ក្រុមអ្នកការទូតអាមេរិក បានជួបនិយាយជាមួយជនរងគ្រោះ។ អភិបាលរដ្ឋ អាយអូវ៉ា លោកស្រី គីម រ៉េយណលស៍ (Kim Reynolds) បាននិយាយថា លោកស្រី «កំពុងទាក់ទងជាមួយគណៈប្រតិភូសហព័ន្ធរបស់រដ្ឋ អាយអូវ៉ា និងនាយកដ្ឋានរដ្ឋ ដើម្បីឆ្លើយតបទៅនឹងការវាយប្រហារដ៏គួរឱ្យរន្ធត់នេះ»៕

ចំនួនអ្នកស្លាប់កើនឡើងដល់១៧៥ នាក់ ក្រោយទឹកជំនន់ជាប្រវត្តិសាស្ត្រវាយប្រហារភាគខាងត្បូង ប្រេស៊ីល

យោងតាមរបាយការណ៍ចុងក្រោយពីទីភ្នាក់ងារការពារជនស៊ីវិលរបស់រដ្ឋ រីអូ ក្រែនដេ ដូស៊ុល(Rio Grande do Sul ) ចំនួនអ្នកស្លាប់ដោយសារទឹកជំនន់នៅភាគខាងត្បូងរដ្ឋមួយនេះ របស់ប្រទេសប្រេស៊ីល បានកើនឡើងដល់១៧៥នាក់ ហើយគិតមកដល់ពេលនេះ ។ ទីភ្នាក់ងារនេះបាននិយាយថាមនុស្សជាង ៨០០ នាក់បានរងរបួស ហើយ ៣៨ នាក់នៅតែបាត់ខ្លួននៅឡើយរហូតមកដល់សប្ដាហ៍នេះ។យោងតាមទីភ្នាក់ងារការពារជនស៊ីវិល ចាប់តាំងពីថ្ងៃទី ២៩ ខែមេសាមក ទឹកជំនន់ដែលបង្កឡើងដោយភ្លៀងធ្លាក់ខ្លាំង បានប៉ះពាល់ដល់មនុស្សជាង ២លាន៣សែននាក់ ស្មើនឹង ២០ ភាគរយនៃចំនួនប្រជាជនរបស់រដ្ឋនេះ។ មនុស្សជាង ៤៣២.៤០០នាក់ ត្រូវបានក្រុមអាជ្ញាធរបញ្ជាឲ្យជម្លៀសចេញពីលំនៅឋាន ខណៈពលរដ្ឋជាង១៨.៨០០នាក់នៅតែរស់នៅក្នុងជម្រកបណ្តោះអាសន្ន។ ជាងពីរភាគបីនៃទីក្រុងជិត ៥០០ នៅក្នុងរដ្ឋមួយនេះ នៅតែស្ថិតក្នុងស្ថានភាពលំបាកដោយសារគ្រោះមហន្តរាយជាប្រវត្តិសាស្ត្រនេះ ។ ទីភ្នាក់ងារនេះព្រមានថា ភ្លៀងធ្លាក់ខ្លាំងត្រូវបានគេរំពឹងថានឹងវាយប្រហាររដ្ឋនេះម្តងទៀតចាប់ពីថ្ងៃទី ១៤ ដល់ថ្ងៃទី ១៧ ខែមិថុនានេះ៕

បណ្ដាញសង្គម

ព័ត៌មានថ្មីៗ

ព្រះសង្ឃ និងពុទ្ធបរិសទ្ធនៅសៀមរាប រួមគ្នាយកអំណោយចែកជូនវីរកងទ័ពនៅព្រំដែនកម្ពុជា-ថៃ

សម្ដេច ម៉ែន សំអន អញ្ជើញចូលថ្វាយបង្គំ ថ្វាយភួងផ្កា ថ្វាយរបាំ ដល់ព្រះប្រតិមាទើបប្រទះឃើញ នៅសារមន្ទីរខេត្តកំពង់ធំ

សម្តេច ម៉ែន សំអន អញ្ជើញបួងសួងសុំសេចក្តីសុខ សេចក្តីចម្រើនជូនជាតិ និងប្រជាពលរដ្ឋ នៅប្រាសាទសំបូរព្រៃគុក

លោក Trump នឹងជួបលោកZelensky នៅអាមេរិក បន្ទាប់ពីកិច្ចពិភាក្សាដោយជោគជ័យ ជាមួយលោក Putin

ចំនួនអ្នកស្លាប់កើនឡើង ខណៈចំហេះព្រៃនៅតែបន្តឆាបឆេះពាសពេញអឺរ៉ុបភាគខាងត្បូង

ទឹកជំនន់នៅភាគខាងជើងប្រទេសចិន សម្លាប់មនុស្ស៨នាក់ និងបាត់ខ្លួន៤នាក់

បណ្ដាប្រទេសអារ៉ាប់ និងឥស្លាម ថ្កោលទោសការលើកឡើងរបស់លោក Netanyahu ដែលចង់ពង្រីកអ៊ីស្រាអែលកាន់តែអស្ចារ្យ

BREAKING NEWS! រញ្ជួយដីដ៏ខ្លាំងក្លាវាយប្រហារឥណ្ឌូនេស៊ី បានបណ្តាលឲ្យមនុស្សរាប់សិបនាក់រងរបួស និងពីរនាក់របួសធ្ងន់

ពលរដ្ឋខ្មែរនិងព្រះសង្ឃ ជាង ១០០០អង្គ/នាក់ ជួបជុំគ្នាបាតុកម្ម សុំឱ្យសហគមន៍អន្តរជាតិ អន្តរាគមន៍ឱ្យប្រទេសថៃ គោរពបទឈប់បាញ់ និងដោះលែងកងទ័ពកម្ពុជាដោយឥតលក្ខខណ្ឌ

មន្ត្រីសង្ឃខេត្តសៀមរាប នាំយកជំនួយសប្បុរសជននៅអាមេរិក ជូនកងទ័ពជួរមុខ ក្នុងខេត្តឧត្តរមានជ័យ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877