BTV NEWS

នគរបាលនៅអាកាសយានដ្ឋានអន្តរជាតិភ្នំពេញ ឃាត់ខ្លួនជនបរទេសម្នាក់ ពាក់ព័ន្ធករណីដឹកជញ្ជូនកញ្ឆាក្រៀមឆ្លងដែនជិត ២០គីឡូក្រាម

ក្រុមក្មេងទំនើងជាង៤០នាក់ ត្រូវសមត្ថកិច្ចបញ្ជូនទៅពន្ធនាគារ អ្នកនាំពាក្យព្រមានថា "បើមិនកែ គឺគុក!"

នាយកដ្ឋានប្រឆាំងបទល្មើសបច្ចេកវិទ្យា បង្រ្កាបករណីឆបោកក្រោមរូបភាពទិញលក់ម៉ូតូតាមអនឡាញ

នគរបាលខណ្ឌកំបូលឃាត់ម៉ូតូ ១០គ្រឿង ករណីប្រេីប្រាស់សុីម៉ាំងបំពងសំឡេង

សន្តិសុខ និង សង្គម

ចិននិងអាស៊ាន អះអាងជាថ្មីនូវការប្តេជ្ញាចិត្ត ដើម្បីជំរុញភាពជាដៃគូយុទ្ធសាស្ត្រគ្រប់ជ្រុងជ្រោយ

ប្រទេសចិន និងសមាគមប្រជាជាតិអាស៊ីអាគ្នេយ៍ (អាស៊ាន) បានប្តេជ្ញាជំរុញភាពជាដៃគូយុទ្ធសាស្ត្រគ្រប់ជ្រុងជ្រោយរបស់ពួកគេនៅក្នុងកិច្ចប្រជុំរដ្ឋមន្ត្រីការបរទេសចិន-អាស៊ាន(១០+១) ដែលធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ី កាលពីថ្ងៃព្រហស្បតិ៍។ប្រទេសចិន និងអាស៊ានបានអនុវត្តយ៉ាងសកម្មនូវគោលបំណង និងគោលការណ៍នៃសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) ហើយបានពង្រីកកិច្ចសហប្រតិបត្តិការដែលមានផលប្រយោជន៍ទៅវិញទៅមកលើគ្រប់វិស័យ ដោយបានបង្កើននូវមាគ៌ាត្រឹមត្រូវនៃការបង្កើតភាពជាអ្នកជិតខាងល្អយូរអង្វែង ខណៈពេលដែលសម្រេចបាននូវការអភិវឌ្ឍរួម និងការរីកចម្រើន នេះបើតាមការលើកឡើងរបស់ប្រធានការិយាល័យគណៈកម្មាធិការមជ្ឈិមបក្សកុម្មុយនីស្តទទួលបន្ទុកកិច្ចការបរទេសរបស់ប្រទេសចិន លោក Wang Yi នៅក្នុងកិច្ចប្រជុំដែលមានការចូលរួមពីរដ្ឋមន្ត្រីការបរទេសនៃប្រទេសជាសមាជិកអាស៊ាន អ្នកសង្កេតការណ៍អាស៊ាន និងអគ្គលេខាធិការអាស៊ានផងដែរ។លោក Wang បាននិយាយថា ភាគីទាំងពីរបានធ្វើការរួមគ្នាក្នុងការកសាងខ្សែក្រវាត់ និងផ្លូវ ព្រមទាំងសហគមន៍មួយដែលមានអនាគតរួមគ្នា ខណៈរួមគ្នាលើកកម្ពស់សមាហរណកម្មសេដ្ឋកិច្ចក្នុងតំបន់ និងការពង្រឹងមូលដ្ឋានគ្រឹះនៃសន្តិភាព និងស្ថិរភាព។លោកបានបន្តថា ប្រទេសចិននឹងធ្វើការរួមគ្នាជាមួយអាស៊ាន ដើម្បីជំរុញភាពជាដៃគូយុទ្ធសាស្ត្រគ្រប់ជ្រុងជ្រោយចិន-អាស៊ាន និងធ្វើការរួមចំណែកថ្មីៗដល់សន្តិភាព និងវិបុលភាពក្នុងតំបន់ផងដែរ៕

រដ្ឋមន្ត្រីការបរទេសឥណ្ឌូណេស៊ី៖ តំបន់ឥណ្ឌូប៉ាស៊ីហ្វិកមិនគួរក្លាយជា "សមរភូមិសង្គ្រាម" មួយទៀតនោះទេ

រដ្ឋមន្ត្រីការបរទេសឥណ្ឌូណេស៊ី លោកស្រី Retno Marsudi បានប្រដូចភាពតានតឹងភូមិសាស្ត្រនយោបាយនៅឥណ្ឌូ-ប៉ាស៊ីហ្វិកថាជា "សង្រ្គាមត្រជាក់នៅក្នុងទីក្តៅ" ក្នុងអំឡុងពេលកិច្ចប្រជុំកំពូលអាស៊ីបូព៌ាប្រចាំឆ្នាំនៅទីក្រុងហ្សាកាតានៅថ្ងៃសុក្រ (១៤ កក្កដា)នេះ។ដោយថ្លែងទៅកាន់សមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិកទាំង១០ប្រទេស និងដៃគូសន្ទនារបស់ខ្លួនលោកស្រី Retno ក៏បានសង្កត់ធ្ងន់លើស្ថិរភាព និងសន្តិភាពនៅក្នុងតំបន់ ដោយជំរុញឱ្យប្រទេសនានាកុំធ្វើឱ្យតំបន់ឥណ្ឌូ-ប៉ាស៊ីហ្វិកប្រែក្លាយជា "សមរភូមិសង្រ្គាម" មួយផ្សេងទៀតឡើយ។ក្រៅពីរដ្ឋមន្ត្រីការបរទេសទីម័រខាងកើត ដែលត្រូវបានអនុម័តជាគោលការណ៍ជាសមាជិកទី១១របស់ក្រុមនេះ មានវត្តមាននៅក្នុងកិច្ចប្រជុំ ក៏មានប្រមុខការទូតជាច្រើនមកពីប្រទេសចិន ជប៉ុន កូរ៉េខាងត្បូង ឥណ្ឌា អូស្ត្រាលី និងនូវ៉ែលហ្សេឡង់ផងដែរ។កិច្ចប្រជុំប្រចាំឆ្នាំដែលធ្វើឡើងនៅទីក្រុងហ្សាកាតាក្នុងឆ្នាំនេះ ក៏រួមបញ្ចូលនូវមហាអំណាចធំៗដូចជាចិន និងរុស្ស៊ីផងដែរ ហើយធ្វើឡើងនៅពេលដែលការសង្ស័យលើភាពជឿជាក់ និងការរួបរួមរបស់ប្លុកក្នុងការដោះស្រាយបញ្ហាប្រឈមដ៏គ្រោះថ្នាក់បំផុតក្នុងតំបន់នេះមានការកើនឡើង៕

WHO ចាត់ទុកសារធាតុaspartame (អាស្ប៉ាតាំ) ថាជា 'សារធាតុបង្កជំងឺមហារីក'

សារធាតុផ្អែមឈ្មោះ aspartame គឺជា "សារធាតុបង្កមហារីក" ប៉ុន្តែវានៅតែមានសុវត្ថិភាពក្នុងការប្រើប្រាស់ក្នុងកម្រិតដែលបានកំណត់ នេះបើយោងតាមប្រភពចំនួនពីរដែលមានទំនាក់ទំនងជាមួយអង្គការសុខភាពពិភពលោក(WHO)។សេចក្តីសម្រេចនេះ គឺជាលទ្ធផលនៃក្រុមអ្នកជំនាញរបស់អង្គការ WHO ពីរដាច់ដោយឡែកពីគ្នា ដែលមួយក្រុមក្នុងនោះបានលើកសំណួរថាតើមានភស្តុតាងណាមួយដែលថា សារធាតុនេះគឺជាគ្រោះថ្នាក់ដែលអាចកើតមាន ឬយ៉ាងណា និងមួយក្រុមទៀតវាយតម្លៃថាតើហានិភ័យនៃសារធាតុនោះទៅលើជីវិតមនុស្សមានកម្រិតប៉ុនណា។សារធាតុ Aspartame ( អាស្ប៉ាតាំ) គឺជាសារធាតុផ្អែមដ៏ពេញនិយមបំផុតមួយរបស់ពិភពលោក ដែលប្រើក្នុងផលិតផលជាច្រើនរាប់ពីភេសជ្ជៈកូកាកូឡា រហូតដល់ស្ករកៅស៊ូរបស់ក្រុមហ៊ុនMarsផងដែរ។ នៅក្នុងសន្និសីទសារព័ត៌មាននៅមុនការប្រកាសនេះ ប្រធានផ្នែកអាហារូបត្ថម្ភរបស់អង្គការសុខភាព ពិភពលោក លោក Francesco Branca បានព្យាយាមឲ្យអ្នកប្រើប្រាស់យល់អំពីសេចក្តីប្រកាសនេះដែលហាក់ដូចជាមានភាពចម្រូងចម្រាស ជាពិសេសអ្នកដែលព្យាយាមប្រើប្រាស់សារធាតុផ្អែមសិប្បនិម្មិតដើម្បីចៀសវាងការប្រើស្ករពិតប្រាកដ។នៅក្នុងសេចក្ដីសម្រេចដែលបានប្រកាសនៅថ្ងៃសុក្រ (១៤ កក្កដា)នេះ ម៉ោងនៅទីក្រុងហ្សឺណែវ ទីភ្នាក់ងារអន្តរជាតិសម្រាប់ការស្រាវជ្រាវលើជំងឺមហារីក (IARC) បាននិយាយថា សារធាតុ aspartame គឺជា "សារធាតុបង្កមហារីក" ដែលជាការប្រកាសដំបូងរបស់ខ្លួនស្តីពីសារធាតុបន្ថែមរសជាតិមួយនេះ។ សេចក្ដីសម្រេចនោះមានន័យថា មិនមានភ័ស្តុតាងគ្រប់គ្រាន់ដែលថាសារធាតុនេះអាចបង្កឱ្យមានជំងឺមហារីកនោះទេ៕

សហភាពអឺរ៉ុប ដកចេញការរឹតត្បិតការនាំចេញចំណីអាហារពីជប៉ុន ដែលមានការពាក់ព័ន្ធនឹងរោងចក្រនុយក្លេអ៊ែរ Fukushima

ប្រធានគណៈកម្មការសហភាពអឺរ៉ុបលោកស្រី Ursula Von der Leyen និយាយកាលពីថ្ងៃព្រហស្បតិ៍ថា សហភាពអឺរ៉ុប យល់ព្រមដកចេញការរឹតត្បិតដែលនៅសេសសល់លើការនាំចូលចំណីអាហារពីជប៉ុន ដែលជាប់ពាក់ព័ន្ធនឹងឧបទ្ទវហេតុរោងចក្រនុយក្លេអ៊ែរ Fukushimaកាលពីដើមឆ្នាំ ២០១១ ។ វិធានការរឹតត្បិតការនាំចេញចំណីអាហារពីជប៉ុន ត្រូវបានដាក់ចេញ ចាប់តាំងពីការរញ្ជួយដី និងរលកយក្សស៊ូណាមិ បានបំផ្លិចបំផ្លាញរោងចក្រថាមពលនុយក្លេអ៊ែរ Fukushima ស្ថិតនៅតាមតំបន់ឆ្នេរភាគកើតប្រទេសជប៉ុន និងនៅភាគខាងទីក្រុងតូក្យូ ជាហេតុធ្វើឲ្យខូចម៉ាស៊ីនរ៉េអាក់ទ័រជាច្រើនគ្រឿង ។ សហភាពអឺរ៉ុប និងជប៉ុន បានព្រមព្រៀងផងដែរដើម្បីដោះស្រាយបញ្ហាពាណិជ្ជកម្មជាច្រើនទៀតក្នុងឆ្នាំនេះ ជាពិសេសគឺការនាំចេញផលិតកសិកម្មអឺរ៉ុបចូលទៅក្នុងទីផ្សារជប៉ុន ៕

ប្រទេសកូឡុំប៊ីអបអរសេចក្តីសម្រេចរបស់ទីក្រុងឡាអេ លើជម្លោះដែនសមុទ្រជាមួយប្រទេសនីការ៉ាហ្គ័រ

កាលពីថ្ងៃព្រហស្បតិ៍ (១៣ កក្កដា) ប្រទេសកូឡុំប៊ីបានអបអរសេចក្តីសម្រេចរបស់តុលាការយុត្តិធម៌អន្តរជាតិ(ICJ) ដែលបានច្រានចោលបណ្តឹងរបស់ប្រទេសនីការ៉ាហ្គ័រ ដែលស្វែងរកការកំណត់ និងពង្រីកសិទ្ធិសេដ្ឋកិច្ចនៅដែនសមុទ្រជ្រៅរបស់ខ្លួនលើសពីអ្វីដែលបានបង្កើតឡើងពីមុន នៅក្នុងជម្លោះព្រំដែនសមុទ្រដែលអូសបន្លាយពេលយូរលើប្រជុំកោះនៃមហាសមុទ្រការាអ៊ីប ជាមួយប្រទេសកូឡុំប៊ី។ចៅក្រមនៅតុលាការពិភពលោកដែលមានទំនងជាមួយអង្គការសហប្រជាជាតិ ឬតុលាការយុត្តិធម៌អន្តរជាតិ បានរកឃើញថា សិទ្ធិសមុទ្រទឹកជ្រៅរបស់នីការ៉ាហ្គ័រក្នុងចម្ងាយ ២០០ម៉ាយល៍ណត់ (៣៧០គីឡូម៉ែត្រ) ត្រូវបានបង្កើតឡើងពីមុន ហើយបានបដិសេធការអំពាវនាវរបស់ប្រទេសនេះក្នុងការទាមទារឱ្យពង្រីកព្រំដែនសមុទ្រ។ប្រធានាធិបតីកូឡុំប៊ីលោក Gustavo Petro បានសាទរចំពោះសេចក្តីសម្រេចនេះ នៅក្នុងការបង្ហោះនៅលើបណ្ដាញសង្គម Twitter ដោយហៅការសម្រេចនោះថាជា "ជ័យជម្នះដ៏អស្ចារ្យសម្រាប់ប្រទេសកូឡុំប៊ី"។ រដ្ឋាភិបាលរបស់នីការ៉ាហ្គាបានឆ្លើយតបនៅក្នុងសេចក្តីថ្លែងការណ៍មួយដោយបញ្ជាក់ថា ខ្លួនបានទទួលស្គាល់សេចក្តីសម្រេចរបស់តុលាការថា "រឹងមាំ ច្បាស់លាស់ និងជាកាតព្វកិច្ចខ្លួន"។ចាប់តាំងពីដើមសតវត្សរ៍ទី២០មក ប្រទេសនីការ៉ាហ្គ័រ និងកូឡុំប៊ីបានឈ្លោះប្រកែកគ្នាអំពីកម្មសិទ្ធិនៃធនធានរ៉ែ និងដែនទឹកដែលសម្បូរដោយភោគផលត្រីនៅក្នុងសមុទ្រការាអ៊ីប ទោះបីជាប្រទេសទាំងពីរមិនមានព្រំដែនដីគោកជាប់គ្នាក៏ដោយ៕

តុលាការបោះឆ្នោត៖ គ្មានការរឹតបន្តឹងលើការបោះឆ្នោតជុំទី២ របស់ហ្គាតេម៉ាឡាទេ

មន្ត្រីជាន់ខ្ពស់ម្នាក់មកពីតុលាការបោះឆ្នោតបាននិយាយកាលពីថ្ងៃព្រហស្បតិ៍ (១៣ កក្កដា)ថា មិនមានការរឹតបន្តឹងផ្លូវច្បាប់ណាមួយដែលរារាំងការជាប់ឆ្នោតប្រធានាធិបតីរបស់ប្រទេសហ្គាតេម៉ាឡាដែលត្រូវបានអនុវត្តនោះទេ បន្ទាប់ពីតុលាការធម្មនុញ្ញបានកាត់សេចក្តីឱ្យផ្អាកគណបក្សមួយពីការប្រកួតបោះឆ្នោតប្រធានាធិបតីនៃប្រទេសមួយនេះ។តុលាការជាន់ទាបមួយកាលពីថ្ងៃពុធបានបញ្ជាឱ្យផ្អាកបេក្ខជនប្រធានាធិបតីលោក Bernardo Arevalo មកពីគណបក្ស Semilla ឆ្វេងនិយមកណ្តាល ដែលបានធ្វើឱ្យការបោះឆ្នោតជុំទីពីរចុងក្រោយនៅថ្ងៃទី២០ ខែសីហាមានភាពចលាចល។ការបោះឆ្នោតបានធ្លាក់ចូលទៅក្នុងភាពចលាចល នៅពេលដែលតុលាការជាន់ទាបបានផ្តល់សំណើរបស់រដ្ឋអាជ្ញាដើម្បីដកគណបក្ស Semilla ជុំវិញការចោទប្រកាន់ថាគណបក្សនេះមានសមាជិកពាក់ព័ន្ធនឹងរឿងខុសច្បាប់ជាង៥.០០០នាក់ រួមទាំងមនុស្សស្លាប់ចំនួន១២នាក់។លោក Arevalo ទទួលបានកំណើននៃការគាំទ្រនៅក្នុងការបោះឆ្នោតជុំទី១ កាលពីខែមិថុនា ក្នុងការមានលក្ខណៈសម្បត្តិគ្រប់គ្រាន់សម្រាប់ការបោះឆ្នោតជុំទី២ប្រឆាំងនឹងអតីតស្រ្តីទីមួយគឺលោកស្រី Sandra Torres នៅថ្ងៃទី២០ ខែសីហា។ លោកបានគម្រាមចាត់វិធានការលើការបង្កើតនយោបាយដែលលោកចោទប្រកាន់ថាពុករលួយ៕

វិបត្តិទឹកបានធ្វើឲ្យប៉ះពាល់យ៉ាងខ្លាំងដល់ការចិញ្ចឹមត្រីនៅទីក្រុង Basra របស់ប្រទេសអ៊ីរ៉ាក់

បច្ចុប្បន្នប្រទេសអ៊ីរ៉ាក់ កំពុងស្ថិតក្នុងវិបត្តិកង្វះខាតទឹកធ្ងន់ធ្ងរ ដែលធ្វើឲ្យអ្នកដំាដំណាំ និងអ្នកផលិតចំណីអាហារ ដូចជាកសិករចិញ្ចឹមត្រីអ៊ីរ៉ាក់ លោក Qasem Karamប្រឈមនឹងការបាត់បង់ជីវភាពរស់នៅប្រចាំថ្ងៃរបស់ពួកគេ ។ ក្រុមអ្នកជំនាញ និងក្រុមមន្រ្តីនិយាយថា ការលើកទំនប់ខ្សែទឹកខាងលើនៅក្នុងប្រទេសទួរគី និងអ៊ីរ៉ង់ បានធ្វើឲ្យប៉ះពាល់ដល់ចរន្តទឹកហូររួចទៅហើយនៅតាមដងទន្លេ Tigris និងទន្លេ Euphrates( អ៊ើហ្វ្រេត) ដែលបង្កើតបានជាទន្លេ Shatt al-Arabបន្ថែមពីការបញ្ចេញទឹកកាកសំណល់ និងភ្លៀងធ្លាក់តិចតួច ដោយសារតែបម្រែបម្រួលអាកាសធាតុ ជាហេតុធ្វើឲ្យ មានការកាត់បន្ថយដ៏គំហុកលើការចិញ្ចឹមត្រី ។ កម្រិតទឹកទាបជាងមុន បានបង្កើនការហួតទឹកកាន់តែខ្លាំងផងដែរ ហើយនិងធ្វើឲ្យទឹកកាន់តែប្រៃជាងមុន ។ លោក Karam និងកសិករចិញ្ចឹមត្រី ៣នាក់ផ្សេងទៀតដែលទីភ្នាក់ងារព័ត៌មានរ៉យទ័របានធ្វើបទសម្ភាសន៍ និយាយថា ការបាត់បង់ទឹកល្មម បានធ្វើឲ្យពួកគេលែងមានមុខរបររីកចម្រើន និងចំណេញប្រាក់ ។ លោក Karam និយាយថា ត្រីរបស់គាត់ឥឡូវបានឈឺផងដែរ មិនសូវលូតលាស់ ឬងាប់ ដោយសារតែលទ្ធផលបែបនេះ ។ យោងតាមការអះអាងរបស់លោក Abbas Dakheel គឺជាមន្រ្តីនៅអគ្គនាយកដ្ឋានកសិកម្មទីក្រុង Basra បានឲ្យដឹងថា កសិដ្ឋានចិញ្ចឹមត្រីមានច្បាប់អនុញ្ញាត ៤កន្លែងប៉ុណ្ណោះ បន្តការងារចិញ្ចឹមត្រីរបស់ពួកគេនៅក្នុងឆ្នាំនេះ ពោលគឺខុសគ្នាពីកសិដ្ឋានចិញ្ចឹមត្រី ១៥កន្លែងដែលនៅប្រតិបត្តិការអំឡុងឆ្នាំ ២០២០ ។ សូមបញ្ជាក់ថា ដើម្បីស្រោចស្រង់វិបត្តិកង្វះខាតទឹកធ្ងន់ធ្ងរ ក្រុមអាជ្ញាធរអ៊ីរ៉ាក់ បានចាត់វិធានការជាច្រើនដែលរួមទាំងការបិទកសិដ្ឋានចិញ្ចឹមត្រីគ្មានច្បាប់អនុញ្ញាតប្រហែល ៩៥កន្លែងនៅក្នុងទីក្រុង Basra ៕

តារាសម្តែងហូលីវូដ ចូលរួមជាមួយក្រុមអ្នកនិពន្ធ ក្នុងកូដកម្មជាប្រវត្តិសាស្ត្រ

តារាសម្ដែងរបស់ផលិតកម្មហូលីវូដ បានធ្វើកូដកម្ម នៅពាក់កណ្តាលអធ្រាត្រថ្ងៃព្រហស្បតិ៍ (ទី១៣ ខែកក្កដា) បន្ទាប់ពីការចរចាជាមួយស្ទូឌីយោ បានបរាជ័យ ដោយចូលរួមជាមួយអ្នកនិពន្ធអត្ថបទភាពយន្ត និងទូរទស្សន៍ ដែលបានជួបជុំគ្នា តាំងពីខែឧសភា និងដោយធ្វើឲ្យរាំងស្ទះកាន់តែខ្លាំងឡើងដល់ការផ្សាយកម្មវិធីកម្សាន្ត និងភាពយន្តជាច្រើន។ឥឡូវនេះ ស្ទូឌីយោ កំពុងប្រឈមជាមួយការឈប់ដំណើរការចំពោះការងារទាំង២ ជាលើកដំបូងរបស់ខ្លួន ក្នុងរយៈពេល ៦៣ឆ្នាំ ដោយជំរុញឲ្យពួកគេបង្ខំចិត្តបញ្ឈប់ផលិតកម្មជាច្រើន នៅទូទាំងសហរដ្ឋអាមេរិក និងក្រៅប្រទេស។ កូដកម្មរួមបញ្ចូលគ្នានេះ នឹងបន្ថែមការខូចខាតផ្នែកសេដ្ឋកិច្ច ដោយសារការដើរចេញរបស់អ្នកនិពន្ធ ដោយផ្តល់ផលប៉ះពាល់មួយផ្សេងទៀតដល់ឧស្សាហកម្ម ដែលកំពុងប្រឹងដោះស្រាយកែប្រែអាជីវកម្មរបស់ខ្លួន។សហជីពដែលមានឈ្មោះថា SAG-AFTRA Screen Actors Guild និងសមាគមសិល្បករទូរទស្សន៍ និងវិទ្យុអាមេរិក បានចូលរួមជាមួយសមាគមអ្នកនិពន្ធ Writers Guild of America (WGA) ក្នុងកូដកម្មទាមទារដំឡើងប្រាក់ឈ្នួលគោល និងអត្ថប្រយោជន៍ផ្សេងៗទៀត នៅក្នុងយុគសម័យទូរទស្សន៍ផ្សាយផ្ទាល់តាមប្រព័ន្ធអ៊ិនធឺណេតនេះ បូករួមទាំងការធានាថា ការងាររបស់ពួកគេ នឹងមិនត្រូវបានជំនួសដោយបញ្ញាសិប្បនិម្មិត (AI) នោះទេ។លោកស្រី Fran Drescher អតីតតារាដ៏ល្បីល្បាញរបស់កម្មវិធីទូរទស្សន៍ «The Nanny» និងជាប្រធានសហជីព SAG-AFTRA បានហៅការឆ្លើយតបរបស់ស្ទូឌីយោ ចំពោះកង្វល់ពីតារាសម្តែងថា ជា «ប្រមាថ និងមិនគោរព»។ផលិតកម្មហូលីវូដ មិនបានជួបប្រទះនឹងការធ្វើកូដកម្មក្នុងពេលដំណាលគ្នានោះឡើយ ចាប់តាំងពីឆ្នាំ១៩៦០ នៅពេលដែលសមាជិកនៃសមាគម WGA និង Screen Actors Guild ទាំង២ បានលាឈប់ពីការងារ ដើម្បីជាការតវ៉ាប្រឆាំងនឹងការមិនទទួលបានអត្ថប្រយោជន៍ផ្សេងៗពីលក់ខ្សែភាពយន្តឲ្យទៅបណ្តាញស្ថានីយទូរទស្សន៍៕

ក្រុមអ្នកជំនាញ៖ ទីក្រុង Chicago និង New York អាចនឹងមានគុណភាពខ្យល់ដ៏អាក្រក់បំផុតនៅលើពិភពលោក

វាទើបតែមានរយៈពេល ២សប្តាហ៍មុនប៉ុណ្ណោះ ពេលដែលទីក្រុង Chicago សហរដ្ឋអាមេរិក មានគុណភាពខ្យល់ដ៏អាក្រក់បំផុតនៅលើពិភពលោកដោយសារតែផ្សែងហោះចេញពីភ្លើងឆេះព្រៃនៅក្នុងប្រទេសកាណាដា ។ វាកាន់តែអាក្រក់បំផុត ពេលដែលមនុស្សរាប់លាននាក់ ត្រូវបានគេព្រមានឲ្យស្នាក់នៅក្នុងផ្ទះរយៈពេលច្រើនថ្ងៃដោយសារការព្រួយបារម្ភថា ភាគល្អិតនៅក្នុងខ្យល់អាចនឹងធ្វើឲ្យពួកគេធ្លាក់ខ្លួនឈឺ ។ ផ្សែងកខ្វក់នៅក្នុងទីក្រុង Chicago បានកើតមានឡើងរយៈពេលប៉ុន្មានសប្តាហ៍ប៉ុណ្ណោះ ក្រោយផ្សែងភ្លើងឆេះព្រៃកាណាដា បានគ្របដណ្តប់លើទីក្រុង New Yorkធ្វើឲ្យផ្ទៃមេឃប្រែជាស្រអាប់ និងឡើងពណ៌លឿងទុំ ។ ស្របពេលដែលភ្លើងឆេះព្រៃនៅកាណាដា ត្រូវបានគេរំពឹងថានឹងបន្តឆាបឆេះពេញរដូវក្តៅ ហើយនិងបន្តរហូតដល់រដូវស្លឹកឈើជ្រុះនោះ ក្រុមអ្នកជំនាញបម្រែបម្រួលអាកាសធាតុ មានជំនឿថា ទីក្រុង New York, Chicago និងទីក្រុងជាច្រើនទៀតរបស់សហរដ្ឋអាមេរិក អាចនឹងហ៊ុព័ទ្ធដោយផ្សែងម្តងទៀត ក្នុងពេលដ៏ខ្លីខាងមុខនេះ ដែលជាគុណភាពខ្យល់ដ៏អាក្រក់បំផុតនៅលើពិភពលោក ។ លោក Daniel Horton គឺជាសាស្រ្តាចារ្យរង និងជាអ្នកដឹកនាំក្រុមស៊ើបអង្កេតសម្រាប់ក្រុមស្រាវជ្រាវបម្រែបម្រួលអាកាសធាតុនៅសាកលវិទ្យាល័យ Northwestern បាននិយាយប្រាប់ទីភ្នាក់ងារព័ត៌មានរ៉យទ័រថា ក្តីកង្វល់ពីគុណភាពខ្យល់គ្មានសុខភាពនៅទីក្រុង Chicago និងទីក្រុង New York បានជួយធ្វើឲ្យបញ្ហាក្លាយជាចំណាប់អារម្មណ៍របស់សាធារណជន ៕

ភ្លើងឆេះព្រៃ បានឆាបឆេះផ្ទះសម្បែងប្រជាពលរដ្ឋ និងរថយន្តជាច្រើនគ្រឿងនៅប្រទេសក្រូអាត

អណ្តាតភ្លើង និងផ្សែងខ្មៅយ៉ាងក្រាស់ឃ្មឹក បានហោះពីលើផ្ទះ និងរថយន្តដែលរងការឆាបឆេះ នៅប្រទេសក្រូអាត ស្របពេលដែលភ្លើងឆេះព្រៃ បានឆាបឆេះឡើងកាលពីថ្ងៃព្រហស្បតិ៍ ក្នុងនោះភូមិមួយកន្លែងរងការឆាបឆេះគ្មានសេសសល់ ហើយភូមិជាច្រើនកន្លែងទៀត រងការគំរាមកំហែង ស្របពេលដែលសីតុណ្ហភាពបន្តហក់ឡើងខ្ពស់នៅទូទាំងប្រទេស ។ ស្ថានភាពអាកាសធាតុក្តៅខ្លាំងបានកើតមាននៅតំបន់បាល់កង់ ពេលដែលសីតុណ្ហភាពកើនឡើងដល់ជាង ៤០អង្សាសេកាលពីថ្ងៃព្រហស្បតិ៍ គឺរលកកម្តៅមួយគេដាក់ឈ្មោះ "Cerberus" ជាឈ្មោះសត្វសុនខក្បាល ៣របស់ឋាននរគនៅក្នុងទេវកថាក្រិក ដែលបានវាយប្រហារនៅទូទាំងអឺរ៉ុប ។ នៅក្នុងប្រទេសក្រូអាត ក្រុមភ្នាក់ងារពន្លត់អគ្គិភ័យ ៥៦នាក់ ជាមួយនឹងរថយន្ត ២០គ្រឿង និងយន្តហោះ ៣គ្រឿង បានប្រឹងប្រែងទប់ស្កាត់ភ្លើងឆេះព្រៃដែលបានរីករាលដាលយ៉ាងឆាប់រហ័ស ដោយសារតែខ្យល់បក់ខ្លាំងមកពីទិសខាងត្បូង នៅជិតទីក្រុង Sibenik ជាប់សមុទ្រ Adriatic ។ ភូមិ Grebastica រងការឆាបឆេះទាំងស្រុងដោយសារភ្លើងឆេះព្រៃ ក្នុងនោះរថយន្ត និងផ្ទះសម្បែងប្រជាពលរដ្ឋ ត្រូវបានបំផ្លិចបំផ្លាញ ។ គេរំពឹងផងដែរថា សីតុណ្ហភាពនឹងបន្តនៅ ៤០អង្សាសេនៅទូទាំងតំបន់រហូតដល់សប្តាហ៍ក្រោយ ៕

បណ្ដាញសង្គម

ព័ត៌មានថ្មីៗ

បារាំងថ្កោលទោសការគំរាមប្រមុខអង្គការឃ្លាំមើលនុយក្លេអ៊ែរបស់ UN

BOT៖ សេដ្ឋកិច្ចថៃធ្លាក់ចុះ នៅខែឧសភា ដោយសារវិស័យទេសចរណ៍ និងផលិតកម្មគ្មានសន្ទុះ

មេទ័ពហ្ស៊កដានី និងសមភាគីអាមេរិក ពិភាក្សាគ្នា អំពីកិច្ចសហប្រតិបត្តិការយោធា នៅទីក្រុង Amman

ប្រព័ន្ធផ្សព្វផ្សាយ៖ ប្រធានចារកម្មរបស់ទួរគី ពិភាក្សាអំពីស្ថានភាពនៅតំបន់ហ្កាហ្សា ជាមួយគណៈប្រតិភូ ហាម៉ាស

រដ្ឋមន្ត្រីការបរទេសអាល្លឺម៉ង់ ធ្វើទស្សនកិច្ចនៅទីក្រុងគៀវ និងសន្យាបន្តគាំទ្រដល់អ៊ុយក្រែន

UN៖ជនភៀសខ្លួនស៊ូដង់ ប្រឈមមុខនឹងការស្រេកឃ្លានកាន់តែខ្លាំងឡើង ខណៈដែលការផ្តល់មូលនិធិកំពុងធ្លាក់ចុះ

ក្រុមការងារចុះមូលដ្ឋាន សិស្ស និស្សិត ពលរដ្ឋនាំគ្នាដាំដើមឈើតាមដងផ្លូវជាង ៥គីឡូម៉ែត្រក្នុងឃុំត្រពាំងព្រីង

រដ្ឋមន្ត្រីក្រសួងការងារចុះពិនិត្យស្ថានភាពពលករវិលមកពីថៃតាមច្រកប៉ៃលិន និងណែនាំពីឱកាសការងារ

អបអរសាទរ បងប្អូនពលករខ្មែរដែលទើបមកពីប្រទេសថៃចំនួន ១០៤នាក់ នៅខេត្តកំពង់ស្ពឺទទួលបានការងារធ្វើភ្លាមៗ

ប្រមុខការទូតបេឡារុសព្រមានអំពីផលប៉ះពាល់ដ៏មហន្តរាយនៃជម្លោះមជ្ឈិមបូព៌ា ទៅលើអឺរ៉ុប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877