BTV NEWS

នគរបាលនៅអាកាសយានដ្ឋានអន្តរជាតិភ្នំពេញ ឃាត់ខ្លួនជនបរទេសម្នាក់ ពាក់ព័ន្ធករណីដឹកជញ្ជូនកញ្ឆាក្រៀមឆ្លងដែនជិត ២០គីឡូក្រាម

ក្រុមក្មេងទំនើងជាង៤០នាក់ ត្រូវសមត្ថកិច្ចបញ្ជូនទៅពន្ធនាគារ អ្នកនាំពាក្យព្រមានថា "បើមិនកែ គឺគុក!"

នាយកដ្ឋានប្រឆាំងបទល្មើសបច្ចេកវិទ្យា បង្រ្កាបករណីឆបោកក្រោមរូបភាពទិញលក់ម៉ូតូតាមអនឡាញ

នគរបាលខណ្ឌកំបូលឃាត់ម៉ូតូ ១០គ្រឿង ករណីប្រេីប្រាស់សុីម៉ាំងបំពងសំឡេង

សន្តិសុខ និង សង្គម

ការសិក្សាបង្ហាញថា ជាងពាក់កណ្ដាលនៃបឹងធំៗរបស់ពិភពលោកកំពុងរីងហួត

អាមេរិក៖ ការសិក្សាមួយដែលបានផ្សព្វផ្សាយកាលពីថ្ងៃព្រសហ្បតិ៍ បានរកឃើញថា ជាងពាក់កណ្ដាលនៃបឹងធំៗនិងអាងស្តុកទឹករបស់ពិភពលោក បានរីងហួត ចាប់តាំងពីដើមទសវត្សរ៍ឆ្នាំ១៩៩០មក មូលហេតុសំខាន់គឺដោយសារ បម្រែបម្រួលអាកាសធាតុ ដែលនាំឲ្យមានក្ដីបារម្ភ ចេះតែកើនឡើងអំពីទឹក សម្រាប់ធ្វើកសិកម្ម វារីអគ្គិសនី និងតម្រូវការប្រើប្រាស់របស់មនុស្ស ។ អ្នកស្រាវជ្រាវអន្តរជាតិមួយក្រុម បានរាយការណ៍ថា ប្រភពទឹកសាបសំខាន់បំផុតជាច្រើនរបស់ពិភពលោក មកពីសមុទ្រ កាសព្យែន( Caspian Sea) រវាងតំបន់អឺរ៉ុប និងអាស៊ី រហូតទៅដល់បឹង Titicaca របស់អាមេរិកខាងត្បូង បានបាត់បង់ទឹកក្នុងអត្រាកើនឡើង ប្រហែល២២ជីហ្គាតោន ក្នុងមួយឆ្នាំរយៈពេលជិត៣ទសវត្សរ៍ ។ចំនួននេះប្រហែល១៧ ដងនៃបឹង Mead ដែលជាអាងស្តុកទឹកធំបំផុតរបស់សហរដ្ឋអាមេរិក។ លោក ហា្វង ហ្វាង យ៉ូវ (Fangfang Yao)ធារាសាស្ត្រវិទូ នៅសាកលវិទ្យាល័យ Virginiaសហរដ្ឋអាមេរិក ដែលបានដឹកនាំការសិក្សានេះ បានចេញផ្សាយនៅក្នុងទស្សនាវិទ្យាសាស្ត្រ ដោយនិយាយថា ៥៦% នៃការរីងហួតក្នុងបឹងធម្មជាតិ ត្រូវបានបង្កឡើងដោយបម្រែបម្រួលអាកាសធាតុ និងការប្រើប្រាស់របស់មនុស្ស ដោយព្រមានពីការរីងហួតកាន់តែធ្ងន់ធ្ងរថែមទៀត។ ក្រុមអ្នកវិទ្យាសាស្ត្របានវាយតម្លៃបឹងធំៗជិត ២.០០០កន្លែង ដោយប្រើការវាស់វែងពីផ្កាយរណប រួមជាមួយនឹងគំរូអាកាសធាតុ និងជលសាស្ត្រ៕

ការស្ទង់មតិ៖ ៦១% នៃពលរដ្ឋអាមេរិក និយាយថា បញ្ញាសិប្បនិមិត្ត គំរាមកំហែងដល់អនាគតរបស់មនុស្សជាតិ

អាមេរិក៖ យោងតាមការស្ទង់មតិរបស់សារព័ត៌មាន Reuters និងមជ្ឈមណ្ឌលស្រាវជ្រាវ Ipsos ដែលបានចេញផ្សាយកាលពីថ្ងៃពុធទី១៧ឧសភា ប្រជាពលរដ្ឋអាមេរិកភាគច្រើនជឿថា ការកើនឡើងផ្នែកបច្ចេកវិទ្យាបញ្ហាសិប្បនិមិត្តអាចបង្កគ្រោះថ្នាក់ដល់អនាគតរបស់មនុស្សជាតិ ។ ការស្ទង់មតិបានរកឃើញថា ជាង២ភាគ៣នៃអ្នកឆ្លើយតប គឺមានក្ដីកង្វល់ពីផលប៉ះពាល់ដែលអាចទប់ស្កាត់បាននៃបញ្ញាសិប្បនិមិត្តហៅកាត់ថា AI ខណៈចំនួន៦១% ចាត់ទុកបញ្ញាសិប្បនិមិត្តនេះ ថាជាការគំរាមកំហែងយ៉ាងធ្ងន់ធ្ងរដល់អរិយធម៌។ ការស្ទង់មតិតាមអនឡាញ ដែលបានធ្វើកាលពីថ្ងៃទី៩ខែឧសភា បានបង្ហាញពីមតិចំនួន៤,៤១៥នាក់នៃមនុស្សពេញវ័យសហរដ្ឋអាមេរិក។ ការស្ទង់មតិនេះមានវិធានការត្រឹមត្រូវមួយនៃការបូកឬដក២%។ លទ្ធផលស្ទង់មតិនេះកើតឡើងស្របពេលការពង្រីកនៃការប្រើប្រាស់ បញ្ញាសិប្បនិមិត្ត AI ទូទៅនៅក្នុងវិស័យអប់រំ កិច្ចការរដ្ឋាភិបាល ឱសថ និងអាជីវកម្ម បង្កឡើងដោយការកើនឡើងយ៉ាងខ្លាំងនៃ ChatGPT របស់ OpenAI ដែលត្រូវបានរាយការណ៍ថាជាកម្មវិធី software ដែលរីកចម្រើនលឿនបំផុតគ្រប់ពេលវេលា។ ភាពជោគជ័យរបស់កម្មវិធីនេះបានបង្កើតឲ្យមានការប្រណាំងប្រជែងផ្នែកបច្ចេកវិទ្យាក្នុងចំណោមក្រុមហ៊ុនបច្ចេកវិទ្យាខ្នាតយក្សដូចជា Microsoft និង Google ដែលចាំទទួលអត្ថប្រយោជន៍ពីការមានអ្វីដែលថ្មី និងគួរឱ្យភ្ញាក់ផ្អើលដើម្បីបង្កើនតម្លៃភាគហ៊ុនរបស់ពួកគេ៕

ខេត្តAlbertaរបស់កាណាដា គ្របដណ្តប់ដោយផ្សែង ខណៈការពន្លត់ចំហេះព្រៃនៅបន្ត

កាណាដា៖ ផ្សែងបានគ្របដណ្តប់ពេញផ្ទៃអាកាស លើខេត្ត Alberta ភាគច្រើនកាលពីថ្ងៃពុធ ខណៈក្រុមអ្នកពន្លត់អគ្គិភ័យមកពីប្រទេសកាណាដា និងសហរដ្ឋអាមេរិក បានព្យាយាមពន្លត់ភ្លើងឆេះព្រៃកំពុងរាលដាលខ្លាំង ដែលបានជំរុញឲ្យមានការជម្លៀសប្រជាជន បង្អាក់សេវាផ្លូវរថភ្លើង និងបិទការផលិតថាមពលនៅក្នុងខេត្តផលិតប្រេងដ៏ធំរបស់ប្រទេសកាណាដា។ ស្ថានភាពក្តៅស្ងួត បានបង្កឲ្យមានភាពធ្ងន់ធ្ងរ និងឆាប់ចាប់ផ្តើមរដូវចំហេះព្រៃក្នុងខេត្ត Alberta។ គិតត្រឹមថ្ងៃពុធ ព្រៃចំនួន៩១កន្លែង បានឆេះនៅក្នុងតំបន់ការពារព្រៃនៃខេត្ត Albrerta រួមទាំង២៧កន្លែងមិនអាចគ្រប់គ្រងបាន។ការចុះត្រជាក់នៅសប្តាហ៍នេះ បានបន្ធូរបន្ថយសីតុណ្ហភាពខ្ពស់ជាប្រវត្តិសាស្ត្រ និងបានជួយដល់ក្រុមអ្នកពន្លត់អគ្គិភ័យ ដែលបាននាំឲ្យអាជ្ញាធរដកចេញបទបញ្ជាជម្លៀសខ្លួនមួយចំនួនកាលពិថ្ងៃអង្គារ។ មន្ត្រីខេត្ត Alberta បាននិយាយនៅក្នុងសន្និសីទសារព័ត៌មានកាលពីថ្ងៃពុធថា ចំនួនអ្នកភៀសខ្លួន បានធ្លាក់ចុះដល់ប្រមាណ១២.០០០នាក់ ពីចំនួនខ្ពស់បំផុតជាង៣០.០០០នាក់កាលពីដើមខែនេះ។មន្ត្រីមន្ទីរសុវត្ថិភាពសាធារណៈខេត្ត Alberta លោក Mike Ellis បាននិយាយថា ទោះជាយ៉ាងណាកង្វះទឹកភ្លើង និងការព្យាករណ៍សីតុណ្ហភាពខ្ពស់សម្រាប់សប្តាហ៍បន្ទាប់នេះ ស្ថានភាពសម្រាប់ចំហេះព្រៃនៅតែគ្រោះថ្នាក់ខ្លាំង។លោកEllis និយាយថាវាច្បាស់ណាស់ថា ផ្សែងមកពីភ្លើងឆេះព្រៃទាំងនេះ បានបន្តជាការព្រួយបារម្ភសម្រាប់ទាំងសុខភាព និងការមិនអាចមើលឃើញឆ្ងាយ ដែលកំពុងជំរុញឲ្យប្រជាជននៅក្នុងតំបន់ជាច្រើនមានគុណភាពបរិយាកាសមិនល្អ ឲ្យស្នាក់នៅក្នុងលំនៅឋាន៕

ចំនួនអ្នកស្លាប់ដោយសារព្យុះស៊ីក្លូន ឡើងដល់ ២៩នាក់ នៅមីយ៉ាន់ម៉ា

មីយ៉ាន់ម៉ា៖ ចំនួនអ្នកស្លាប់ដោយសារព្យុះស៊ីក្លូន Mocha ដែលបានបោកបក់កាត់ឆកសមុទ្រ Bengal បានកើនឡើងកាលពីថ្ងៃចន្ទ (ទី១៥ ខែឧសភា) ខណៈដែលការប្រាស្រ័យទាក់ទងគ្នា ត្រូវបានស្តារឡើងវិញបណ្តើរៗទៅកាន់ភាគខាងលិចសហភាពមីយ៉ាន់ម៉ា ដោយមនុស្ស ២៩នាក់ ត្រូវបានរាយការណ៍ថា បានស្លាប់។ព្យុះស៊ីក្លូន Mocha បានបោកបក់ដល់ដីគោកនៅចន្លោះទីក្រុង Cox's Bazar ក្នុងប្រទេសបង់ក្លាដែស និងទីក្រុង Sittwe របស់មីយ៉ាន់ម៉ា ដែលមានកម្លាំងខ្យល់បក់បោះរហូតដល់១៩៥គីឡូម៉ែត្រ ក្នុងមួយម៉ោង ជាព្យុះដ៏ធំបំផុតមិនធ្លាប់មាន ដែលបានវាយប្រហារលើឆកសមុទ្រ Bengal ក្នុងរយៈពេលជាងមួយទសវត្សរ៍នេះ។រូបភាពវីដេអូពីតំបន់នោះ បានបង្ហាញទូកនេសាទឈើ ត្រូវបានបោកបក់ទៅជាបំណែក ហើយអណ្ដែតទៅគរនៅជិតច្រាំង។នៅមុននោះ របបយោធារបស់សហភាពមីយ៉ាន់ម៉ា បានឲ្យដឹង នៅក្នុងសេចក្តីថ្លែងការណ៍ ដោយមិនមានផ្ដល់ព័ត៌មានលម្អិតថា យ៉ាងហោចណាស់មនុស្ស ៥នាក់បានស្លាប់ នៅមីយ៉ាន់ម៉ា ហើយអ្នកស្រុកមួយចំនួន បានរងរបួស។ សេចក្ដីថ្លៃងការណ៍បន្ថែមថា លំនៅឋានជាង ៨៦០ខ្នង និងមន្ទីរពេទ្យ ឬគ្លីនិកចំនួន ១៤កន្លែង ត្រូវរងការខូចខាតនៅទូទាំងប្រទេស។យោងតាមអ្នកតាមដានព្យុះស៊ីក្លូននេះ កាលពីថ្ងៃចន្ទ បានឲ្យដឹងថា បណ្តាញទំនាក់ទំនងគ្នា នៅតែដំណើរការទៅបានដោយលំបាក ជាមួយទីក្រុង Sittwe របស់រដ្ឋរ៉ាឃីន ជាកន្លែងដែលមានប្រជាជនរស់នៅប្រហែល ១៥០.០០០នាក់ និងដែលបានទទួលរងនូវឥទ្ធិពលពីខ្យល់ព្យុះនេះ៕

មនុស្សយ៉ាងហោចណាស់៤នាក់បានស្លាប់ រួមទាំងជនសង្ស័យ ក្នុងការបាញ់ប្រហារនៅរដ្ឋញូវម៉ិកស៊ីកូ

អាមេរិក៖ នគរបាលនិយាយថា មនុស្សយ៉ាងហោចណាស់៤នាក់ រួមទាំងជនសង្ស័យ បានស្លាប់នៅក្នុងការបាញ់ប្រហារមួយកាលពីម្សិលមិញ នៅក្នុងរដ្ឋញូវម៉ិកស៊ីកូ ដែលបានជួបប្រទះយ៉ាងហោចណាស់ឧបទ្ទវហេតុកម្រធំៗចំនួន២លើកផ្សេងទៀតនៃអំពើហិង្សាដោយអាវុធបណ្តាលឲ្យមានមនុស្សស្លាប់ នៅក្នុងបណ្តាឆ្នាំថ្មីៗនេះ។ ការបាញ់ប្រហារចុងក្រោយនេះ បានកើតឡើងនៅក្នុងតំបន់លំនៅឋានពលរដ្ឋ ទីក្រុង Farmington ក្នុងរដ្ឋញូវម៉ិកស៊ីកូ មានចម្ងាយប្រមាណ ២៩០គីឡូម៉ែត្រ ភាគពាយព្យទីក្រុង Albuquerque ជាទីក្រុងធំបំផុតរបស់រដ្ឋនេះ ប៉ុន្តែព័ត៌មានលម្អិតបន្ថែមមួយចំនួនពីអាជ្ញាធរ អាចទទួលយកបានភ្លាមៗ។នាយកដ្ឋាននគរបាលទីក្រុង Farmington បាននិយាយថាមន្ត្រី២នាក់បានរងរបួស នៅក្នុងការបាញ់តបតគ្នាជាមួយជនសង្ស័យដែលត្រូវបានសម្លាប់នៅកន្លែងកើតហេតុ ហើយមានជនរងគ្រោះជាជនស៊ីវិល ច្រើនាក់ទៀត ដែលយ៉ាងហោចណាស់៣នាក់ក្នុងចំណោមអ្នកទាំងនេះបានស្លាប់។ នគរបាលនិយាយថា អ្នកបាញ់ប្រហារដែលពុំត្រូវបានកំណត់អត្តសញ្ញាណភ្លាមៗ ត្រូវបានគេជឿថាបានធ្វើសកម្មភាពតែម្នាក់ ឯង។ ពុំមានព័ត៌មានដែលត្រូវបានផ្តល់ឲ្យអំពីជនរងគ្រោះ៣នាក់ ដែលបានស្លាប់នោះទេ។ នគរបាលនិយាយថា មន្ត្រីអនុវត្តន៍ច្បាប់ បានបិទប្លុកចំនួន៧កន្លែងនៅជុំវិញកន្លែងកើតហេតុនៃការបាញ់ប្រហារ ជាតំបន់មានវិហារអ៊ីស្លាមចំនួន២កន្លែង៕

អាជ្ញាធរខណ្ឌ៧មករា បានបន្តចុះត្រួតពិនិត្យទីតាំងផ្សារស៊ីធីម៉ល សង្ស័យមានបង្កប់ ល្បែងស៊ីសងប្រភេទហ្គេមបាញ់ត្រី

ភ្នំពេញ៖ ក្រោយមានបណ្ដាញសង្គមមួយចំនួន បានយករូបចាស់ៗកាលពីឆ្នាំ២០២០ កន្លងទៅ មកបង្ហោះជាសាធារណៈថាទីតាំង ផ្សារស៊ីធីម៉ល មានបង្កប់ល្បែងស៊ីសងខុសច្បាប់ប្រភេទហ្គេមបាញ់ត្រី នៅខាងក្នុងដូច្នេះកម្លាំងគណៈបញ្ជាការឯកភាពខណ្ឌ ៧មករា បានចុះដល់ទីតាំង និងត្រួតពិនិត្យជាក់ស្ដែង ពុំមានដូចការចុះផ្សាយនោះឡើយ ឃើញតែប្រភេទហ្គេមកូនក្មេងលេងយករង្វាន់តុក្កតា និងហ្គេមក្មេងលេងធម្មតាប៉ុណ្ណោះ។សូមជម្រាបជូនថា ប្រតិបត្តិការចុះត្រួតពិនិត្យ ធ្វើឡើងនៅព្រឹកថ្ងៃទី១៥ ខែឧសភា ឆ្នាំ ២០២៣ មានការបញ្ជាពីលោក ថេង សុថុល អភិបាលនៃគណៈអភិបាលខណ្ឌ ៧មករា បានចាត់ឲ្យ លោក ណុប ផា អភិបាលរង ដឹកនាំកម្លាំង គណៈបញ្ជាការឯកភាពខណ្ឌចុះត្រួតពិនិត្យផ្ទាល់តែម្ដង នៅចំណុចទីតាំង ផ្សារទំនើបស៊ីធីម៉ល ស្ថិតនៅតាមបណ្ដោយផ្លូវលេខ២១៧ ភូមិ០៧ សង្កាត់វាលវង់ ខណ្ឌ៧មករា រាជធានីភ្នំពេញ តែពុំមានអ្វីពាក់ព័ន្ធបទល្មើសនិងល្បែងស៊ីសងឡើយ។នៅក្នុងការចុះត្រួតពិនិត្យនេះផងដែរអាជ្ញាធរ បានអប់រំណែនាំដល់ម្ចាស់គ្រប់គ្រងទីតាំង និងបានធ្វើការកិច្ចសន្យា ចំពោះមុខជាមួយសមត្ថកិច្ច ហាមមិនឱ្យមានបង្កប់ល្បែងស៊ីសងគ្រប់ប្រភេទនិងបទល្មើសផ្សេងៗដែលខុសច្បាប់ ការជួញដូរមនុស្ស និងសារធាតុញៀនជាដើម។ ក្នុងករណីមិនអនុវត្តតាមកិច្ចសន្យាអាជ្ញាធរ និងអនុវត្តតាមតិវិធីច្បាប់៕ អត្ថបទ៖ កុម្ភៈ

មនុស្ស ៣នាក់ស្លាប់ និងរាប់ពាន់នាក់ជម្លៀសខ្លួន បន្ទាប់ពីព្យុះស៊ីក្លូន វាយប្រហារមីយ៉ាន់ម៉ា និងបង់ក្លាដែស

មីយ៉ាន់ម៉ា៖ ខ្យល់ព្យុះដ៏មានឥទ្ធិពលមួយមេ បានបក់ចូលទៅកាន់ឆ្នេរសមុទ្រនៃប្រទេសបង់ក្លាដែស និងសហភាពមីយ៉ាន់ម៉ាកាលពីថ្ងៃអាទិត្យ ដែលបង្ខំឱ្យមានការជម្លៀសប្រជាជនរាប់សែននាក់ទៅកាន់ទីតាំងដែលមានសុវត្ថិភាព ដោយមនុស្សជាច្រើនចេញមកពីលំនៅឋានដ៏ទ្រុឌទ្រោមនៅតំបន់ទំនាប ខណៈតាមសេចក្ដីរាយការណ៍ពីសារព័ត៌មានក្នុងស្រុករបស់មីយ៉ាន់ម៉ា ឱ្យដឹងថា ក៏មានអ្នកស្លាប់យ៉ាងហោចណាស់ ៣នាក់ដែរ។ព្យុះស៊ីក្លូន Mocha ដែលមានកម្លាំងខ្យល់រហូតដល់ទៅ ២១០គីឡូម៉ែត្រ ក្នុងមួយម៉ោង អាចរុញឲ្យទឹកសមុទ្រកើនឡើងរហូតដល់ ១២ហ្វីត (៤ម៉ែត្រ) ដែលប៉ះពាល់ដល់មនុស្សជាង ២លាននាក់ដោយផ្ទាល់ នៅលើផ្លូវធ្វើដំណើររបស់ព្យុះនេះ ដែលភាគច្រើននៃមនុស្សរស់នៅក្នុងរដ្ឋ Rakhine និងរដ្ឋ Chin របស់ប្រទេសមីយ៉ាន់ម៉ា។មជ្ឈមណ្ឌលផ្កាយរណបរបស់អង្គការសហប្រជាជាតិ បានព្រមានថា ប៉ុន្តែមនុស្សជាច្រើនទៀតអាចរងផលប៉ះពាល់កាន់តែខ្លាំង នៅពេលព្យុះនេះ បក់បោកចេញពីឆកសមុទ្រ Bengal ចូលទៅដល់ដីគោក ។មន្ត្រីជួយផ្តល់ជំនួយគ្រោះមហន្តរាយ លោក Mijanur Rahman នៅប្រទេសជិតខាងបង់ក្លាដែស ដែលបានជម្លៀសមនុស្សប្រហែល ៣០០. ០០០នាក់ មុនពេលព្យុះនេះ ត្រូវបានគេរំពឹងថា នឹងបោកបក់ដល់ដីគោកនៅវេលាប្រហែលថ្ងៃត្រង់ បាននិយាយថា៖ «ការសង្គ្រោះជីវិតគឺជាអាទិភាពចម្បងរបស់យើង»។ព្យុះស៊ីក្លូនស្ថិតនៅក្នុងចំណោមគ្រោះមហន្តរាយធម្មជាតិ ដែលបង្កឲ្យមានការខូចខាតដ៏ធំបំផុត នៅក្នុងពិភពលោក ជាពិសេសប្រសិនបើព្យុះនេះបង្កប៉ះពាល់ដល់តំបន់ទំនាប និងតំបន់សមុទ្រ ដែលមានប្រជាជនរស់នៅយ៉ាងច្រើន នៅប្រទេសអាស៊ីខាងត្បូងមួយនេះ។ឆកសមុទ្រ Bengal ជាតំបន់ដែលរួមមានតំបន់ឆ្នេរសមុទ្រ ក្នុងប្រទេសបង់ក្លាដែស ឥណ្ឌា មីយ៉ាន់ម៉ា និងប្រទេសថៃនោះ ប្រឈមនឹងព្យុះស៊ីក្លូនមួយចំនួន ដែលសម្លាប់មនុស្សច្រើនបំផុតក្នុងពិភពលោក។លោក Roxy Mathew Koll អ្នកវិទ្យាសាស្ត្រផ្នែកអាកាសធាតុនៅវិទ្យាស្ថានឧតុនិយមត្រូពិចរបស់ឥណ្ឌា នៅទីក្រុង Pune បាននិយាយថា ព្យុះស៊ីក្លូននៅឆកសមុទ្រ Bengal កាន់តែមានកម្លាំងខ្លាំងឡើងៗយ៉ាងឆាប់រហ័ស មួយផ្នែកដោយសារតែបម្រែបម្រួលអាកាសធាតុ៕ឆកសមុទ្រ Bengal ជាតំបន់ដែលរួមមានតំបន់ឆ្នេរសមុទ្រ ក្នុងប្រទេសបង់ក្លាដែស ឥណ្ឌា មីយ៉ាន់ម៉ា និងប្រទេសថៃនោះ ប្រឈមនឹងព្យុះស៊ីក្លូនមួយចំនួន ដែលសម្លាប់មនុស្សច្រើនបំផុតក្នុងពិភពលោក។លោក Roxy Mathew Koll អ្នកវិទ្យាសាស្ត្រផ្នែកអាកាសធាតុនៅវិទ្យាស្ថានឧតុនិយមត្រូពិចរបស់ឥណ្ឌា នៅទីក្រុង Pune បាននិយាយថា ព្យុះស៊ីក្លូននៅឆកសមុទ្រ Bengal កាន់តែមានកម្លាំងខ្លាំងឡើងៗយ៉ាងឆាប់រហ័ស មួយផ្នែកដោយសារតែបម្រែបម្រួលអាកាសធាតុ៕

រុស្ស៊ីបដិសេធ ការរុលចូលដោយកងកម្លាំងអ៊ុក្រែនតាមបណ្តោយខ្សែត្រៀមជួរមុខ

រុស្ស៊ី៖ ក្រសួងការពារជាតិរុស្ស៊ី បានបដិសេធការរាយការណ៍នានាដោយប្រភពព័ត៌មានគាំទ្ររុស្ស៊ីដែលថា ទាហានអ៊ុយក្រែន បានរុលចូលទៅមុខលើខ្សែត្រៀមជួរមុខនៅខាងកើតប្រទេសអ៊ុយក្រែន។ លោក Yevgeny Prigozhin មេដឹកនាំក្រុមទាហានស៊ីឈ្នួលក្រុមហ៊ុន Wagner ដែលកំពុងប្រយុទ្ធនៅខាងភាគីរុស្ស៊ី បានចោទប្រកាន់កងទ័ពរុស្ស៊ីជាទៀងទាត់ថាបានបោះបង់ចោលទីតាំងជាច្រើននៅជុំវិញ ទីក្រុង Bakhmut។ អ្នកសរសេរប្លុកយោធារុស្ស៊ី បានរាយការណ៍ពីការរុលទៅមុខរបស់អ៊ុយក្រែន ឬសកម្មភាពកងទ័ពនៅក្នុងតំបន់ជាច្រើន កាលពីថ្ងៃព្រហស្បតិ៍។ប្រធានាធិបតីអ៊ុក្រែន បាននិយាយកាលពីដំបូងថា វាលឿនពេកក្នុងការចាប់ផ្តើមការវាយបក។ ប្រធានាធិបតី លោក Volodymyr Zelensky បាននិយាយនៅក្នុងបទសម្ភាសន៍មួយសម្រាប់ប្រព័ន្ធផ្សព្វផ្សាយសេវាសាធារណៈថា ជាមួយនឹងអ្វីដែលបានកើតឡើងរួចហើយ យើងអាចបន្តឆ្ពោះទៅមុខ ហើយលោកគិតថានឹងជោគជ័យ។ ប៉ុន្តែយើងបានបាត់បង់មនុស្សជាច្រើន។ លោកគិតថារឿងនេះពុំអាចទទួលយកបាននោះទេ ដូច្នេះយើងចាំបាច់ត្រូវរង់ចាំ យើងនៅតែត្រូវការពេលវេលាច្រើនជាងនេះបន្តិច។ការវាយប្រហារដែលត្រូវបានរំពឹងទុក មិនអាចរួញរានៅក្នុងសង្គ្រាមបានទេ ដោយរៀបចំផែនការសម្រាប់ខ្សែត្រៀមជួរមុខឡើងវិញ ដែលជាច្រើនខែមកនេះនៅតែពុំមានការផ្លាស់ប្តូរ។ វានឹងជាការសាកល្បងដ៏សំខាន់សម្រាប់អ៊ុយក្រែន ដែលអន្ទះសារចង់បង្ហាញថា អាវុធនឹងយុទ្ធោបករណ៍ ដែលខ្លួនបានទទួលពីប្រទេសលោកខាងលិច អាចផ្តល់លទ្ធផលក្នុងសមរភូមិដ៍សំខាន់ជាថ្មីម្តងទៀត។នៅក្នុងសេចក្តីថ្លែងការណ៍មួយ ក្រសួងការពារជាតិរុស្ស៊ី និយាយថា ការប្រកាសដោយបុគ្គលនៅលើ បណ្តាញ Telegram អំពីការរុលចូលទៅមុខនៅលើចំណុចជាច្រើននៅខ្សែត្រៀមជួរមុខ មិនស្របគ្នាចំពោះការពិតនោះទេ។ សេចក្តីថ្លែងការណ៍និយាយថា ស្ថានភាពទូទៅ ក្នុងតំបន់ប្រតិបត្តិការសឹកពិសេស កំពុងស្ថិតក្រោមការគ្រប់គ្រង។

ការឃុំឃាំងជនអន្តោប្រវេសន៍ នៅព្រំដែនអាមេរិក-ម៉ិកស៊ិក ឡើងដល់កំណត់ត្រាខ្ពស់បំផុត ខណៈដែលច្បាប់មាត្រាទី៤២ បញ្ចប់

អាមេរិក៖ សហរដ្ឋអាមេរិក បានលុបចោលច្បាប់រឹតបន្តឹងតាមព្រំដែន ដើម្បីទប់ស្កាត់ COVID-19 ដែលគេស្គាល់ថា ច្បាប់សុខភាពមាត្រាទី៤២ កាលពីយប់ថ្ងៃព្រហស្បតិ៍ (ទី១១ ខែឧសភា) ដែលជាចំណុចផ្លាស់ប្តូរដ៏សំខាន់មួយ ក្នុងការទាក់ទាញបាននូវជនអន្តោប្រវេសរាប់ម៉ឺននាក់ឆ្លងកាត់ព្រំដែនសហរដ្ឋអាមេរិក និងម៉ិកស៊ិក ដែលធ្វើឲ្យសហគមន៍មូលដ្ឋានមានភាពតានតឹង និងការបែកបាក់ខាងនយោបាយកាន់តែខ្លាំងឡើង។ចំនួនជនអន្តោប្រវេសន៍ ដែលត្រូវបានចាប់ខ្លួន ពេលឆ្លងដែនខុសច្បាប់ បានកើនឡើងក្នុងប៉ុន្មានសប្តាហ៍ថ្មីៗនេះ ដោយការចាប់បានប្រចាំថ្ងៃលើសពី ១០.០០០នាក់ កាលពីថ្ងៃចន្ទ និងថ្ងៃអង្គារ។ ទីក្រុងជាប់ព្រំដែនរបស់សហរដ្ឋអាមេរិក បានប្រឹងប្រែងយ៉ាងខ្លាំង ដើម្បីផ្ដល់ជម្រកដល់ជនចំណូលថ្មី និងផ្តល់ការដឹកជញ្ជូនទៅកាន់គោលដៅបន្ត។នៅខាងក្រោយនៃទិដ្ឋភាពដ៏ច្របូកច្របល់នេះ រដ្ឋបាលរបស់លោកប្រធានាធិបតីអាមេរិក Joe Biden កំពុងបង្កើនបុគ្គលិក និងមូលនិធិទៅកាន់ព្រំដែន ខណៈពេលដែលកំពុងអនុវត្តបទប្បញ្ញត្តិថ្មី ដែលនឹងបដិសេធការផ្តល់សិទ្ធិជ្រកកោនដល់ជនអន្តោប្រវេសន៍ភាគច្រើន ដែលឆ្លងកាត់ព្រំដែនដោយខុសច្បាប់។ វិធានការថ្មីនេះ នឹងចូលជាធរមាននៅពេលដែលច្បាប់សុខភាពមាត្រាទី៤២ បញ្ចប់រួមជាមួយនឹងគ្រាអាសន្នផ្នែកសុខភាពសាធារណៈនៃវីរុស COVID-19។រដ្ឋមន្ត្រីសន្តិសុខមាតុភូមិ លោក Alejandro Mayorkas បាននិយាយថា ច្បាប់ថ្មីនេះនឹងមានន័យថា មានផលវិបាកកាន់តែខ្លាំងជាងមុន សម្រាប់ជនអន្តោប្រវេសន៍ខុសច្បាប់ ប្រសិនបើត្រូវបានចាប់ខ្លួន អាចត្រូវនិរទេស និងហាមឃាត់ ក្នុងការចូលមកកាន់ទឹកដីអាមេរិករយៈពេល ៥ឆ្នាំ ប្រសិនបើពួកគេមិនមានលក្ខណៈគ្រប់គ្រាន់ ក្នុងការទទួលបានសិទ្ធិជ្រកកោនទេនោះ៕

អ្នកបើកបររថយន្តនៅរដ្ឋតិចសាស់ ត្រូវបានចោទប្រកាន់ពីបទមនុស្សឃាតបន្ទាប់ពីឧបត្តិហេតុនៅក្រុង Brownsville

អាមេរិក៖ យោងតាមនគរបាលបានឲ្យដឹងថា បុរសនៅរដ្ឋតិចសាស់ម្នាក់ ត្រូវបានចោទប្រកាន់ថាបានបុករះក្រុមអ្នកដំណើរថ្មើរជើងមួយក្រុមដោយរថយន្ត SUV របស់លោក នៅជិតទីជម្រកសម្រាប់អ្នកគ្មានទីស្នាក់អាស្រ័យនៅទីក្រុង Brownsville មានតែជនអន្តោប្រវេសន៍ ដែលលោកត្រូវបានចោទប្រកាន់៨ករណីពីបទមនុស្សឃាត។យោងតាមនគរបាលបានឲ្យដឹងថា អ្នកបើកបររថយន្ត ត្រូវបានគេកំណត់អត្តសញ្ញាណ ថាឈ្មោះ George Alvarez អាយុ៣៤ឆ្នាំ បានបើកបរក្នុងភ្លើងសញ្ញាពណ៌ក្រមហម ដែលបានបាត់បង់ការគ្រប់គ្រងរថយន្តរបស់ខ្លួននិងបានបើកបុកមនុស្ស១៨នាក់ ខណៈរថយន្ត SUV បានបញ្ឈប់នៅនៅផ្នែកម្ខាង។លោក Alvarez បានបង្ហាញខ្លួននៅតុលាការកាលពីថ្ងៃចន្ទ ជាមួយមេធាវីរបស់លោក។ ចៅក្រមបានបង្គាប់ឲ្យបង់ប្រាក់ធានា២សែនដុល្លារក្នុងមួយករណី។លោក Alvarez ត្រូវបានចោទប្រកាន់ ១០ករណី នៃការវាយប្រហារធ្ងន់ធ្ងរដោយអាវុធបណ្តាលឲ្យមានមនុស្សស្លាប់ច្រើន។ នគរបាលនិយាយថា លោកមានប្រវត្តិបទល្មើសព្រហ្មទណ្ឌច្រើនករណី។នគរបាល បានរាយការណ៍ថា អ្នកបើបរមានបំណងរត់គេចខ្លួនពីកន្លែងកើតហេតុ បន្ទាប់ពីបង្កឧបត្តិហេតុ ប៉ុន្តែត្រូវបានរារាំងដោយក្រុមអ្នកឃើញហេតុការណ៍ច្រើននាក់៕

បណ្ដាញសង្គម

ព័ត៌មានថ្មីៗ

ក្រសួងការងារ៖ អបអរសាទរពលករខ្មែរមកពីថៃចំនួន ៣៤នាក់ទទួលបានឱកាសការងារភ្លាមៗនៅក្នុងខេត្តកោះកុងក្រោយវិលមកកម្ពុជាវិញ

ជប៉ុននិយាយថា ការវាយប្រហាររបស់អាមេរិក បង្ហាញការប្តេជ្ញាចិត្តរបស់ពួកគេរារាំងអ៊ីរ៉ង់ពីការទទួលបានអាវុធនុយក្លេអ៊ែរ

សាលាបឋមសិក្សា១កន្លែង ស្ថិតក្នុងតំបន់ដាច់ស្រយ៉ាល ទទួលបានអគារសិក្សាថ្មីសម្រាប់សិស្សរៀនសូត្រ

រដ្ឋមន្រ្តីការពារជាតិអ៊ីរ៉ង់៖ នេះគ្មានអ្វីថ្មីនោះទេចំពោះការវាយប្រហាររបស់សហរដ្ឋអាមេរិក

សម្តេចកិត្តិព្រឹទ្ធបណ្ឌិត ឧបត្ថម្ភថវិកាមួយចំនួនដល់កញ្ញា ពេជ្រ ចរណៃ ដែលរងគ្រោះដោយអគ្គីភ័យឆេះទីតាំងបង្ហាត់គុនល្បុក្កតោ

អ្នករស់នៅជុំវិញមូលដ្ឋានទ័ព នៅអាមេរិក មានក្ដីបារម្ភ ចំពោះអ្វីដែលអាចកើតឡើងបន្ទាប់

រុស្ស៊ីអាចជា «មិត្ត» របស់អ៊ីរ៉ង់ ប៉ុន្តែទីក្រុងមូស្គូហាក់ដូចជាមិនផ្តល់ជំនួយច្រើនដល់ទីក្រុងតេអេរ៉ង់នោះទេ

មេបញ្ជាការកងស្វ័យការពារជើងគោកជប៉ុន ប្តេជ្ញាបន្តពង្រឹងពង្រីកទំនាក់ទំនង និងកិច្ចសហប្រតិបត្តិការកាន់តែល្អ រវាងកងទ័ពជើងគោកនៃប្រទេសទាំងពីរ

ស្ពានឈើប្រវែងជាង២០ម៉ែត្រត្រូវបានប្រជាសហគមន៍ជួសជុលកែលម្អដាក់ឱ្យប្រើប្រាស់ឡើងវិញ

លោក Zelensky លើកឡើងថា រុស្ស៊ីកំពុងរៀបចំប្រតិបត្តិការយោធាថ្មី នៅអឺរ៉ុប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877