BTV NEWS

នគរបាលនៅអាកាសយានដ្ឋានអន្តរជាតិភ្នំពេញ ឃាត់ខ្លួនជនបរទេសម្នាក់ ពាក់ព័ន្ធករណីដឹកជញ្ជូនកញ្ឆាក្រៀមឆ្លងដែនជិត ២០គីឡូក្រាម

ក្រុមក្មេងទំនើងជាង៤០នាក់ ត្រូវសមត្ថកិច្ចបញ្ជូនទៅពន្ធនាគារ អ្នកនាំពាក្យព្រមានថា "បើមិនកែ គឺគុក!"

នាយកដ្ឋានប្រឆាំងបទល្មើសបច្ចេកវិទ្យា បង្រ្កាបករណីឆបោកក្រោមរូបភាពទិញលក់ម៉ូតូតាមអនឡាញ

នគរបាលខណ្ឌកំបូលឃាត់ម៉ូតូ ១០គ្រឿង ករណីប្រេីប្រាស់សុីម៉ាំងបំពងសំឡេង

សន្តិសុខ និង សង្គម

នាយឧត្តមសេនីយ៍ សៅ សុខា ប្រាប់ដល់មេប៉េអ៊ឹមថ្មីខេត្តបាត់ដំបងត្រូវយកចិត្តទុកដាក់ដល់កូនចៅ និងបម្រើប្រជាពលរដ្ឋឲ្យបានល្អ

បាត់ដំបង៖ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានប្រាប់ដល់មេបញ្ជាការកងរាជអាវុធហត្ថទើបតែតែងតាំងថ្មីនៅខេត្តបាត់ដំបង ត្រូវតែយកចិត្តទុកដាក់ និងដោះស្រាយទុក្ខលំបាកដល់មន្ត្រីថ្នាក់ក្រោម, ត្រូវតែបម្រើផលប្រយោជន៍ដល់ប្រជាពលរដ្ឋឲ្យបានល្អ និងទាន់ពេលវេលា និងត្រូវគោរពតាមវិជ្ជាជីវៈកងរាជអាវុធហត្ថ ហើយប្រសិនបើការអនុវត្តការងារពុំបានល្អទេ នឹងត្រូវបញ្ចប់តួនាទីមុនអាណត្តិ ៥ឆ្នាំស្របទៅតាមច្បាប់ជាក់ជាមិនខាននោះឡើយ។ នៅក្នុងឱកាសអញ្ជើញជាអធិបតីក្នុងពិធីប្រកាសមុខតំណែង មេបញ្ជាការកងរាជអាវុធហត្ថខេត្តបាត់ដំបងកាលពីថ្ងៃទី២២ ខែធ្នូ ឆ្នាំ២០២២ នាយឧត្តមសេនីយ៍ សៅ សុខា បានលើកឡើងថា ក្នុងនាមជាមេបញ្ជាការមួយរូប គប្បីត្រូវយកចិត្តទុកដាក់នូវភារកិច្ចស្នូលដល់កូនចៅរបស់ខ្លួន ត្រូវធ្វើឲ្យអង្គភាពមានសណ្តាប់ធ្នាប់, កងទ័ពមានវិន័យល្អ, ផ្ទៃក្នុងមានសាមគ្គីឯកភាព, មានស្មារតីឆន្ទៈមនសិការ ស្មោះត្រង់ អង់អាចក្លាហាន ឧស្សាហ៍ព្យាយាម យល់ច្បាស់តួនាទីភារកិច្ច, គោរពច្បាប់វិន័យកងទ័ព ក្រមសីលធម៌វិជ្ជាជីវៈកងរាជអាវុធហត្ថ និងសហការសម្រេចភារកិច្ចជាដើម។ នាយឧត្តមសេនីយ៍ សៅ សុខា បានបន្ថែមទៀតថា ដើម្បីសម្រេចបាននូវតួនាទី ភារកិច្ចរបស់ខ្លួន ត្រូវក្តាប់ឲ្យជាប់នឹងអនុវត្តឲ្យបានម៉ឺងម៉ាត់នូវទិសស្លោកទាំង៤ ដូចជា៖ ១-ចំពោះប្រទេសជាតិត្រូវតែការពារ, ២-ចំពោះប្រជាត្រូវតែបម្រើ, ៣-ច្បាប់ត្រូវតែគោរព និងទី៤ បទល្មើសត្រូវតែបង្ក្រាប។ នាយឧត្តមសេនីយ៍បានសង្កត់ធ្ងន់ទៀតថា បុគ្គលិកគឺមានចំនួនដដែល ថវិកាក៏មានចំនួនដដែល ឱកាសគឺ ៥ឆ្នាំ បើធ្វើបានល្អ បន្ថែម ៥ឆ្នាំបន្ត ប៉ុន្តែរយៈពេល ២ឆ្នាំកន្លះនឹងត្រូវធ្វើការត្រួតពិនិត្យ-វាយតម្លៃ បើគ្មានការវិវឌ្ឍជឿនលឿនថ្មី តាមការចង្អុលបង្ហាញដូចដែលបានរៀបរាប់ខាងលើទេ ត្រូវធ្វើការពិនិត្យ-វាយតម្លៃ ដើម្បីផ្លាស់ប្តូរ រកអ្នកមានសមត្ថភាព និងលក្ខណៈសម្បត្តិ ដូចបានលើកឡើងខាងលើ។ ក្នុងការអនុវត្តតួនាទី ភារកិច្ច ត្រូវប្រកាន់ខ្ជាប់ការគោរពសិទ្ធិសេរីភាព សេចក្តីថ្លៃថ្នូររបស់មនុស្ស រីឯការអនុវត្តតួនាទី ភារកិច្ចផ្នែកនគរបាលយុត្តិធម៌ត្រូវយកចិត្តទុកដាក់លើផ្នែកនីតិវិធី។ជាមួយគ្នានោះដែរ នាយឧត្តមសេនីយ៍ សៅ សុខា ក៏បានអំពាវនាវដល់ប្រព័ន្ធផ្សព្វផ្សាយ ជួយតាមដានការអនុវត្តន៍តួនាទីភារកិច្ច ក៏ដូចជាវិន័យកងរាជអាវុធហត្ថផ្តល់នូវរាល់ព័ត៌មានពិត ដើម្បីចូលរួមកសាងកងរាជអាវុធហត្ថមួយឱ្យក្លាយទៅជាកម្លាំងរបស់ជាតិ ដែលបង្កើតឡើងដើម្បីបម្រើផលប្រយោជន៍របស់ប្រជាជន និងប្រទេសជាតិផងដែរ។ សូមបញ្ជាក់ថា ឧត្តមសេនីយ៍ត្រី មាស សុវណ្ណ ដែលជាមេបញ្ជាការកងរាជអាវុធហត្ថចាស់ ត្រូវបានផ្លាស់ប្តូរមុខតំណែងទៅជានាយកមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំរីករាយ ខណៈលោកឧត្តមសេនីយ៍ត្រី ហែម វុទ្ធី ជាមេបញ្ជាការកងរាជអាវុធហត្ថថ្មីនៅខេត្តបាត់ដំបង៕ អត្ថបទ៖ បាន ចក់

ជនសង្ស័យចំនួន០៣នាក់ ដែលធ្វើសកម្មភាពគាស់ផ្ទះពលរដ្ឋក្នុងពេលរាត្រីត្រូវនគរបាលប៉ុស្តិ៍ច្បារអំពៅទី២ ឃាត់ខ្លួន

ភ្នំពេញ៖ ជនសង្ស័យ០៣ នាក់ត្រូវបាននគរបាលប៉ុស្តិ៍ច្បារអំពៅទី២ ធ្វើការឃាត់ខ្លួនជាបន្តបន្ទាប់ បន្ទាប់ពីក្រុមជនសង្ស័យបានធ្វើសកម្មភាពគាស់ផ្ទះពលរដ្ឋលួចសម្ភារៈមានតម្លៃនៅក្នុងផ្ទះ រួចគេចខ្លួន។ហេតុការណ៍នេះកើតឡើងកាលពីវេលាម៉ោង០៤និង៣០នាទី ថ្ងៃទី ២១ ខែធ្នូ ឆ្នាំ២០២២ ចំណុចផ្ទះជួលគ្មានលេខ ផ្លូវ ៣៥៧ ភូមិ កណ្តាល១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។សមត្ថកិច្ចបានឲ្យដឹងថាជនសង្ស័យដែលសមត្ថកិច្ចឃាត់ខ្លួនមាន ទី១ ឈ្មោះ សុខ ថៃ ភេទ ប្រុស អាយុ ២៨ឆ្នាំ ជនជាតិ ខ្មែរ មុខរបរ មិនពិតប្រាកដ។ ទី២ ឈ្មោះ ចាន់ សីហា ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ។ ជនសង្ស័យទាំង៣នាក់ មានមុខរបរ និង ស្នាក់នៅមិនពិតប្រាកដ។ និងទី៣ ឈ្មោះ កូវ ឌី ភេទប្រុស ៣៤ឆ្នាំ ជនជាតិ ខ្មែរ មុខរបរ មិនពិតប្រាកដ។លោកវរសេនីយ៍ត្រី អ៊ុ រតនា នាយប៉ុស្តិ៍នគរបាលច្បារអំពៅ២ បានឲ្យដឹងថា មុនពេលកើតហេតុជនរងគ្រោះបានចាក់សោទ្វារផ្ទះកើតហេតុត្រឹមត្រូវ រួចទៅដេកនៅផ្ទះម្តាយនៅសង្កាត់ និរោធ ស្រាប់តែមានជនសង្ស័យ ០៣នាក់ ជិះម៉ូតូម៉ាកហុងដាវ៉េវ ពណ៌ខ្មៅ ស្លាកលេខ ភ្នំពេញ ១V-៤៩៨៦ មកឈប់ក្បែរផ្ទះជួលជនរងគ្រោះ រួចនាំគ្នាយកដែកកែច្នៃចុងស្រួចឆ្កឹះសោទ្វារផ្ទះឲ្យរបើកចូល លួចយកទ្រព្យសម្បត្តិរួមមាន ៖ ម៉ូតូ ០១គ្រឿង ម៉ាកហុងដាស្កូបពី ពណ៌ស មិនចាំផ្លាកលេខ, ទូរទស្សន៍ ០១គ្រឿង និង កៅអីដែកបត់ចំនួន១០ ហើយជនសង្ស័យទាំង ៣នាក់រត់គេចខ្លួនបាត់។ ចំណែកម៉ូតូជនសង្ស័យបាន យកទៅលក់ឲ្យគេបានប្រាក់ ២០០ដុល្លារ ចែកគ្នាទិញ សារធាតុញៀន ដើម្បីប្រើប្រាស់ និង លេងហ្គេម Online អស់។លោកនាយប៉ុស្តិ៍នគរបាល បានបន្តឲ្យដឹងថាដោយអនុវត្តន៍តាមបទបញ្ជាពីលោក វរះសេនីយឯក ម៉ៅ សឿត អធិការនគរបាលខណ្ឌច្បារអំពៅ ដូច្នេះហើយកម្លាំងសមត្ថកិច្ចប៉ុស្តិ៍សហការជាមួយសមត្ថកិច្ចជំនាញខណ្ឌ បានបើកការស្រាវជ្រាវ រហូតមកដល់ម៉ោង ២២និង៣០នាទីយប់ ថ្ងៃទី ២២ ខែធ្នូ ឆ្នាំ២០២២ នគរបាលបានឃាត់ខ្លួនជនសង្ស័យ ០២នាក់ ឈ្មោះ សុខ ថៃ និងឈ្មោះ ចាន់ សីហា រួមនិងវត្ថុតាងម៉ូតូ ០១គ្រឿង ម៉ាកហុងដាវ៉េវ (ជិះធ្វើសកម្មភាព), ទូរទស្សន៍ ០១គ្រឿង និងកៅអីដែក០១ លុះដល់ព្រឹកថ្ងៃទី២៣ ខែធ្នូ ឆ្នាំ២០២២ នេះកម្លាំងជំនាញបានបន្ត បក្សពួកជនសង្ស័យម្នាក់ទៀតឈ្មោះ កូវ ឌី ហៅ ឌី នៅចំណុចការដ្ឋានសំណង់ មួយកន្លែង ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ និង បានបញ្ជូនមកអធិការដ្ឋាននគរបាលខណ្ឌច្បារអំពៅ យកមកសួរនាំ។បច្ចុប្បន្នជនសង្ស័យទាំង០៣នាក់ រួមនិងវត្ថុតាង ត្រូវបានកម្លាំងសមត្ថកិច្ច ឃាត់ខ្លួនបណ្តោះអាសន្ននៅអធិការខណ្ឌច្បារអំពៅ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕ អត្ថបទ៖ កុម្ភះ

ជនសង្ស័យដែលធ្វើសកម្មភាពប្លន់នៅភ្នំពេញយ៉ាងសកម្មចំនួន ៩នាក់ ត្រូវបញ្ជូនទៅតុលាការ

ភ្នំពេញ៖ ដោយមានការចង្អុលបង្ហាញពីឧត្តមសេនីយ៍ឯក ង៉េង ជួរ ប្រធាននាយកដ្ឋានព្រហ្មទណ្ឌ នៃក្រសួងមហាផ្ទៃ បានចាត់ឲ្យលោកឧត្តមសេនីយ៍ទោ ជាវ វិបុល អនុប្រធាននាយកដ្ឋានព្រហ្មទណ្ឌ នៃក្រសួងមហាផ្ទៃ សហការជាមួយនឹងការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ និងអាជ្ញាធរមូលដ្ឋានខណ្ឌចុះស្រាវជ្រាវកំណត់មុខសញ្ញារហូតឈានដល់ការឃាត់ខ្លួនជនសង្ស័យចំនួន ០៩នាក់ជាបន្តបន្ទាប់ ក្នុងរយៈពេល២ថ្ងៃ គឺនៅថ្ងៃទី២០ និងទី២១ ខែធ្នូ ឆ្នាំ២០២២ នៅមូលដ្ឋានខណ្ឌពោធិ៍សែនជ័យ និងខណ្ឌកំបូល។តាមប្រភពព័ត៌មានពីមន្ត្រីជំនាញបានឲ្យដឹងថា ក្រុមជនសង្ស័យមានគ្នាប្រមាណជាង ១០នាក់ បានធ្វើសកម្មភាពយ៉ាងសកម្មក្នុងភូមិសាស្ត្ររាជធានីភ្នំពេញ នៅមូលដ្ឋានជាយៗរាជធានី ជាពិសេសក្នុងខ ណ្ឌពោធិ៍សែនជ័យ និងខណ្ឌកំបូល ដោយបានធ្វើសកម្មភាពប្លន់ម៉ូតូពីជនរងគ្រោះបានសម្រេចជាច្រើ នករណី។ ក្រោយមានពាក្យបណ្ដឹងពីពលរដ្ឋ នគរបាលជំនាញបានចុះស៊ើបអង្កេតស្រាវជ្រាវ រហូតឈានដល់កំណត់មុខសញ្ញាបាន និងបានឃាត់ខ្លួនក្រុមជនសង្ស័យជាបន្តបន្ទាប់ និងដកហូតសម្ភារៈមួយចំនួនរួមមាន ម៉ូតូ ៣ គ្រឿង និងកាំភ្លើងខ្លីមួយដើមប្រភេទ K-59។មន្ត្រីជំនាញបានឲ្យដឹងបន្តថា ក្រោយឃាត់ខ្លួនជនសង្ស័យទាំងនេះ មានពលរដ្ឋជាច្រើនបានសាទរ និ ងសប្បាយចិត្តព្រោះកន្លងមកមានការភ័យខ្លាច ចំពោះក្រុមជនសង្ស័យទាំងនេះ ដែលបង្កការភ័យខ្លាច អសន្តិសុខ សណ្ដាប់ធ្នាប់នៅក្នុងមូលដ្ឋាន ជាពិសេសចំពោះកូនៗរបស់ប្រជាពលរដ្ឋដែលធ្វើការនៅពេលយប់ ហើយត្រឡប់មកផ្ទះវិញ ត្រូវប្រឈមនឹងក្រុមជនសង្ស័យទាំងនេះ។តាមចម្លើយរបស់ជនសង្ស័យ បានសារភាពថា ពួកគេពិតជាបានធ្វើសកម្មភាពប្លន់ដោយជិះម៉ូតូ ៣ គ្រឿង និងប្រើអាវុធខ្លីមួយដើមប្រភេទ K-59 ជាមធ្យោបាយធ្វើសកម្មភាព ដោយនៅក្នុងភូមិសាស្ត្រខណ្ឌកំបូលប្លន់បាន ០៣ករណី និងខណ្ឌពោធិ៍សែនជ័យបាន ០១ករណី។ក្រោយប្រតិបត្តិការ នគរបាលបានកសាងសំណុំរឿងបញ្ជូនជនសង្ស័យទាំងនេះទៅអយ្យការអមសា លាដំបូងរាជធានីភ្នំពេញ៕អត្ថបទ៖ កុម្ភៈ

សមត្ថកិច្ចបញ្ជូនជនសង្ស័យ១០នាក់ និងសារធាតុញៀនជាង ១តោន ទៅសាលាដំបូងខេត្តព្រះសីហនុ

ព្រះសីហនុ៖ កម្លាំងការិយាល័យប្រឆាំងគ្រឿងញៀនកងរាជអាវុធហត្ថខេត្តព្រះសីហនុ នៅថ្ងៃទី២១ ខែធ្នូឆ្នាំ២០២២ បានបញ្ជូនជនសង្ស័យ ១០នាក់ និងសារធាតុញៀនជាង ១តោន ទៅសាលាដំបូងខេត្តព្រះសីហនុ ចាត់ការតាមនីតិវិធី។ប្រភពព័ត៌មាន បានឱ្យដឹងថា ប្រតិបត្ដិការតាមចាប់ជនសង្ស័យពាក់ព័ន្ធករណីរក្សាទុក ដឹកជញ្ជូន និងជួញដូរដោយខុសច្បាប់ នូវសារធាតុញៀន និងសម្អាតប្រាក់ដែលជាផលបានមកពីបទល្មើស នៅឃ្លាំងជួលមួយកន្លែង នៅក្រុម៩ ស្ថិតក្នុងភូមិ២ សង្កាត់លេខ១ ក្រុង-ខេត្តព្រះសីហនុ កាលពីថ្ងៃទី១១ ខែធ្នូ ឆ្នាំ២០២២ រហូតដល់ថ្ងៃទី១៩ខែធ្នូ ឆ្នាំ២០២២ សមត្ថកិច្ចជំនាញបានស្រាវជ្រាវ រហូតឈានដល់ការ ឃាត់ខ្លួនជនសង្ស័យ ចំនួន១០នាក់ ក្នុងនោះមានជនជាតិខ្មែរចំនួន ២នាក់ និងជនជាតិចិនចំនួន ៨នាក់ និងសារធាតុញៀនសរុបចំនួន ១.១៣៣គីឡូ ៧៨៩,១១ក្រាម ព្រមទាំងសម្ភារមួយចំនួនផងដែរ។សូមរម្លឹកផងដែរថា ករណីនេះ កាលពីថ្ងៃទី១៤ ខែធ្នូ ឆ្នាំ២០២២ ក្នុងពិធីសម្ពោធដាក់ឱ្យប្រើប្រាស់អគារសិក្សា និងសមិទ្ធផលនានាជាច្រើនក្នុងស្រុកបវេល ខេត្តបាត់ដំបង សម្ដេចក្រឡាហោម ស ខេង បានថ្លែងពីប្រតិបត្តិការបង្ក្រាបករណីគ្រឿងញៀននេះផងដែរ ដោយសមត្ថកិច្ចកម្ពុជាបានប្រទះឃើញកប៉ាល់មួយគ្រឿងនៅដែនសមុទ្រកម្ពុជា ពេលនោះ សមត្ថកិច្ចបានសាកសួរ តែគេបានប្រាប់ថា ជាកប៉ាល់ដឹកបារី ដោយមានការសង្ស័យសមត្ថកិច្ចបានឃាត់ឆែកឆេរ រហូតមានការស្រាវជ្រាវ និងឃាត់កប៉ាល់នោះ ទើបគ្រឿងញៀនទាំងនេះនៅជាប់គាំង និងឃាត់មនុស្សជាបន្តបន្ទាប់។ បច្ចុប្បន្នកងរាជអាវុធហត្ថខេត្តព្រះសីហនុ បានបានបញ្ជូនជនសង្ស័យទាំង១០នាក់ ទៅសាលាដំបូងខេត្តព្រះសីហនុហើយ៕

អាជ្ញាធរខណ្ឌសែនសុខ ចុះណែនាំ និងផាកពិន័យដល់អាជីវករលក់គ្រឿងសមុទ្រ បង្ហូរទឹកស្អុយមកលើផ្លូវសាធារណៈ

ភ្នំពេញ៖ ក្រោយមានការស្នើសុំ និងសំណូមពររបស់ពលរដ្ឋ ដល់ក្រុមអាជីវករលក់ដូរគ្រឿងសមុទ្រនៅតំបន់ត្រឡោកបែក ដែលបានបង្ហូរទឹកកខ្វក់ពីកាកសំណល់គ្រឿងសមុទ្រលើដងផ្លូវសាធារណៈជះក្លិនស្អុយ បង្កប៉ះពាល់ដល់ពលរដ្ឋអ្នកធ្វើដំណើរតាមដងផ្លូវ នៅព្រឹកថ្ងៃទី២១ ខែធ្នូ ឆ្នាំ២០២២ អាជ្ញាធរខណ្ឌសែនសុខ បានចុះណែនាំដល់ក្រុមអាជីវករទាំងនោះឱ្យបញ្ឈប់សកម្មភាពចាក់ទឹកកខ្វក់តាមដងផ្លូវយ៉ាងដូច្នេះបន្ដទៀត។លោក សាំង សុភៈវិចិត្រ អភិបាលរង នៃគណៈអភិបាលខណ្ឌសែនសុខ បានដឹកនាំក្រុមការងាររដ្ឋបាលខណ្ឌ និងសណ្ដាប់ធ្នាប់ខណ្ឌ ចុះរៀបចំសណ្ដាប់ធ្នាប់ ណែនាំ និងធ្វើការផាកពិន័យដល់អាជីវករលក់គ្រឿងសមុទ្រដែលបង្ហូរទឹកស្អុយមកលើចិញ្ចើម និងផ្លូវសាធារណៈ។ ទីតាំងលក់គ្រឿងសមុទ្រនេះ ស្ថិតនៅតាមបណ្ដោយផ្លូវលេខ៥៩៨ តំបន់ត្រឡប់បែក ដែលតំបន់នេះ ជាប់ព្រំប្រទល់ជាមួយនឹងខណ្ឌទួលគោក និងខណ្ឌសែនសុខ ក៏ប៉ុន្តែទីតាំងលក់ស្ថិតនៅក្នុង ភូមិសេប៉សេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។គួរបញ្ជាក់ផងដែរ ពលរដ្ឋដែលធ្វើដំណើរឆ្លងកាត់តំបន់ត្រឡោកបែក លក់គ្រឿងសមុទ្រនេះបានលើកឡើងថា ក្រុមអាជីវករលក់ដូរគ្រឿងសមុទ្របានចាក់ទឹកកាកសំណល់និងទឹកកខ្វក់ពីគ្រឿងសមុទ្រមកលើដងផ្លូវសាធារណៈ បានបង្កក្លិន និងផលប៉ះពាល់ដល់ពលរដ្ឋអ្នកធ្វើដំណើរឆ្លងកាត់តំបន់នេះយ៉ាងខ្លាំង៕អត្ថបទ៖ កុម្ភៈ

អគ្គិភ័យឆាបឆេះផ្ទះពលរដ្ឋមួយល្វែង នៅសង្កាត់ព្រែកលាប ខណ្ឌជ្រោយចង្វា

ភ្នំពេញ៖ អគ្គិភ័យបានឆាបឆេះផ្ទះពលរដ្ឋមួយល្វែងនៅបុរីប៉េងហួត ព្រែកលាបបណ្ដាលឱ្យខូចខាតសម្ភារៈអស់មួយចំនួនធំ តែសំណាងល្អមិនបណ្ដោយមានមនុស្សរងរបួសឡើយ។ហេតុការណ៍មួយនេះកើតឡើងនៅវេលាម៉ោង២ និង៥០នាទីរំលងអាធាត្រុឈានចូលថ្ងៃទី២១ ខែធ្នូ ឆ្នាំ២០២២ នៅត្រង់ចំណុចបុរី ប៉េងហួត ព្រែកលាបផ្ទះលេខ ២៥ តាមបណ្តោយផ្លូវជាតិលេខ៦ ក្នុងសង្កាត់ព្រែកលាប ខណ្ឌជ្រោយចង្វា រាជធានីភ្នំពេញ។ យោងតាមប្រភពពីម្ចាស់ផ្ទះបានអោយដឹងថានៅ មុនកើតហេតុស្រ្តីម្ចាស់ផ្ទះបានឃើញ មានផ្សែងហុយខ្មួរខ្មាញ់ពេញក្នុងផ្ទះ និងអណ្តាតភ្លើងយ៉ាងសន្ធោសន្ធៅ ធ្វើអោយភ្ញាក់ផ្អើលដល់ប្រជាពលរដ្ឋ និងសន្តិសុខយាមបុរី នាំគ្នារត់ទៅយកបំពង់ពន្លត់អគ្គិភ័យយកមកបាញ់ទប់ស្កាត់អស់ចំនួន៦ បំពង់នៅតែមិនអាចគ្រប់គ្រងស្ថានភាពអណ្តាតភ្លើងខ្លាំងឡើង ភ្លាមៗនោះស្ត្រីជាម្ចាស់ផ្ទះបានទាក់ទងទៅសមត្ថកិច្ចមូលដ្ឋានអោយចុះមកត្រួតពិនិត្យ រួចរាយការណ៍បន្តទៅការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ អោយចេញរថយន្តមកទីតាំងកើតហេតុធ្វើការអន្តរាគម៍។ ក្នុងប្រតិបត្តិការនេះប្រើប្រាស់រថយន្តពន្លត់អគ្គិភ័យអស់ចំនួន ១១ គ្រឿងទើបធ្វើការពន្លត់រលត់ជាស្ថាពរ ក្នុងនោះរួមមានរថយន្តពន្លត់អគ្គិភ័យរបស់ ការិយាល័យបង្ការពន្លត់អគ្គិភ័យស្នងការរាជធានីភ្នំពេញចំនួន៨ ឡាន និងរថយន្តពន្លត់អគ្គិភ័យរបស់ ក្រុមហ៊ុន(OCIC)ទីក្រុងជ្រោយចង្វា ចំនួន៣ ឡានផងដែរ។ ខូចខាតសម្ភារៈប្រើប្រាស់ក្នុងផ្ទះអស់មួយចំនួនធំ។ ចំពោះមូលហេតុសមត្ថកិច្ចសន្និដ្ឋានជំហានដំបូងអាចបណ្ដាលមកពីឆ្លងចរន្តអគ្គិសនី៕ អត្ថបទ៖ កុម្ភៈ

ព័ត៌មានបឋម! មេតុទិណអនឡាញ ត្រូវបានកម្លាំងរាជអាវុធហត្ថចុះឃាត់ខ្លួន

ភ្នំពេញ ៖ មេតុងទីនអនឡាញ ដ៏ល្បីល្បាញ អ្នកនាង អឿន ម៉ូលីកា ត្រូវបានកម្លាំងកងរាជអាវុធហត្ថរាជធានីភ្នំពេញ ចុះឃាត់ខ្លួននៅវេលាម៉ោង ១៥និង២៥នាទី ថ្ងៃទី១៤ ខែធ្នូ ឆ្នាំ២០២២ តាមដីកាបញ្ជាឱ្យចូលខ្លួន របស់ឯកឧត្ដម ច្រឹង ខ្មៅ ព្រះរាជអាជ្ញានៃអយ្យកាអមសាលាដំបូងរាជធានីភ្នំពេញ លេខ ៥៦៣ អ.យ.ក ចុះថ្ងៃទី១២ ខែធ្នូ ឆ្នាំ២០២២ ពាក់ព័ន្ធករណីមិនបំពេញកាតព្វកិច្ចចំពោះឧបករណ៍ដែលអាចជួញដូរបាន៕

អាវុធហត្ថខេត្តព្រះសីហនុបង្ក្រាបករណីជួញដូរគ្រឿងញៀនជិត៩០០គីឡូក្រាម

ព្រះសីហនុ៖ កម្លាំងកងរាជអវុធហត្ថខេត្តព្រះសីហនុ បានបេីកប្រតិបត្តិការបង្ក្រាបករណីជួញដូរគ្រឿងញៀនទ្រង់ទ្រាយធំមានទម្ងន់ជិត ៩០០គីឡូក្រាម។ ការបង្ក្រាបនេះ បានធ្វេីឡេីងកាលពីរសៀលថ្ងៃទី១១ ខែធ្នូ ឆ្នាំ២០២២នេះ នៅចំណុចឃ្លាំងជួលមួយកន្លែង ស្ថិតនៅក្រុម៩ ភូមិ២ សង្កាត់លេខ១ ក្រុងព្រះសីហន។ មេបញ្ជាការកងរាជអាវុធហត្ថខេត្តព្រះសីហនុ លោកឧត្ដមសេនីយ៍ត្រី ហេង ប៊ុនទី បានឲ្យដឹងថា ប្រតិបត្តិការនៃការចុះបង្ក្រាបករណីជួញដូរគ្រឿងញៀនដ៏ធំនេះ ធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេស និងឯកឧត្តម គួច ចំរើន អភិបាលខេត្តព្រះសីហនុ ក្រោមការសម្របសម្រួលនីតិវិធី ពីលោក ចន្ទ ដារិទ្ធ ព្រះរាជអាជ្ញារង អយ្យការអមសាលាដំបូងខេត្តព្រះសីហនុ បានបើកការស្រាវជ្រាវ រហូតឈានទៅដល់ការបង្ក្រាបករណីជួញដូរគ្រឿងញៀន រកឃើញគ្រឿងញៀនជិត៩០០គីឡូក្រាម ដោយវត្ថុតាងទាំងនោះ ត្រូវបានយកមករក្យាទុកនៅបញ្ជាការដ្ឋានកងរាជអាវុធហត្ថខេត្តព្រះសីហនុ ដើម្បីបន្តនីតិវិធី។លោកបញ្ជាក់ថា ចំពោះក្រុមជនសង្ស័យកម្លាំង មន្ទីរជំនាញបានពន្លាតដែនដីសមត្ថកិច្ចទៅតាមរាជធានី-ខេត្ត ដើម្បីស្វែងរកមុខសញ្ញាពាក់ព័ន្ធ តាមជំនាញ ដោយប្រើពេលសហការជាមួយសមត្ថកិច្ចដែនដីពាក់ព័ន្ធ៕

សំណុំរឿងគ្រោះថ្នាក់ចរាចរណ៍នៅស្ពានជ្រោយចង្វារស្លាប់ទារកម្នាក់ត្រូវបានបញ្ជូនទៅដល់តុលាការ

ភ្នំពេញ៖ នៅព្រឹកថ្ងៃទី១២ ខែធ្នូ ឆ្នាំ២០២២ លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញបានឲ្យដឹងថា សំណុំរឿងពាក់ព័ន្ធករណីគ្រោះថ្នាក់ចរាចរណ៍នៅលើស្ពានជ្រោយចង្វារ បានបញ្ជូនមកដល់អយ្យការហេីយ តំណាងអយ្យការបាន និងកំពុងស៊េីបអង្កេតលេីករណីនេះរួចហេីយ ។គួរបញ្ជាក់ផងដែរ កាលពីវេលាម៉ោង២រំលងអាធ្រាតឈានចូលថ្ងៃទី ០៥ ខែធ្នូ ឆ្នាំ២០២២ នៅចំណុចលើស្ពានអាកាសជ្រោយចង្វារ (មិត្តភាពកម្ពុជា-ជប៉ុន) ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ មានករណី គ្រោះថ្នាក់ចរាចរណ៍ដែលបង្កឡើងដោយបុរសម្នាក់ បើកបររថយន្តម៉ាកលុចស៊ីស nx200t ពាក់ស្លាកលេខភ្នំពេញ 2BB-9989 បានបុកពីក្រោយម៉ូតូមួយគ្រឿងម៉ាកហុងដា ស្កូបពី ពណ៌ស ពាក់ស្លាកលេខ កណ្ដាល 1B-9978 បណ្ដាលឱ្យមនុស្សបីនាក់រងរបួសធ្ងន់ ក្នុងនោះមានទារកទើបអាយុ៦០ថ្ងៃម្នាក់។ បន្ទាប់ពីកើតហេតុម្ចាស់រថយន្តបានព្យាយាមបើករថយន្តគេចចេញពីកន្លែងកើតហេតុ រហូតត្រូវបានកម្លាំងសមត្ថកិច្ចដេញឃាត់បាន។ក្នុងករណីនេះផងដែរ ដោយមានភាគីរងគ្រោះមានទារកអាយុទើបតែ ៦០ថ្ងៃរងរបួសធ្ងន់ ដែលទើបទទួលមរណភាពកាលពីយប់ថ្ងៃទី ១២ ខែធ្នូ ឆ្នាំ ២០២២នេះផង ។ ចំណែកម្ដាយទារកកំពុងសម្រាកព្យាបាលនៅមន្ទីរពេទ្យ និងបុរសម្នាក់ទៀតដែលជិះម៉ូតូឌុប ម្ដាយ-កូន ក៏កំពុងសម្រាកនៅមន្ទីរពេទ្យផងដែរ៕(អត្ថបទ៖ កុម្ភៈ)

កម្លាំងសមត្ថកិច្ច ចុះរៀបចំផ្លូវខាងជើងជាប់របងវត្តសន្សំកុសលនាព្រឹកនេះ ក្រោយមានការរិះគន់ពីពលរដ្ឋធ្វើដំណើរ

ភ្នំពេញ៖ ក្រោយមានការរះគន់ និងមានការស្នើពីពលរដ្ឋអ្នកដំណើរអោយអាជ្ញាធរចុះរៀបចំសណ្តាប់ធ្នាប់លើដងផ្លូវខាងជើងជាប់របងវត្តសន្សំកុសលរួចមក នៅវេលាព្រឹកថ្ងៃទី០៩ខែធ្នូ ឆ្នាំ២០២២នេះ កម្លាំងនគរបាលសណ្តាប់ធ្នាប់ នៃអធិការដ្ឋាននគរបាលខណ្ឌមានជ័យ ដឹកនាំដោយលោកវរសេនីយ៍កែវ ម៉ីឧត្តម និងលោកវរសេនីយ៍ ជឹម សុភ័ក្ត្រ អធិការរងទទួលជំនាញ សណ្តាប់ធ្នាប់ និងចរាចរណ៍ បានចុះរៀបចំសណ្តាប់ធ្នាប់នៅទីតាំងខាងលើ អោយមានរបៀបរៀបរយ ជៀសវៀងការបង្កផលប៉ះពាល់ធ្ងន់ធ្ងរបន្ត ដល់លំហូរចរាចរណ៍ របស់ពលរដ្ឋ អ្នកដំណើរ ។ ដងផ្លូវខាងលើ គឺផ្លូវលេខ 31BT ដែលនៅជាប់នឹងខាងជើងរបងវត្តសន្សំកុសល ស្ថិតក្នុងសង្កាត់បឹងទំពន់ទី១ ខណ្ឌមានជ័យ ដែលត្រូវបានបងប្អូនអាជីវករ យកចំណីផ្លូវប្របសងខាងផ្លូវធ្វើជាកន្លែងលក់ដូរ បង្កអោយប៉ះពាល់ដល់លំហូរចរារណ៍ធ្វើដំណើររបសពលរដ្ឋដែលបានឆ្លងកាត់ ជាប្រចាំនាពេលកន្លង ៕ លីហេង

បណ្ដាញសង្គម

ព័ត៌មានថ្មីៗ

គណៈប្រតិភូក្រសួងវប្បធម៌ និងវិចិត្រសិល្បៈ នាំយកអំណោយ និងសាកសួរសុខទុក្ខកងទ័ពនៅទិសយោធភូមិភាគទី៤

លោក Putin បង្ហើបថា រុស្ស៊ីអាចនឹងដណ្តើមកាន់កាប់ទីក្រុង Sumy របស់អ៊ុយក្រែន

NEA សហការជាមួយមន្ទីរការងារ អាជ្ញាធរ រៀបចំវេទិកាការងារ និងឱកាសកម្មសិក្សាការងារ សម្រាប់ពលករវិលត្រឡប់ពីប្រទេសថៃ និងអ្នកស្វែងរកការងារ ក្នុងស្រុកបសេដ្ឋ

អង់គ្លេសដកបុគ្គលិកស្ថានទូតពីអ៊ីរ៉ង់ ដូចប្រទេសជាច្រើនទៀតដែរ

ឯកឧត្តមសាស្រ្តាចារ្យ ឈាង រ៉ា «មន្រ្តីសុខាភិបាល ត្រូវមានស្មារតីបុរេសកម្ម ដោយត្រូវយកចិត្តទុកដាក់ខ្ពស់លើសុខភាព និងសុខុមាលភាពមាតា និងទារកឱ្យកាន់តែប្រសើរឡើង»

ហេតុអ្វីបានជាត្រកូលអ្នកនយោបាយដែលកំពុងកាន់អំណាចរបស់ថៃ ប្រឈមនឹងការគំរាមកំហែងថ្មី

កិច្ចពិភាក្សាអឺរ៉ុប-អ៊ីរ៉ង់ នៅស្វីស មិនទទួលបានផលដុំកំភួន ខណៈរដ្ឋមន្ត្រីត្រៀមជួបប្រជុំម្តងទៀត

ជប៉ុន អាមេរិក និងហ្វីលីពីន ធ្វើសមយុទ្ធឆ្មាំល្បាតឆ្នេររួមគ្នា ចំពេលមានភាពតានតឹងជាមួយចិន

របាយការណ៍៖ អ៊ីស្រាអែលអាចបំពានកិច្ចព្រមព្រៀងជាមួយ EU ជុំវិញសិទ្ធិមនុស្ស នៅតំបន់ហ្កាហ្សា

អ៊ីស្រាអែល៖ ខ្លួនបានពន្យាររយៈពេលនៃកម្មវិធីនុយក្លេអ៊ែររបស់អ៊ីរ៉ង់យ៉ាងតិច ២ឆ្នាំ អំឡុងការវាយប្រហារថ្មី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877