លោក Trump៖ សុន្ទរកថា​របស់​លោក​គឺ​សមរម្យ​បំផុត​មុន​មាន​កុបកម្ម​នៅ​វិមាន​កា​ពី​តូ​ល

596

អាមេរិក៖ ប្រធានាធិបតី​អាមេរិក ​Donald Trump បាន​និយាយ​សុន្ទរកថា​របស់​លោក​ នៅ​មុន​មាន​អំពើ​កុបកម្ម​នៅ​វិមាន​កា​ពី​តូ​ល ​ដ៏​ច្របូក​ច្របល់​កាលពី​សប្ដាហ៍​ថ្ងៃ​ពុធ​សប្ដាហ៍​មុន ​នៅ​ពេល​ដែល​លោក​ជំរុញ​ឲ្យក្រុម​អ្នកគាំទ្រ​របស់​លោក​ ដើរ​ក្បួន​នៅ​កាន់​សភា​គឺ​ពិតជា​សមរម្យ​បំផុត​ណាស់​។

លោក Trump បាន​ច្រានចោល​ការ​ខិតខំ​ប្រឹងប្រែង​គួរ​ឲ្យ​អស់​សំណើច​ របស់​ក្រុម​គណបក្ស​ប្រជាធិបតេយ្យ​នៅ​ក្នុង​សភា​ ដើម្បី​ចោទប្រកាន់​រូបលោក​ពី​បទ​ញុះញង់​ឲ្យ​មាន​ការបះបោរ​។​ លោក​នឹង​ចុះ​ចេញពី​តំណែង​នៅ​ថ្ងៃ​ទី​២០ ខែ​មករា​នៅ​ពេល​ដែល​ប្រធានាធិបតី​ជាប់ឆ្នោត Joe Biden ស្បថ​ចូលកាន់​តំណែង​។​ គេ​រំពឹង​ថា​ សភាតំ​ណាងរាស្ត្រ​នឹង​បោះឆ្នោត​លើ​មាត្រា ​នៃ​ការចោទប្រកាន់​នៅ​ថ្ងៃ​ពុធ​នេះ​។​ លោក Trump បាន​និយាយ​ថា “​លោក​គិត​ថា ​នីតិវិធី​ចោទ​ប្រកាន់​ទម្លាក់​តំណែង កំពុង​បង្ក​ឲ្យ​មាន​គ្រោះថ្នាក់​យ៉ាង​ខ្លាំង​ដល់​ប្រទេស​របស់​យើង ​ហើយ​វា​បង្ក​ឲ្យ​មាន​កំហឹង​យ៉ាង​ខ្លាំង​។ លោក​មិន​ចង់បាន​អំពើ​ហិង្សា​ទេ​

លោក Trump ដែល​មាន​ចរិត​ផ្គើន​បាន​ថ្កោលទោស​ ចំពោះ​អំពើ​ហិង្សា​នៅ​វិមាន​កា​ពី​តូ​ល តែ​មិន​ទទួល​ខុសត្រូវ​ចំពោះ​ការ​ញុះញង់​ឲ្យ​មាន​អំពើ​កុបកម្ម​នោះ​ទេ​ លោក​បាន​ថ្លែង​បែបនេះ​ នៅ​ពេល​លោក​ចាក​ចេញពី​សេត​វិមាន ​សម្រាប់​ដំណើរ​ទស្សនកិច្ច​ទៅកាន់​រដ្ឋ​ Texas​ ដើម្បី​ពិនិត្យមើល​ផ្នែក​មួយ​នៃ​របង​ព្រំដែន​ ជាប់​ជាមួយ​ប្រទេស​ម៉ិ​ក​ស៊ិ​ក​។ នេះ​ជា​ការ​បង្ហាញខ្លួន​ជា​សាធារណៈ​លើកដំបូង​របស់​លោក​ ចាប់​តាំងពី​មាន​អំពើ​ហិង្សា​នៅ​វិមាន​កា​ពី​តូ​ល ​ដែល​ក្នុង​នោះ​បណ្ដាល​ឲ្យ​មនុស្ស ៥​នាក់​បាន​ស្លាប់​ និង​រាប់​សិប​នាក់​បាន​រង​របួស ​ដោយ​រួម​ទាំង​មន្ត្រី​នគរបាល​យ៉ាងតិច ៦០​នាក់​៕

អត្ថបទ៖ សុខ​មាន