នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
បច្ចេកវិទ្យាហិរញ្ញវត្ថុ និងបរិវត្តកម្មឌីជីថល ក្លាយជាគន្លឹះនៃការអភិវឌ្ឍសេដ្ឋកិច្ច និងសង្គមឌីជីថល
អនុប្រធានទ១ CDC៖ រាជរដ្ឋាភិបាលនៅតែចាត់ទុក​វិស័យឯកជនជាដៃគូ​ដ៏សំខាន់​ក្នុង​ការ​អភិវឌ្ឍប្រទេស
គណៈប្រតិភូ CDC ទស្សនកិច្ចស្វែងយល់ខ្សែច្រវាក់ផលិតកម្ម និងបច្ចេកវិទ្យារោងចក្រស៊ីម៉ងត៍អូដ្ឋ
គណៈកម្មាធិការវិនិយោគ ពិនិត្យសំណើសុំចុះបញ្ជីចំនួន ៧គម្រោង មានទុនសរុប ៣៥០ លានដុល្លារ

សេដ្ឋកិច្ច និង កសិកម្ម

បច្ចេកវិទ្យាហិរញ្ញវត្ថុ និងបរិវត្តកម្មឌីជីថល ក្លាយជាគន្លឹះនៃការអភិវឌ្ឍសេដ្ឋកិច្ច និងសង្គមឌីជីថល

2026/08/25 04:18:29 pm        196
Facebook Telegram Linkin
បច្ចេកវិទ្យាហិរញ្ញវត្ថុ និងបរិវត្តកម្មឌីជីថល ជាប្រព័ន្ធប្រតិបត្តិការធុរកិច្ចបង្កើនប្រសិទ្ធភាពសេវាហិរញ្ញវត្ថុ និងជាកម្លាំងចលករដ៏ សំខាន់ ក្នុងការជំរុញកំណើនសេដ្ឋកិច្ច ទំនើបកម្ម និងសង្គមឌីជីថល សម្រាប់តម្រូវការគ្រប់តួអង្គពាក់ព័ន្ធ ទាំងវិស័យរដ្ឋ ឯកជន និងប្រជាពលរដ្ឋ។ ឯកឧត្តម ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានអាជ្ញាធរសេវា ហិរញ្ញវត្ថុមិនមែនធនាគារ អ.ស.ហ. លើកឡើងក្នុងពិធីចុះអនុស្សរណៈនៃការយោគយល់ រវាងអគ្គលេខាធិការដ្ឋានអាជ្ញាធរសេវាហិរញ្ញ វត្ថុមិនមែនធនាគារ (អ.ស.ហ.) ជាមួយធនាគារ និងសាកលវិទ្យាល័យឯកជន នៅថ្ងៃទី២៤ សីហា ម្សិលមិញនេះថា បច្ចេកវិទ្យា ហិរញ្ញវត្ថុ និងបរិវត្តកម្មឌីជីថល បានក្លាយជារបៀបវារៈគន្លឹះក្នុងការជំរុញសន្ទុះនៃការអភិវឌ្ឍសេដ្ឋកិច្ច និងសង្គមឌីជីថល ដែលកំពុង ទទួលបានការយកចិត្តទុកដាក់កាន់តែខ្លាំង ពីគ្រប់តួអង្គពាក់ព័ន្ធរួមមាន រដ្ឋ វិស័យឯកជន និងរហូតដល់ប្រជាពលរដ្ឋ។ជាក់ស្តែងការចុះអនុស្សរណៈនៃការយោគយល់ រវាងអគ្គលេខាធិការដ្ឋានអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) ជាមួយធនាគារ និងសាកលវិទ្យាល័យឯកជននៅថ្ងៃម្សិលមិញ កិច្ចសហប្រតិបត្តិការនេះ គឺជាកត្តាចាំបាច់មួយក្នុងការជំរុញការអភិវឌ្ឍ ជាពិសេសការលើកកម្ពស់ការអភិវឌ្ឍសមត្ថភាពមូលធនមនុស្សឱ្យកាន់តែមានភាពរឹងមាំ តួយ៉ាងសមត្ថភាពរបស់ថ្នាក់ដឹកនាំ និងមន្ត្រី, បុគ្គលិក ក៏ដូចជាលោកគ្រូ, អ្នកគ្រូ និងនិស្សិតជាដើម។ ក្នុងស្មារតីនេះដែរ ក៏បានឆ្លុះបញ្ចាំងឱ្យឃើញពីភាពចាំបាច់ និងសារៈសំខាន់ នៃការពង្រឹង និងការពង្រីកកិច្ចសហប្រតិបត្តិការរវាងអគ្គលេខាធិការដ្ឋាន អ.ស.ហ., ជាមួយវិស័យឯកជនទាំងនេះ ដើម្បីបង្កើតជា ក្របខ័ណ្ឌ និងមូលដ្ឋានរួមសម្រាប់ស្ថាប័នទាំងបី ដែលបានចុះអនុស្សរណៈនៃការយោគយល់ ក្នុងការអនុវត្តការងារ និងសកម្មភាព សំដៅសម្រេចបាននូវវត្ថុបំណង និងផលប្រយោជន៍រួម។ជុំវិញបច្ចេកវិទ្យាហិរញ្ញវត្ថុ និងបរិវត្តកម្មឌីជីថលនេះ គឺជាការប្រើប្រាស់បច្ចេកវិទ្យាទំនើប ដើម្បីកែទម្រង់ និងបង្កើនប្រសិទ្ធភាពសេវា ហិរញ្ញវត្ថុ និងប្រព័ន្ធប្រតិបត្តិការធុរកិច្ចឱ្យកាន់តែលឿន សុវត្ថិភាព និងងាយស្រួល។ សារៈសំខាន់នៃបច្ចេកវិទ្យាហិរញ្ញវត្ថុ និងបរិវត្តកម្ម ឌីជីថលបានផ្តោតសំខាន់រួមមាន, ការពន្លឿនប្រតិបត្តិការ៖ ជួយឱ្យការទូទាត់ប្រាក់ ការផ្ទេរប្រាក់ និងការស្នើសុំកម្ចីចំណាយ ពេលតិច និងអាចធ្វើឡើងគ្រប់ពេលវេលា។ ភាពងាយស្រួលទទួលបានសេវា៖ ពង្រីកវិសាលភាពសេវាហិរញ្ញវត្ថុឱ្យទៅដល់ប្រជាជនទូទៅ សូម្បីតែអ្នកដែលមិនមានគណនីធនាគារបែបប្រពៃណី។ ការកាត់បន្ថយចំណាយ៖ ជួយឱ្យអាជីវកម្ម និងគ្រឹះស្ថានហិរញ្ញវត្ថុបង្កើន ផលិតភាព និងកាត់បន្ថយការចំណាយលើបុគ្គលិក ឬក្រដាសស្នាម។ ការទូទាត់ឌីជីថល៖ ការប្រើប្រាស់ប្រព័ន្ធទូទាត់ឆ្លងធនាគារ និងកូដ QR ក្នុងការទិញទំនិញប្រចាំថ្ងៃ។ ចំណែកពាក់ព័ន្ធគោលនយោបាយជាតិ៖ រាជរដ្ឋាភិបាលបានដាក់ចេញនូវ គោលនយោបាយ អភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨ ដើម្បីជំរុញនវានុវត្តន៍ និងភាពងាយស្រួលក្នុងប្រព័ន្ធអេកូឡូស៊ីហិរញ្ញវត្ថុ៕ អត្ថបទ៖ សុន រ៉ាឌី

អនុប្រធានទ១ CDC៖ រាជរដ្ឋាភិបាលនៅតែចាត់ទុក​វិស័យឯកជនជាដៃគូ​ដ៏សំខាន់​ក្នុង​ការ​អភិវឌ្ឍប្រទេស

2026/08/25 04:01:13 pm        175
Facebook Telegram Linkin
កំពត៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សា​អភិវឌ្ឍន៍​កម្ពុជា បានបញ្ជាក់ថា រាជរដ្ឋាភិបាលនៅតែផ្តល់ការយកចិត្តទុកដាក់ និងគាំទ្រវិស័យឯកជន ក្នុង​នាម​ជាដៃគូដ៏សំខាន់សម្រាប់ការបង្កើតការងារ ជំរុញការវិនិយោគ និងចូលរួមអភិវឌ្ឍសេដ្ឋកិច្ចជាតិ ខណៈវិស័យនេះកំពុងដើរតួនាទីកាន់តែសំខាន់ក្នុងការពង្រីកសកម្មភាពផលិតកម្ម និងការងារជូនប្រជាពលរដ្ឋ។ មានប្រសាសន៍ក្នុងឱកាសដឹកនាំគណៈប្រតិភូជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា ចុះទស្សនកិច្ចនៅរោងចក្រ ជីប ម៉ុង ស៊ីម៉ងត៍អូដ្ឋ ស្ថិតក្នុងស្រុកបន្ទាយមាស ខេត្តកំពត នារសៀលថ្ងៃទី២៤ ខែសីហា ឆ្នាំ២០២៦ ឯកឧត្តម ស៊ុន ចាន់ថុល បានលើកឡើងថា រាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នៅតែបន្តគិតគូរ និងយកចិត្តទុកដាក់ចំពោះវិស័យឯកជន ព្រោះជាដៃគូសំខាន់ក្នុងការបង្កើតការងារ និងចូលរួមចំណែកក្នុងការអភិវឌ្ឍប្រទេស។ ឯកឧត្តមឧបនាយករដ្ឋមន្ត្រីបានបន្តថា នៅឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ៤១៤គម្រោង ខណៈឆ្នាំ២០២៥ មានចំនួន ៦៣០គម្រោង ដែលមានទុនវិនិយោគសរុបប្រមាណ ១០ពាន់លានដុល្លារ។ ប៉ុន្តែសម្រាប់ឆ្នាំ២០២៦ គិតត្រឹមសប្តាហ៍មុន (ក.អ.ក.) បានអនុម័ត ២២១គម្រោង មានទុនវិនិយោគប្រមាណ ៥ពាន់លានដុល្លារ និងអាចបង្កើតការងារប្រមាណ ១៤៣,០០០កន្លែង ខណៈការប៉ាន់ស្មានដល់ដំណាច់ឆ្នាំ អាចមានគម្រោងវិនិយោគសរុបជាង៣០០គម្រោង។ ការថយចុះនេះគឺដោយសារ វិបត្តិសង្គ្រាមនៅមជ្ឍិមបូព៌ា វិបត្តិជម្លោះព្រំដែនកម្ពុជា-ថៃ និងផលជះនៃវិបត្តិ Online Scam ជាដើម តែរាជរដ្ឋាភិបាលនៅតែបន្តយកចិត្តទុកដាក់គៀគរអ្នកវិនិយោគមកបន្ថែមទៀត តាមរយៈការធ្វើកំណែទម្រង់ផ្សេងៗរបស់ (ក.អ.ក) ពិសេសរង់ចាំជួយសម្រួលដល់វិស័យឯកជន រាល់បញ្ហាលំបាក និងក្តីកង្វល់ផ្សេងៗ។ អ្នកឧកញ៉ា លាង ពៅ អគ្គនាយកក្រុមហ៊ុន ជីប ម៉ុង អ៊ិនស៊ី ស៊ីមេន បានឱ្យដឹងថា កន្លងមកក្រុមហ៊ុនបានវិនិយោគទុនជាង ៣០០លានដុល្លារ ហើយគ្រោងពង្រីកខ្សែច្រវាក់ផលិតកម្មទី២ ដែលមានសមត្ថភាពផលិតប្រមាណ ១.៥ដង នៃខ្សែផលិតកម្មទី១ ដោយត្រូវការទុនបន្ថែមប្រមាណ ៣០០-៣៥០លានដុល្លារ ដើម្បីបំពាក់បច្ចេកវិទ្យាទំនើប ប្រព័ន្ធឌីជីថល និងបញ្ញាសិប្បនិម្មិត (AI) សម្រាប់គ្រប់គ្រងប្រព័ន្ធផលិតកម្ម។ ការពង្រីកផលិតកម្មនេះ ក៏មានគោលបំណងបង្កើនសមត្ថភាពផលិតស៊ីម៉ងត៍ក្នុងស្រុក ដើម្បីឆ្លើយតបតម្រូវការទីផ្សារ និងកាត់បន្ថយការពឹងផ្អែកលើការនាំចូលពីបរទេស ខណៈដែលរោងចក្រស៊ីម៉ង់ត៍អូដ្ឋទទួលបានវិញ្ញាបណ្ណបត្រទទួលស្គាល់ជាអន្តរជាតិថាមានផលប៉ះពាល់ដល់បរិស្ថានតិចបំផុត។ អ្នកឧកញ៉ា លាង ពៅបានបន្ថែមថា ក្រៅពីការវិនិយោគ និងបង្កើតការងារ ក្រុមហ៊ុនក៏បានចូលរួមក្នុងសកម្មភាពសង្គម តាមរយៈកិច្ចសហការជាមួយរាជរដ្ឋាភិបាល កាកបាទក្រហមកម្ពុជា និងមន្ទីរពេទ្យនានា ដើម្បីជួយប្រជាពលរដ្ឋដែលខ្វះខាត និងជួបការលំបាក ដោយទឹកប្រាក់សរុបជិត ៤៤លានដុល្លារ។ ហើយក្នុងអំឡុងពេលមានជម្លោះព្រំដែនកម្ពុជា-ថៃ ក្រុមហ៊ុនក៏បានចូលរួមបរិច្ចាគប្រមាណ ៩លានដុល្លារ ដើម្បីឧត្តម្ភគាំទ្រកងទ័ពជួរមុខ ជនភៀសសឹក និងការកសាងហេដ្ឋារចនាសម្ព័ន្ធក្រវ៉ាត់ព្រំដែន៕

គណៈប្រតិភូ CDC ទស្សនកិច្ចស្វែងយល់ខ្សែច្រវាក់ផលិតកម្ម និងបច្ចេកវិទ្យារោងចក្រស៊ីម៉ងត៍អូដ្ឋ

2026/08/25 11:36:13 am        160
Facebook Telegram Linkin
គណៈប្រតិភូជាន់ខ្ពស់ នៃក្រុមប្រឹក្សាអភិវឌ្ឍន៍កម្ពុជា ចុះបំពេញទស្សនកិច្ចស្វែងយល់ អំពីខ្សែច្រវាក់ផលិតកម្ម និងការអនុវត្ត បច្ចេកវិទ្យាទំនើបចុងក្រោយបង្អស់ របស់រោងចក្រ ជីប ម៉ុង ស៊ីម៉ងត៍អូដ្ឋ នៅខេត្តកំពត ដែលឆ្លើយតបទៅនឹងបទដ្ឋានបរិស្ថានបៃតង។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅរសៀលថ្ងៃទី២៤ ខែសីហា ឆ្នាំ២០២៦ បានដឹកនាំគណៈប្រតិភូជាន់ខ្ពស់ នៃ ក.អ.ក. ចុះបំពេញទស្សនកិច្ចផ្ទាល់ នៅរោងចក្រ ជីប ម៉ុង ស៊ីម៉ងត៍អូដ្ឋ ដែលមានទីតាំងស្ថិតនៅក្នុងភូមិសាស្រ្តស្រុកបន្ទាយមាស ខេត្តកំពត, អមដំណើរដោយ ឯកឧត្តម គង់ វិមាន អគ្គលេខាធិការនៃអគ្គ- លេខាធិការដ្ឋានក្រុមប្រឹក្សាអភិវឌ្ឍន៍កម្ពុជា (ក.អ.ក.) ព្រមទាំងថ្នាក់ដឹកនាំ និងមន្ត្រីពាក់ព័ន្ធពី ក.អ.ក. និងតំណាងក្រសួង/ស្ថាប័ន ពាក់ព័ន្ធមួយចំនួនផងដែរ។ឯកឧត្តមឧបនាយករដ្ឋមន្ត្រី និងគណៈប្រតិភូជាន់ខ្ពស់អមដំណើរ បានអញ្ជើញពិនិត្យដោយផ្ទាល់នូវខ្សែច្រវាក់ផលិតកម្ម និង ការអនុវត្តបច្ចេកវិទ្យាទំនើបចុងក្រោយបង្អស់ ដែលឆ្លើយតបទៅនឹងបទដ្ឋានបរិស្ថានបៃតង។ ជាមួយគ្នានេះ ឯកឧត្តមឧបនាយក រដ្ឋមន្ត្រី ក៏បានសម្តែងនូវការកោតសរសើចំពោះក្រុមហ៊ុន ដែលបានយកចិត្តទុកដាក់ខ្ពស់លើការគ្រប់គ្រងផលប៉ះពាល់ និងការគិតគូរ ដល់ចីរភាពបរិស្ថានជុំវិញ។ ឯកឧត្តមឧបនាយករដ្ឋមន្ត្រី ក៏បានលើកឡើងពីសារសំខាន់របស់វិស័យឯកជន ក្នុងការចូលរួមជំរុញកំណើនសេដ្ឋកិច្ចជាតិ ដែលមិនអាចខ្វះបាន ជាពិសេសការបង្កើតនូវឱកាសការងារសម្រាប់បងប្អូនប្រជាពលរដ្ឋ។ ឯកឧត្តម បានបន្ថែមថា រាជរដ្ឋាភិបាលនៅ តែបន្តយកចិត្តទុកខ្ពស់ ក្នុងនាមជាអ្នកសម្របសម្រួលតាមរយៈយន្តការនានាដែលបានដាក់ចេញ ដើម្បីធ្វើឱ្យបរិយាកាសវិនិយោគកាន់ តែមានភាពរស់រវើក ដែលមិនត្រឹមតែជាការទាក់ទាញទុនវិនិយោគថ្មីបន្ថែមប៉ុណ្ណោះទេ ប៉ុន្តែគឺជាការគាំទ្រការវិនិយោគដែលមានស្រាប់ សំដៅធ្វើឱ្យប្រតិបត្តិការអាជីវកម្មរបស់ពួកគេអាចបន្តរីកចម្រើន និងជំរុញដល់ការពង្រីកទុនវិនិយោគបន្ថែមផងដែរ។ សូមបញ្ជាក់ថា រោងចក្រ ជីប ម៉ុង ស៊ីម៉ងត៍អូដ្ឋ គឺជាបុត្រសម្ព័ន្ធដ៏រឹងមាំមួយរបស់សម្ព័ន្ធ ជីប ម៉ុង (Chip Mong Group) ដែលជា សមាសភាពធុរកិច្ចដ៏មានឥទ្ធិពល បានកសាងទំនុកចិត្តយ៉ាងរឹងមាំនៅលើទីផ្សារកម្ពុជា អស់រយៈពេលជាង ២ ទសវត្សរ៍មកហើយ។ រោងចក្រមួយនេះត្រូវបានទទួលស្គាល់ថា ជាមូលដ្ឋានផលិតកម្មស៊ីម៉ងត៍ដ៏ធំ និងទំនើបមួយក្នុងព្រះរាជាណាចក្រកម្ពុជា ដែលបាននិង កំពុងចូលរួមបម្រើវិស័យវិស្វកម្មសំណង់យ៉ាងសកម្ម។ តាមរយៈសមត្ថភាពផលិតកម្មដ៏ធំធេង និងប្រព័ន្ធគ្រប់គ្រងគុណភាពកម្រិតខ្ពស់ ស្របតាមបទដ្ឋានអន្តរជាតិ រោងចក្រកំពុងដើរតួនាទីយ៉ាងសំខាន់ក្នុងការផ្គត់ផ្គង់ទីផ្សារក្នុងស្រុក កាត់បន្ថយការនាំចូលពីបរទេស និង រួមចំណែកយ៉ាងធំធេង ក្នុងការរុញច្រានការអភិវឌ្ឍហេដ្ឋារចនាសម្ព័ន្ធរូបវន្តនៅកម្ពុជា ឱ្យមានការរីកចម្រើនយ៉ាងឆាប់រហ័ស៕ អត្ថបទ៖ សុន រ៉ាឌី

គណៈកម្មាធិការវិនិយោគ ពិនិត្យសំណើសុំចុះបញ្ជីចំនួន ៧គម្រោង មានទុនសរុប ៣៥០ លានដុល្លារ

2026/08/25 11:16:02 am        214
Facebook Telegram Linkin
គណៈកម្មាធិការវិនិយោគកម្ពុជា ពិនិត្យពិភាក្សាលើសំណើសុំចុះបញ្ជី គម្រោង​វិនិយោគ​មាន​លក្ខណៈ​សម្បត្តិ​គ្រប់​គ្រាន់​ចំនួន ៧ មានទុនវិនិយោគសរុបប្រមាណ ៣៥០ លានដុល្លារអាមេរិក ក្នុង​នោះវិស័យកសិ-ឧស្សាហកម្មចំនួន១, ឧស្សាហកម្ម៣គម្រោង, វិស័យ ទេសចរណ៍ ១ និង​ហេដ្ឋា​រចនា​សម្ព័ន្ធ ២គម្រោង។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី២៤ ខែសីហា ឆ្នាំ ២០២៦នេះ បានអញ្ជើញដឹកនាំប្រជុំច្រកចេញ-ចូលតែមួយ លើកទី៨ ក្នុងឆ្នាំ២០២៦ ពិនិត្យ និងពិភាក្សាលើសំណើសុំចុះបញ្ជីគម្រោង វិនិយោគមានលក្ខណៈសម្បត្តិគ្រប់គ្រាន់ចំនួន ៧ គម្រោង ដោយមានការអញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាល រាជធានី-ខេត្តពាក់ព័ន្ធ។ជុំវិញគម្រោងចំនួន៧ខាងលើនេះ មានទុនវិនិយោគសរុបប្រមាណ ៣៥០ លានដុល្លារអាមេរិក អាចបង្កើតការងារបានប្រមាណ ១,៨ ពាន់កន្លែង ដោយវិនិយោគនៅលើវិស័យសំខាន់ៗរួមមាន៖ វិស័យកសិ-ឧស្សាហកម្មចំនួន១គម្រោង, គម្រោងបង្កើតកសិដ្ឋានដាំ ដំណាំឈើហូបផ្លែចម្រុះ កសិដ្ឋានកាហ្វេ ចិញ្ចឹម និងផលិតសំបុកដង្កូវនាង ការចិញ្ចឹមសត្វ សាងសង់រោងចក្រកែច្នៃ និងមូលដ្ឋានផលិត នានា សម្រាប់បម្រើការវេចខ្ចប់ទំនិញ។ចំណែកវិស័យឧស្សាហកម្មមានចំនួន៣គម្រោងរួមមាន៖ គម្រោងបង្កើតរោងចក្រកែច្នៃទឹកដោះគោ, គម្រោងបង្កើតរោងចក្រ ផលិតស្រោមដៃគ្រប់ប្រភេទ, និងគម្រោងបង្កើតរោងចក្រផលិតថ្នាំពេទ្យ។ ចំពោះវិស័យទេសចរណ៍មានចំនួន១គម្រោង៖ គឺគម្រោង សាងសង់ និងធ្វើអាជីវកម្មសណ្ឋាគារផ្កាយ៥ ចំនួន ១៥០បន្ទប់។ដោយឡែកការវិនិយោគលើវិស័យហេដ្ឋារចនាសម្ព័ន្ធមានចំនួន២គម្រោងរួមមាន៖ គម្រោងអភិវឌ្ឍន៍ស្ថានីយផលិតអគ្គិសនីដើរ ដោយថាមពលពន្លឺព្រះអាទិត្យ មានអានុភាព ៣៥០ មេហ្គាវ៉ាត់ និងគម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះ អាទិត្យមួយផ្សេងទៀត មានអានុភាព ៣០ មេហ្គាវ៉ាត់ ជាមួយប្រព័ន្ធផ្ទុកថាមពលអគ្គិសនី។ ទាក់ទិនគម្រោងវិនិយោគទាំង ៧ ខាងលើ នេះ បានជ្រើសរើសទីតាំងវិនិយោគនៅរាជធានីភ្នំពេញ ខេត្តពោធិ៍សាត់ កំពង់ស្ពឺ ត្បូងឃ្មុំ និងខេត្តស្ទឹងត្រែង៕ អត្ថបទ៖ សុន រ៉ាឌី

ធនាគារជាតិតម្រូវឱ្យអនុវត្តប្រតិបត្តិការប្រាក់បញ្ញើអន្តរធនាគារតាមថ្នាល NBCP គ្រប់​គ្រឹះស្ថាន​ធនាគារ

2026/08/24 10:30:33 am        1514
Facebook Telegram Linkin
ធនាគារជាតិនៃកម្ពុជាតម្រូវឱ្យគ្រប់គ្រឹះស្ថានធនាគារ ដែល​មាន​ប្រតិបត្តិការ​ប្រាក់​បញ្ញើ​អន្តរ​ធនាគារ ​ចូលរួមអនុវត្តប្រតិបត្តិការ​នៅលើថ្នាល NBCP ដើម្បីទទួលបានអត្ថប្រយោជន៍បន្ថែម លើ​ការ​លើកលែងកាតព្វកិច្ចរាយការណ៍ អំពីទិន្នន័យប្រតិបត្តិការប្រាក់បញ្ញើ អន្តរធនាគារ និង​ទទួល​បាន​ស្ថិតិ​ទីផ្សារ​ប្រាក់បញ្ញើអន្តរធនាគារ។ធនាគារជាតិនៃកម្ពុជា ចេញសារាចរណែនាំស្តីពីការប្រើប្រាស់ថ្នាលធនាគារជាតិនៃកម្ពុជា (NBCP) សម្រាប់ប្រតិបត្តិការប្រាក់ បញ្ញើអន្តរធនាគារ ដែលថ្នាលមួយនេះ ធនាគារ​ជាតិ​នៃ​កម្ពុជា​បាន​ដាក់​ឱ្យដំណើរការមុខងារប្រាក់បញ្ញើអន្តរធនាគារ ចាប់តាំងពីថ្ងៃទី ២៥ ខែធ្នូ ឆ្នាំ​២០២៤ ក្នុងគោលបំណងនៃការបង្កើតមុខងារប្រាក់បញ្ញើអន្តរធនាគារនៅលើថ្នាល NBCP គឺ​ដើម្បី​លើក​កម្ពស់ ប្រសិទ្ធភាព សុវត្ថិភាព និងភាពត្រឹមត្រូវនៃការធ្វើប្រតិបត្តិការអន្តរធនាគារ ព្រម​ទាំង​សម្រួលដល់ការទូទាត់ឆ្លងគ្រឹះស្ថាន ការតាមដាន ការផ្ទៀងផ្ទាត់ និងការគ្រប់​គ្រង​ទិន្នន័យ​របស់​គ្រឹះ​ស្ថានធនាគារដែលបានធ្វើប្រតិបត្តិការនៅលើថ្នាល NBCP។ លើសពីនេះ, ការចូលរួមប្រើប្រាស់ផ្ទាលនេះ គឺជាការចូលរួមអភិវឌ្ឍទីផ្សារអន្តរធនាគារ និង​ជួយ​ឱ្យ​ធនាគារជាតិនៃកម្ពុជា ប្រមូលបានទិន្នន័យទីផ្សារពេញលេញ ត្រឹមត្រូវ និងទាន់ពេលវេលា ដែលជា​ធាតុចូលសំខាន់ក្នុងការបង្កើតអត្រាការប្រាក់យោងជា ប្រាក់រៀល សម្រាប់​ឱ្យ​គ្រឹះ​ស្ថាន​ធនាគារ និងអ្នកចូលរួមក្នុង ទីផ្សារហិរញ្ញវត្ថុប្រើប្រាស់ជាមូលដ្ឋានក្នុងការគណនា និង​កំណត់​អត្រា​ការប្រាក់សម្រាប់ផលិតផលហិរញ្ញវត្ថុ ផ្សេងៗរបស់ខ្លួនតាមការគួរ។ ជុំវិញការផ្តល់សារៈសំខាន់ខាងលើនេះ, ធនាគារជាតិនៃកម្ពុជាតម្រូវឱ្យ គ្រប់​គ្រឹះ​ស្ថាន​ធនាគារ​ទាំង​អស់​ ដែលមានប្រតិបត្តិការ ប្រាក់បញ្ញើអន្តរធនាគារ ចូលរួម​អនុវត្ត​ប្រតិបត្តិ​ការ​ទាំង​នោះ​នៅ​លើ​ថ្នាល ​NBCP ឱ្យបានយ៉ាងយូរត្រឹមថ្ងៃទី៣១ ខែធ្នូ ឆ្នាំ២០២៦។ គ្រឹះស្ថានធនាគារដែលបានអនុវត្តប្រតិបត្តិការប្រាក់បញ្ញើអន្តរធនាគារពេញលេញលើថ្នាល NBCP នឹង​ទទួលបានអត្ថប្រយោជន៍ បន្ថែមដូចជា៖ ១/. លើកលែង​កាតព្វ​កិច្ច​រាយកា​រណ៍អំ​ពី​ទិន្ន​ន័យ​ប្រតិបត្តិ​ការ​ប្រាក់បញ្ញើអន្តរធនាគារមកធនាគារជាតិនៃកម្ពុជា និង ២/. ទទួលបាន​ស្ថិតិ​ទីផ្សារ​ប្រាក់​បញ្ញើ​អន្តរធនាគារ ដើម្បីប្រើប្រាស់ជាប្រយោជន៍ក្នុងការវិភាគ ទីផ្សារ និងរៀបចំ​យុទ្ធ​សាស្ត្រ​គ្រប់​គ្រង​សន្ទនីយភាព៕ អត្ថបទ៖ សុន រ៉ាឌី 

កម្ពុជាបង្កើនការយល់ដឹងពីសក្តានុពល និងកាលានុវត្តភាពវិនិយោគក្នុងវិស័យកសិកម្ម និងកសិ-ឧស្សាហកម្ម

2026/08/21 03:39:22 pm        381
Facebook Telegram Linkin
កម្ពុជារៀបចំសន្និសីទស្តីពី ការអភិវឌ្ឍនិងទំនើបកម្មវិស័យកសិកម្មនៅកម្ពុជា លើការបើកចំហកាលានុវត្តភាពវិនិយោគ ដើម្បីលើក កម្ពស់ការយល់ដឹងអំពីសក្តានុពល និងកាលានុវត្តភាពវិនិយោគក្នុងវិស័យកសិកម្ម និងកសិ-ឧស្សាហកម្មនៅកម្ពុជា ។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី២០ ខែសីហា ឆ្នាំ២០២៦ បានអញ្ជើញជាអធិបតីក្នុងសន្និសីទ ស្តីពីការអភិវឌ្ឍនិងទំនើបកម្មវិស័យកសិកម្មនៅកម្ពុជា ក្រោមមូលបទ «ការបើកចំហ កាលានុវត្តភាពវិនិយោគ» ក្នុងគោលបំណងលើកកម្ពស់ការយល់ដឹងអំពីសក្តានុពល និងកាលានុវត្តភាពវិនិយោគក្នុងវិស័យកសិកម្ម និងកសិ-ឧស្សាហកម្មនៅកម្ពុជា ដោយមានការអញ្ជើញចូលរួមពីតំណាងសហគ្រាសមកពីសាធារណរដ្ឋប្រជាមានិតចិន ដែលកំពុង ប្រតិបត្តិការ និងមានបំណងស្វែងរកឱកាសពង្រីកខ្សែច្រវាក់ផលិតកម្ម និងបណ្តាក់ទុនវិនិយោគលើវិស័យកសិកម្ម និងកសិ-ឧស្សាហកម្មនៅព្រះរាជាណាចក្រកម្ពុជា សរុបប្រមាណជាង ១០០ស្ថាប័ន។ ឯកឧត្តមឧបនាយករដ្ឋមន្ត្រី បានគូសបញ្ជាក់អំពីជំហររបស់រាជរដ្ឋាភិបាលកម្ពុជា ដែលជានិច្ចកាលតែងតែចាត់ទុកវិស័យ ឯកជនជាកម្លាំងចលករយ៉ាងសំខាន់ ក្នុងការអភិវឌ្ឍសេដ្ឋកិច្ចជាតិ ហើយរាជរដ្ឋាភិបាលក៏បាននិងកំពុងតួនាទីជាអ្នកសម្របសម្រួល និងគាំទ្ររាល់សកម្មភាពវិនិយោគយ៉ាងសកម្មផងដែរ។ ជាមួយគ្នានេះ ឯកឧត្តមបានរំលេចអំពីទំនាក់ទំនងមិត្តភាពរឹងមាំរវាងកម្ពុជា-ចិន ក្នុងនាមជា «មិត្តដែកថែបនិងជាកិច្ចសហប្រតិបត្តិការយូរអង្វែង» ដែលផ្តល់នូវបរិយាកាសអំណោយផល និងជំនឿចិត្តខ្ពស់ ដល់វិនិយោគិនចិន។ ឯកឧត្តមឧបនាយករដ្ឋមន្ត្រី បានបញ្ជាក់យ៉ាងស៊ីជម្រៅនូវមូលហេតុសំខាន់ៗ ដែលវិនិយោគិនគួរជ្រើសរើសកម្ពុជា ជាគោល ដៅវិនិយោគរួមមាន៖ ១. សន្តិភាព និងស្ថិរភាពនយោបាយរឹងមាំ រួមជាមួយលំនឹងម៉ាក្រូសេដ្ឋកិច្ច និងអត្រាអតិផរណាទាប, ២. កម្លាំង ពលកម្មវ័យក្មេង ប្រកបដោយថាមវន្ត និងងាយស្រួលក្នុងការបណ្តុះបណ្តាល, ៣. ច្បាប់ស្តីពីវិនិយោគមានភាពបើកចំហ អំណោយផល ខ្ពស់ និងផ្តល់នូវកញ្ចប់លើកទឹកចិត្តសម្បូរបែបដល់វិនិយោគិន, ៤. ការអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនប្រទាក់ក្រឡាជាអាទិ៍ ការលើកកម្រិតគុណភាពផ្លូវជាតិ ផ្លូវល្បឿនលឿន អាកាសយានដ្ឋានអន្តរជាតិថ្មីៗ និងផែនការពង្រីកវិសាលភាពកំពង់ផែទឹកជ្រៅ ព្រមទាំងការធ្វើឱ្យប្រសើរឡើងជាបន្តបន្ទាប់នូវវិស័យភស្តុភារកម្មជាតិ, ៥. កម្ពុជាមានទីតាំងភូមិសាស្រ្តស្ថិតនៅចំកណ្តាលតំបន់ (មហា អនុតំបន់មេគង្គ,អាស៊ាន, អាស៊ាន+៥) និងមានការបើកចំហទីផ្សារទូទាំងសកលលោក និងការសម្រេចបាននូវការចរចាកិច្ចព្រមព្រៀង ពាណិជ្ជកម្មបដិការ (ART) មុនគេជាមួយសហរដ្ឋអាម៉េរិក ព្រមទាំងកិច្ចព្រមព្រៀងពាណិជ្ជកម្មសេរី (FTAs) ជាច្រើនទៀត។ ជាការឆ្លើយតប តំណាងវិនិយោគិនចិន បានសម្តែងនូវអំណរគុណយ៉ាងជ្រាលជ្រៅជូនចំពោះ ឯកឧត្តមឧបនាយករដ្ឋមន្ត្រី ដែលបានចំណាយពេលវេលាដ៏មានតម្លៃអញ្ជើញជាអធិបតី និងចែករំលែកព័ត៌មានយុទ្ធសាស្ត្រសំខាន់ៗ។ តំណាងវិនិយោគិនក៏បាន បង្ហាញនូវចំណាប់អារម្មណ៍យ៉ាងខ្លាំងលើសក្តានុពលវិនិយោគនៅកម្ពុជា និងបានសម្តែងក្តីសង្ឃឹមយ៉ាងមុតមាំថា តាមរយៈសន្និសីទនេះ អ្នកវិនិយោគទាំងអស់ទទួលបានព័ត៌មានពិតប្រាកដ ច្បាស់លាស់ និងស៊ីជម្រៅ ដែលជាមូលដ្ឋានគ្រឹះយ៉ាងរឹងមាំ សម្រាប់ការរៀបចំ ផែនការ និងការសម្រេចចិត្តវិនិយោគជាក់ស្តែងនាពេលខាងមុខ៕ អត្ថបទ៖ សុន រ៉ាឌី

ការនាំចេញផលិតផល GFT របស់កម្ពុជារំពឹងកើនលើស ១៧ពាន់លានដុល្លារក្នុងឆ្នាំ២០២៦

2026/08/21 12:44:25 pm        290
Facebook Telegram Linkin
ភ្នំពេញ៖ ការនាំចេញផលិតផលកាត់ដេរ ស្បែកជើង និងផលិតផលធ្វើដំណើរ (GFT) របស់កម្ពុជា ត្រូវបានរំពឹងថា នឹងកើនដល់ ឬលើស ១៧ពាន់លានដុល្លារអាមេរិកក្នុងឆ្នាំ២០២៦ ដែលនឹងក្លាយជាកម្រិតខ្ពស់បំផុតថ្មីមួយសម្រាប់វិស័យនេះ។ ការរំពឹងទុកនេះកើតឡើងបន្ទាប់ពីការនាំចេញ GFT នៅតែបន្តមានសន្ទុះកំណើនក្នុងឆមាសទី១ ឆ្នាំ២០២៦។ ជារួម វិស័យនេះបានបង្ហាញពីកំណើនប្រកបដោយស្ថិរភាព ដែលឆ្លុះបញ្ចាំងពីតម្រូវការខ្ពស់ពីទីផ្សារសំខាន់ៗ និងការបន្តរក្សាបាននូវភាពប្រកួតប្រជែងរបស់ឧស្សាហកម្ម GFT របស់កម្ពុជា។ រាជរដ្ឋាភិបាល​បានចាត់ទុក វិស័យកាត់ដេរ ស្បែកជើង និងផលិតផលធ្វើដំណើរ (GFT) គឺជាវិស័យស្នូលមួយក្នុងការជំរុញការនាំចេញរបស់កម្ពុជា ហើយវិស័យនេះនៅតែបន្តរក្សាបាននូវកំណើនគួរឱ្យកត់សម្គាល់។​ ជាលទ្ធផល ក្នុងឆមាសទី១ ឆ្នាំ២០២៦ វិស័យ GFT បាន​នាំចេញសរុបបានកើនឡើងពី ៧,៦៣ពាន់លានដុល្លារអាមេរិក ក្នុងឆមាសទី១ ឆ្នាំ២០២៥ ដល់ ៨,០៩ ពាន់លានដុល្លារអាមេរិក ក្នុងឆមាសទី១ ឆ្នាំ២០២៦ ដែលកើនចំនួន ៤៦៦,៦៩ លានដុល្លារអាមេរិក ឬ ស្មើនឹង​៦,១២%។ សហរដ្ឋអាមេរិកនៅតែជាទីផ្សារនាំចេញធំបំផុត ដោយការនាំចេញបានកើនឡើងពី ៣,០៨ ពាន់លានដុល្លារអាមេរិក ក្នុងឆ្នាំ២០២៥ ដល់ ៣,៥៤ ពាន់លានដុល្លារអាមេរិក ក្នុងឆ្នាំ២០២៦ ស្មើនឹង ៤៣,៧% នៃការនាំចេញផលិតផល GFT សរុប។ ផលិតផលសម្លៀកបំពាក់នៅតែជាផលិតផលនាំចេញឈានមុខគេរបស់កម្ពុជា​។ ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យ ក្រសួងពាណិជ្ជកម្ម បានបញ្ជាក់ថា តួលេខនេះជាកំណើនមួយគួរឱ្យចាប់អារម្មណ៍ បើទោះជា រងសម្ពាធពីពន្ធបដិការបស់សហរដ្ឋអាមេរិក ក៏ការនាំចេញផលិត GFT នៅតែឈរជើងយ៉ាងរឹងមាំនៅទីផ្សារសហរដ្ឋអាមេរិក ដែលជាទីផ្សារចម្បងជាងគេរបស់កម្ពុជា ហើយ រាជរដ្ឋាភិបាលមានទំនុកចិត្តខ្ពស់​ថា វិស័យ GFT នឹងបន្តរីកចម្រើនតទៅទៀត ខណៈដែលការវិនិយោគទៅលវិស័យនេះនៅតែបន្តកើនឡើងជាលំដាប់។ ឯកឧត្តម មានប្រសាសន៍ថា៖ «យោងទៅតាមការបញ្ជាទិញ GFT នៅតែមាន ហើយ បច្ចុប្បន្ននេះ រដូវដែលមានការនាំចេញច្រើននឹងបន្តរហូតដល់ខែតុលា អីចឹង កម្ពុជានៅតែ មានសេចក្តីសង្ឃឹមថា ទំនិញសម្លៀកបំពាក់ ស្បែកជើង និងផលិតផលធ្វើដំណើរ នៅតែមានទីផ្សារនៅឡើយ។ ផលិតផលនេះ នៅតែជាទីសង្ឃឹមរបស់កម្ពុជានៅឡើយ បើទោះបីជា មានបញ្ហាអ្វីផ្សេងៗក៏ដោយ ដែលកើតមានឡើងកន្លងមក។​ ក្រសួងពាណិជ្ជកម្ម​នឹងបន្តខិតខំធ្វើយ៉ាងណាបន្តសម្របសម្រួលពាណិជ្ជកម្ម ទាំងការបំពេញសេវាសាធារណៈ ទាំងការបំពេញលក្ខខណ្ឌទីផ្សារ សម្រាប់ទីផ្សារនានា ជាពិសេស វិធានប្រភពដើមទំនិញ និងការជួយសម្របសម្រួលលក្ខខណ្ឌទីផ្សារផ្សេងៗទៀត​ស្របតាមតម្រូវការរបស់ប្រទេសជាទីផ្សាររបស់កម្ពុជា»។​ លោក កាំង ម៉ូនីកា អគ្គលេខាធិការរងនៃសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានឱ្យដឹងថា ការនាំចេញសម្លៀកបំពាក់នៅតែជាប្រភេទផលិតផលធំជាងគេ ដែលមានចំនួន ៦៨,៨% នៃការនាំចេញសរុបនៅក្នុងឆមាសទី១ ឆ្នាំ ២០២៦ តាមពីក្រោយដោយ ផលិតផលស្បែកជើង ១៣,៧% និង​ផលិតផលធ្វើដំណើរនិងការបូប ១៣,០% និងផលិតផលវាយនភណ្ឌផ្សេងទៀត មានចំនួន ៤,៨%។ នេះគឺបានឆ្លុះបញ្ចាំងថា វិស័យនេះនៅតែបន្តទាក់ទាញគម្រោងវិនិយោគថ្មីៗ និងរក្សាបានស្ថិរភាពទីផ្សារសម្រាប់ការនាំចេញ ជាពិសេស ទីផ្សារសហរដ្ឋអាមេរិក។​ លោក កាំង ម៉ូនីកា មានប្រសាសន៍ថា៖ «ជាការពិតបើទោះជាបី កម្ពុជា បានជួបប្រទះ​នូវបញ្ហាប្រឈមមួយចំនួន ក៏លោកមើលឃើញថានិន្នាការវិនិយោគថ្មីៗនៅតែបន្តកើតមាន ហើយការបញ្ជាទិញនៅតែមានគ្រប់គ្រាន់ ជាពិសេសទីផ្សារសហរដ្ឋអាមេរិក»។របាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញថា ក្នុង​ឆ្នាំ២០២៥ វិស័យ GFT របស់កម្ពុជាមានប្រហែល ១,៨០០ រោងចក្រ​/សហគ្រាស និងផ្តល់ការងារជូនប្រជាពលរដ្ឋកម្ពុជាចំនួនជាង ១,១១ លាននាក់ ដែលប្រមាណ ៧៥% នៃកម្មករ-និយោជិតជាស្ត្រី៕ អត្ថបទ៖ ធូ វិរៈ      

កម្ពុជា និងម៉ាឡេស៊ី ពង្រឹងកិច្ចសហប្រតិបត្តិការពាណិជ្ជកម្ម តាមរយៈវេទិកាពាណិជ្ជកម្ម និង​ជំនួប​ផ្គូផ្គងធុរកិច្ច

2026/08/19 02:09:34 pm        323
Facebook Telegram Linkin
នាព្រឹកថ្ងៃពុធ ទី១៩ ខែសីហា ឆ្នាំ២០២៦ នៅសណ្ឋាគារ Hyatt Regency Phnom Penh លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម អញ្ជើញជាអធិបតីក្នុងពិធីបើកវេទិកាពាណិជ្ជកម្មកម្ពុជា-ម៉ាឡេស៊ី និងជំនួបផ្គូផ្គងធុរកិច្ច ភ្ជាប់ជាមួយបេសកកម្មជំរុញការនាំចេញ (EAM) មកកាន់កម្ពុជា ឆ្នាំ២០២៦ ដែលមានវត្តមានអញ្ជើញចូលរួម ពី ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រី ទទួលបន្ទុកបេសកកម្មពិសេស ឯកឧត្តម Shaharuddin Bin Onn ឯកអគ្គរាជទូតវិសាមញ្ញ និងពេញសមត្ថភាពនៃប្រទេសម៉ាឡេស៊ី ប្រចាំព្រះរាជាណាចក្រកម្ពុជា ឯកឧត្តម Dato’ Seri Reezal Merican Naina Merican ប្រធានសាជីវកម្មអភិវឌ្ឍន៍ពាណិជ្ជកម្មក្រៅប្រទេសម៉ាឡេស៊ី (MATRADE) ថ្នាក់ដឹកនាំ ក្រសួង-ស្ថាប័នពាក់ព័ន្ធ តំណាងសហគមន៍ធុរកិច្ច និងក្រុមហ៊ុននៃប្រទេសទាំងពីរ ដើម្បីស្វែងរកឱកាសក្នុងការពង្រីកការធ្វើពាណិជ្ជកម្ម និងភាពជាដៃគូធុរកិច្ចរវាងកម្ពុជា និងម៉ាឡេស៊ី។ ជាកិច្ចចាប់ផ្តើម លោកជំទាវរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះគណៈប្រតិភូម៉ាឡេស៊ី និងថ្លែងអំណរគុណចំពោះរដ្ឋាភិបាលម៉ាឡេស៊ី ស្ថានទូតម៉ាឡេស៊ីប្រចាំព្រះរាជាណាចក្រកម្ពុជា សាជីវកម្មអភិវឌ្ឍន៍ពាណិជ្ជកម្មក្រៅប្រទេសម៉ាឡេស៊ី (MATRADE) និងដៃគូទាំងអស់ ដែលបានផ្តួចផ្តើមនិងសហការក្នុងការរៀបចំវេទិកាពាណិជ្ជកម្មនិងជំនួបផ្គូរផ្គងធុរកិច្ចដ៏មានសារៈសំខាន់នេះឡើង ដែលនឹងបន្តចូលរួមចំណែកក្នុងការពង្រឹងទំនាក់ទំនងសេដ្ឋកិច្ចនិងពាណិជ្ជកម្មរវាងប្រទេសទាំងពីរ។ លោកជំទាវរដ្ឋមន្ត្រី បានគូសបញ្ជាក់ពីសន្ទុះវិជ្ជមាននៃពាណិជ្ជកម្មទ្វេភាគី ដោយក្នុងឆ្នាំ២០២៥ ទំហំពាណិជ្ជកម្មទ្វេភាគីសម្រេចបានប្រមាណ ១,០៨ ពាន់លានដុល្លារអាម៉េរិក កើនឡើងជិត ២៥% បើធៀបនឹងឆ្នាំ២០២៤ ដែលមានចំនួន ៨៦៥ លានដុល្លារអាម៉េរិក ពោលគឺសម្រេចបាននិងកើនលើស ១ ពាន់លានដុល្លារអាម៉េរិក ដូចដែល ភាគីទាំងពីរបានប្តេជ្ញាក្នុងពេលកន្លងមក ។ ដោយឡែក ក្នុងរយៈពេល ៧ខែដំបូងនៃឆ្នាំ២០២៦ ទំហំពាណិជ្ជកម្មទ្វេភាគីបានកើនដល់ប្រមាណ ៩៤៧ លានដុល្លារអាម៉េរិក កើនឡើង ៥៨,២៧% បើធៀបនឹងរយៈពេលដូចគ្នាក្នុងឆ្នាំ២០២៥។ លោកជំទាវរដ្ឋមន្ត្រី បានបន្តថា កំណើនពាណិជ្ជកម្មដ៏រឹងមាំនេះ បានឆ្លុះបញ្ចាំងពីភាពបំពេញបន្ថែមឱ្យគ្នារវាងសេដ្ឋកិច្ចនៃប្រទេសទាំងពីរ និងបានអំពាវនាវឱ្យមានការពង្រឹងកិច្ចសហប្រតិបត្តិការឱ្យកាន់តែស៊ីជម្រៅ លើសពីការបង្កើនទំហំពាណិជ្ជកម្ម ដោយផ្តោតលើ ការវិនិយោគ ការចាប់ដៃគូអាជីវកម្ម កិច្ចសហប្រតិបត្តិការលើការផ្ទេរបច្ចេកវិទ្យា ការតភ្ជាប់ខ្សែច្រវាក់ផ្គត់ផ្គង់ និងបង្កើនការចូលរួមឱ្យកាន់តែច្រើនរវាងវិស័យឯកជន ជាពិសេសសហគ្រាសធុនតូច និងមធ្យម នៃប្រទេសទាំងពីរ។ ក្នុងន័យនេះ លោកជំទាវរដ្ឋមន្ត្រី បានលើកទឹកចិត្តឱ្យធុរជនម៉ាឡេស៊ីស្វែងរកឱកាសថ្មីៗនៅកម្ពុជា ក្នុងវិស័យដូចជា ទំនិញប្រើប្រាស់ទូទៅ កសិផលកែច្នៃ សុខាភិបាល ថាមពលបៃតង សេវាឌីជីថល ភស្តុភារកម្ម និងវិស័យហាឡាល ជាដើម ព្រមទាំងជំរុញការពង្រឹងកិច្ចសហការរវាងវិស័យឯកជន តាមរយៈការរៀបចំជាប្រចាំនូវវេទិកាផ្គូផ្គងធុរកិច្ច ការផ្សព្វផ្សាយពាណិជ្ជកម្ម ការផ្តល់ព័ត៌មានទីផ្សារ និងការសម្របសម្រួលការវិនិយោគ ជាដើម។ ជាមួយគ្នានេះ លោកជំទាវរដ្ឋមន្ត្រីបានគូសបញ្ជាក់ពីកិច្ចខិតខំប្រឹងប្រែងរបស់កម្ពុជាក្នុងការបង្កើតបរិយាកាសធុរកិច្ចដែលមានភាពបើកចំហ អាចព្យាករណ៍បាន មានតម្លាភាព និងផ្អែកលើគោលការណ៍នីតិរដ្ឋ តាមរយៈការសម្រួល និងការផ្តល់សេវាសាធារណៈតាមប្រព័ន្ធស្វ័យប្រវត្តិកម្ម ព្រមទាំងការបន្តសម្របសម្រួលលើការវិនិយោគលើហេដ្ឋារចនាសម្ព័ន្ធ និងការតភ្ជាប់ ដោយបន្តផ្តោតសំខាន់លើកិច្ចការពារអ្នកប្រើប្រាស់ និងការប្រកួតប្រជែងដោយស្មើភាព។ ជាពិសេស លោកជំទាវរដ្ឋមន្ត្រីបានលើកឡើងពីសក្តានុពលនៃការពង្រឹងកិច្ចសហប្រតិបត្តិការក្នុងវិស័យហាឡាល បន្ទាប់ពីក្រសួងពាណិជ្ជកម្មបានដាក់ឱ្យដំណើរការយុទ្ធនាការទូទាំងប្រទេស កាលពីថ្ងៃទី ៣១ ខែកក្កដា ឆ្នាំ២០២៦ ដើម្បីជំរុញ និងបង្កើនការចុះបញ្ជីផលិតផលហាឡាល ដើម្បីជំរុញការនាំចេញផលិតផលរបស់កម្ពុជាបន្ថែមទៀត។ មុននឹងបញ្ចប់ លោកជំទាវរដ្ឋមន្ត្រីបានបញ្ជាក់ជាថ្មីអំពីការត្រៀមខ្លួនរបស់ក្រសួងពាណិជ្ជកម្ម ក្នុងការបន្តសហការយ៉ាងជិតស្និទ្ធជាមួយ MATRADE ស្ថានទូតម៉ាឡេស៊ី សមាគមធុរកិច្ចម៉ាឡេស៊ី វិស័យឯកជនកម្ពុជា និងដៃគូពាក់ព័ន្ធនានា ដើម្បីប្រែក្លាយទំនាក់ទំនងទ្វេភាគីដ៏រឹងមាំ ទៅជាឱកាសពាណិជ្ជកម្មជាក់ស្តែង និងផលប្រយោជន៍សេដ្ឋកិច្ចពាណិជ្ជកម្មប្រកបដោយចីរភាពសម្រាប់ប្រទេសទាំងពីរ។ លោកជំទាវរដ្ឋមន្ត្រីបានអំពាវនាវដល់វិស័យឯកជននៃប្រទេសទាំងពីរ ឱ្យរួមគ្នាប្រែក្លាយ «ការចូលដល់ទីផ្សារ ទៅជាវត្តមាននៅក្នុងទីផ្សារ» និង «ទំនាក់ទំនងធុរកិច្ច ទៅជាភាពជាដៃគូពាណិជ្ជកម្ម» ដើម្បីរួមចំណែកលើកកម្ពស់កំណើនសេដ្ឋកិច្ច និងវិបុលភាពរួមរបស់ប្រទេសទាំងពីរ៕

កម្ពុជា-ចិនដាក់ឱ្យដំណើរការទូទាត់ឆ្លងដែនតាមឃ្យូអរកូត សម្រួលការទូទាត់រវាងប្រទេសទាំងពីរ

2026/08/18 03:48:08 pm        3353
Facebook Telegram Linkin
កម្ពុជា-ចិនដាក់ឱ្យដំណើរការជាផ្លូវការ ការទូទាត់ឆ្លងដែនតាមឃ្យូអរកូត ដើម្បីសម្រួលការទូទាត់រវាងប្រទេសទាំងពីរ ដោយផ្តល់ លទ្ធភាពឱ្យអ្នកប្រើប្រាស់កម្មវិធីទូទាត់ចល័ត Weixin Pay (ឬ WeChat Pay) អាចស្កេនទូទាត់តាមខេអេចឃ្យូអរកូតក្នុងប្រទេស កម្ពុជា តាមរយៈបណ្តាញប្រតិបត្តិការទូទាត់របស់ Weixin Pay។លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា និងលោក Ben Yang នាយកគ្រប់គ្រង Weixin Pay ប្រចាំ តំបន់អាស៊ីអាគ្នេយ៍ អាមេរិកខាងជើង និងអាមេរិកឡាទីន នៅថ្ងៃទី១៨ ខែសីហា ឆ្នាំ២០២៦ បានអញ្ជើញជាអធិបតី ក្នុងពិធីដាក់ឱ្យ ដំណើរការជាផ្លូវការ នៃការទូទាត់ឆ្លងដែនតាមឃ្យូអរកូត រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន (ដំណាក់ កាលទី១៖ កម្មវិធីទូទាត់ចល័ត Weixin Pay ស្កេនខេអេចឃ្យូអរកូតនៅកម្ពុជា) នៅរាជធានីភ្នំពេញ។ការដាក់ឱ្យដំណើរការការទូទាត់ឆ្លងដែនតាមឃ្យូអរកូតនេះ នឹងសម្រួលការទូទាត់រវាងប្រទេសទាំងពីរ ដោយផ្តល់លទ្ធភាព ឱ្យអ្នកប្រើប្រាស់កម្មវិធីទូទាត់ចល័ត Weixin Pay (ឬ WeChat Pay) អាចស្កេនទូទាត់តាមខេអេចឃ្យូអរកូតក្នុងប្រទេសកម្ពុជា តាម រយៈបណ្តាញប្រតិបត្តិការទូទាត់របស់ Weixin Pay។ ភ្ញៀវទេសចរចិនក៏នឹងទទួលបានភាពងាយស្រួលក្នុងការទូទាត់ថ្លៃអាហារ ទំនិញ ការធ្វើដំណើរ និងកន្លែងកម្សាន្តផ្សេងៗនៅទូទាំងប្រទេសកម្ពុជាផងដែរ។ ការអភិវឌ្ឍគម្រោងទូទាត់សងប្រាក់តាមរយៈឃ្យូអរកូតឆ្លង ដែននេះ បានឆ្លុះបញ្ចាំងជំហានឆ្ពោះទៅមុខ ក្នុងការលើកកម្ពស់កិច្ចសហប្រតិបត្តិការលើប្រព័ន្ធទូទាត់សងប្រាក់រវាងកម្ពុជានិងចិន។លោកជំទាវបណ្ឌិត ជា សិរី ទេសាភិបាល លើកឡើងថា សារៈប្រយោជន៍ជាយុទ្ធសាស្រ្តចំនួន២ ដែលទទួលបានពីការដាក់ឱ្យ ដំណើរការនេះរួមមាន៖ ១/ សម្រាប់ភ្ញៀវទេសចរបរទេសដែលប្រើប្រាស់កម្មវិធីទូទាត់ចល័ត Weixin Pay ជាពិសេសភ្ញៀវទេសចរ ដែលធ្វើដំណើរមកពីប្រទេសចិន អាចទទួលបានបទពិសោធន៍នៃការទូទាត់ដែលរហ័ស សុវត្ថិភាព និងងាយស្រួល ដោយពុំចាំបាច់ប្តូរ រូបិយប័ណ្ណកាន់សាច់ប្រាក់ផ្ទាល់ និងមិនតម្រូវឱ្យមានប័ណ្ណទូទាត់ និង ២/ សម្រាប់សហគ្រាសក្នុងស្រុករបស់កម្ពុជា រាប់ចាប់ពីម្ចាស់ អាជីវកម្ម ឬសហគ្រាសធំៗ រហូតដល់ SME ព្រមទាំងពាណិជ្ជករ អាចទទួលការទូទាត់ពីអតិថិជន ជាជនបរទេសបានកាន់តែច្រើន តាមរយៈខេអេចឃ្យូអរកួតដែលមានស្រាប់ ដោយពុំប្រឈមនឹងការកាត់កម្រៃប្រតិបត្តិការបន្ថែមនោះឡើយ។លោក Ben Yang លើកឡើងផងដែរថា ការដាក់ឱ្យដំណើរការជាផ្លូវការ ការទូទាត់ឆ្លងដែននេះ បង្ហាញពីសមិទ្ធផលដ៏អស្ចារ្យ នៃការធ្វើអន្តរប្រតិបត្តិការការទូទាត់រាយឆ្លងដែនរវាងប្រទេសទាំងពីរ។ ការរប្រើប្រាស់ខេអេចយ្យូអរកូតតែមួយ សម្រាប់ការទូទាត់ទាំង អស់ និងរួមចំណែកយ៉ាងសំខាន់ ក្នុងការពង្រីកលទ្ធភាពនៃការទូទាត់ឱ្យកាន់តែមានសុវត្ថិភាព និងប្រកបដោយប្រសិទ្ធភាព ជាពិសេស ផ្តល់លទ្ធភាពឱ្យភ្ញៀវទេសចរចិន អាចធ្វើប្រតិបត្តិការទូទាត់បានយ៉ាងងាយស្រួល ក្នុងបរិបទនៃសេដ្ឋកិច្ចឌីជីថលកម្ពុជា។ ការអភិវឌ្ឍ ការទូទាត់ឆ្លងដែននេះ មិនត្រឹមតែជាការអភិវឌ្ឍមុខងារដែលសម្រួលក្នុងការទូទាត់របស់ភ្ញៀវទេសចរប៉ុណ្ណោះទេ ប៉ុន្តែក៏ជាការធ្វើអន្តរ ប្រតិបត្តិការទូទាត់ឆ្លងដែន ដោយផ្តោតសំខាន់លើកកម្ពស់ការប្រើប្រាស់រូបិយវត្ថុក្នុងស្រុកសម្រាប់ទូទាត់ សង្គតិភាពនៃបទប្បញ្ញត្តិ និង ការធ្វើឌីជីថលភាវូបនីយកម្មជាមួយពាណិជ្ជករផងដែរ។ លោកក៏បានប្តេជ្ញាបន្តជំរុញកិច្ចសហប្រតិបត្តិការនេះ ជាពិសេសផ្សារភ្ជាប់ ជាមួយទស្សនវិស័យរបស់អាស៊ាន ក្នុងការជំរុញការទូទាត់រាយឱ្យកាន់តែប្រសើរឡើង៕ អត្ថបទ៖ សុន រ៉ាឌី

សមាគមអភិវឌ្ឍន៍សង្គមខ្មែរ៖ ការនាំចេញផលិតផលស្រស់ និងកែច្នៃត្រូវតែដើរទន្ទឹមគ្នា ចៀសវាងការជុញផលិតផលលើទីផ្សារ

2026/08/18 03:35:12 pm        315
Facebook Telegram Linkin
ប្រធានសមាគមអភិវឌ្ឍន៍សង្គមខ្មែរ ថ្លែងថា ការនាំចេញផលិតផលស្រស់ទៅកាន់ទីផ្សារក្រៅប្រទេស និងលើកកម្ពស់ការកែច្នៃចេញ ជាផលិតផលសម្រេច, ស្ថិតក្នុងពេលបច្ចុប្បន្ននេះត្រូវតែដើរទន្ទឹមគ្នា ដើម្បីគាំទ្រដល់កសិករ ចៀសវាងការកក់ស្ទះ ឬការជុញផលិតផល លើទីផ្សារ។ ឯកឧត្តម ស្វាយ សុវណ្ណរិទ្ធ ប្រធានសមាគមអភិវឌ្ឍន៍សង្គមខ្មែរ លើកឡើងក្នុងកិច្ចសម្ភាសន៍ជាមួយ BTV ស្តីពីការនាំចេញ ផលិតផលស្រស់ទៅទីផ្សារប្រទេស និងការជំរុញកែច្នៃផលិតផលក្នុងស្រុក នេះថា វិស័យកសិកម្មបានកំពុងដើរតួយ៉ាងសំខាន់ សម្រាប់ ជាសន្តិសុខស្បៀងក្នុងស្រុកផង ការកែច្នៃ និងបម្រើដល់ទីផ្សារនាំចេញផលដែរ ជាក់ស្តែងការនាំចេញផលិតផលស្រស់របស់កម្ពុជា នៅ ក្នុងរយៈពេល ៧ ខែ ឆ្នាំ២០២៦ឃើញថា មានកំណើនកើនឡើងគួរកត់សម្គាល់ គាំទ្រដោយទីផ្សារសំខាន់ៗដូចជា វៀតណាម ជប៉ុន ជាពិសេសការនំាចេញទៅកាន់ទីផ្សារចិន ដែលបានកំពុងហក់កើនឡើង ស្របតាមកិច្ចព្រមព្រៀងពាណិជ្ជកម្មសេរីនៃប្រទេសទាំងពីរ។ឯកឧត្តម បន្ថែមថា ចំណែកការកែច្នៃផលិតផលចេញពីវិស័យកសិកម្មវិញឃើញថា បាននិងកំពុងកើតឡើងជាបន្តបន្ទាប់ តាមរយៈការទទួលបានរោងចក្រកែច្នៃធំៗ និងការចូលរួមគាំទ្រកែច្នៃរបស់សហគ្រាសក្នុងស្រុកផងដែរ ប៉ុន្តែចំនួននេះនៅមានកម្រិត តិចតួចនៅឡើយ នឹងរំពឹងថា ទៅពេលខាងមុខកម្ពុជានឹងទទួលបានរោងចក្រ សហគ្រាសកែច្នៃកាន់តែច្រើនថែមទៀត។ ឯកឧត្តម បន្តថា ស្របបរិបថនេះ ការជំរុញនាំចេញផលិតផលស្រស់ទៅកាន់ទីផ្សារក្រៅប្រទេស និងលើកកម្ពស់ការកែច្នៃក្នុងស្រុក ចេញជា ផលិតផលសម្រេចផ្សេងៗ ត្រូវតែដើរទន្ទឹមគ្នា (ជំរុញដល់ការនាំចេញផលិតផលស្រស់ផង និងការកែច្នៃផង) ដើម្បីគាំទ្រដល់កសិករ ដែលជាអ្នកដាំដុះ និងនៅក្នុងអនុវិស័យកសិកម្មផ្សេងៗ ដើម្បីចៀសវាងដល់ការកក់ស្ទះ ឬការជុញផលិតផលរបស់ពួកគាត់លើទីផ្សារ។ ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) លើកឡើង ថា ជុំវិញវិស័យឧស្សាហកម្ម, នៅក្នុងពិធីទទួលទានអាហារពេលព្រឹកធុរកិច្ចលើកទី៣ ប្រព្រឹត្តទៅថ្មីៗនេះ ដែលរៀបចំដោយសភា- ពាណិជ្ជកម្មចិនប្រចាំកម្ពុជា និងមានការចូលរួមពីសភាពាណិជ្ជក​ម្មកម្ពុជា គឺបានពិភាក្សាគ្នាទៅវិញទៅមក ដោយក្នុងពិធីនោះវិស័យ ឯកជនក៏បានស្នើសុំឱ្យរាជរដ្ឋាភិបាលគិតគូរនៃការពង្រឹងខ្សែច្រវាក់ផ្គត់ផ្គង់កម្ពុជា ខណៈបច្ចុប្បន្នវិនិយោគិនបរទេសដែលវិនិយោគនៅ ក្នុងស្រុក បាននាំចូលនូវវត្ថុធាតុដើមសម្រាប់ផ្គត់ផ្គង់ផលិតកម្មយ៉ាងច្រើនលើសលុប។ឯកឧត្តម បន្តថា ជុំវិញបញ្ហាខាងលើនេះ រដ្ឋនិងឯកជនក៏បានពិភាក្សានៅលើវិស័យសំខាន់ៗចំនួន៣ ដែលជាវិស័យអាទិភាព របស់កម្ពុជាដែលមានសក្តានុពលធំ ដើម្បីរុញដល់ការផលិតនៅកម្ពុជា បង្កើតបរិមាណតម្លៃកាន់តែប្រសើរ ដូចជាការកែច្នៃកសិ-ឧស្សា ហកម្ម (ការផលិតសំបកបង់ចេញពីកៅស៊ូ និងវិស័យកាត់ដេរជាដើម) ដើម្បីតភ្ជាប់ដល់ខ្សែច្រវាក់ផ្គង់ផ្គង់ទៅរោងចក្រ សហគ្រាស។ បញ្ហានេះប្រសិនបើកម្ពុជាផលិតវត្ថុធាតុដើមបានមួយចំណែកទៀត យើងនឹងមានផលិតកម្មពីដំណាក់កាល ដែលអាចបង្កើតការងារ និងប្រាក់ចំណូលក្នុងសេដ្ឋកិច្ចកាន់តែច្រើន៕ អត្ថបទ៖ សុន រ៉ាឌី 

បណ្ដាញសង្គម

ព័ត៌មានថ្មីៗ

សីតុណ្ហភាពសមុទ្រសកលលោក ឡើងដល់កម្រិតខ្ពស់ជាប់កំណត់ត្រា ខណៈបាតុភូតអែល នីញ៉ូ កាន់តែខ្លាំងក្លា
08/25/2026 09:08 PM
Facebook Telegram Linkin
ជនមូស្លីមនៅទីក្រុងបាកដាដ ប្រទេសអ៊ីរ៉ាក់ ប្រារព្ធខួបកំណើតរបស់ព្យាការី Mohammad
08/25/2026 09:08 PM
Facebook Telegram Linkin
ពលរដ្ឋអ៊ីរ៉ង់អះអាងថា ទីក្រុងតេអេរ៉ង់អាចទប់ទល់បានទណ្ឌកម្ម និងសម្ពាធរបស់សហរដ្ឋអាមេរិក
08/25/2026 08:08 PM
Facebook Telegram Linkin
ទឹកជំនន់បានវាយប្រហារមន្ទីរពេទ្យ និងស្រុកធុរកិច្ចនៅតំបន់ភាគខាងជើងប្រទេសឥណ្ឌា
08/25/2026 08:08 PM
Facebook Telegram Linkin
លោក Trump បញ្ជាក់​ថា កំពុងពិចារណាប្តូរឈ្មោះបឹង Ontario ទៅជាបឹងអាមេរិក ខណៈជម្លោះ​ពាណិជ្ជកម្មកាន់តែក្ដៅ
08/25/2026 08:08 PM
Facebook Telegram Linkin
រដ្ឋមន្ត្រីក្រសួងមហាផ្ទៃប៉ាគីស្ថាន ជួបជាមួយប្រេសិតអាមេរិក ក្រោយ​មាន​កិច្ចពិភាក្សា នៅទីក្រុងតេអេរ៉ង់
08/25/2026 08:08 PM
Facebook Telegram Linkin
រាជរដ្ឋាភិបាលបាននិងកំពុងបន្តវិនិយោគផ្លូវនៅតាមជនបទ ដើម្បីជីវភាពរស់នៅរបស់ប្រជាជន
08/25/2026 07:08 PM
Facebook Telegram Linkin
អបអរសាទរ! ផលិតផលកសិផលខ្មែរជាច្រើនមុខទំនិញបានកំពុងបោះជំហានយ៉ាងខ្លាំងលើឆាកអន្តរជាតិ
08/25/2026 07:08 PM
Facebook Telegram Linkin
រញ្ជួយដីកម្រិត ៥,៨រ៉ិចទ័រ ធ្វើឱ្យ​​ភាគអាគ្នេយ៍នៃ​កោះ​តៃវ៉ាន់មាន​រំញ័រ​យ៉ាង​ខ្លាំង​
08/25/2026 07:08 PM
Facebook Telegram Linkin
សហរដ្ឋអាមេរិកដកប្រទេសស៊ីរីចេញពីបញ្ជីឈ្មោះផ្លូវការ រដ្ឋឧបត្ថម្ភភេរវកម្ម
08/25/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.