ប្រដាល់៖ សហព័ន្ធកីឡាប្រដាល់ឃីកបុកស៊ីងកម្ពុជាត្រូវបានបង្កើតជាផ្លូវការ ហើយក៏មានការទទួលស្គាល់ពីគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡាផងដែរ។ ចំពោះគណៈកម្មាធិការប្រតិបត្តិសហព័ន្ធកីឡាប្រដាល់ឃីកបុកស៊ីងកម្ពុជាអាណត្តិទី១ ដែលមានរយៈពេល ៤ឆ្នាំចាប់ពីឆ្នាំ២០២០ ដល់ឆ្នាំ២០២៤ នេះគឺមានសមាជិកប្រតិបត្តិ ៩រូបដោយមានឯកឧត្ដម ហេង សុខឃន ជាប្រធាន, លោក ម៉ិល កាដូ និងលោក ប៉ែន ស៊ីនេត ជាអនុប្រធាន។
លោកជំទាវ កែ ច័ន្ទមុនី ជាអគ្គលេខាធិការ និងលោក ផេង វណ្ណៈ ជាអគ្គលេខាធិការរង។ លោក តែម សុខវឌ្ឍនា ជាអគ្គហេរញ្ញឹក និងមានសមាជិក ៣រូបទៀតគឺលោក ម៉ន សុខុន, លោក ស៊ិន ចាន់វិច្ឆិកា និងលោក ជ្រា សុភ័ក្ដ្រ។ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានសម្ដែងការគាំទ្រចំពោះការបង្កើតសហព័ន្ធកីឡាប្រដាល់ឃីកបុកស៊ីងកម្ពុជា ដ្បិតកីឡានេះក៏ជាប្រភេទកីឡាក្នុងព្រឹត្តិការណ៍ស៊ីហ្គេមផងដែរ។ ឯកឧត្ដមបានបង្ហាញសុទិដ្ឋិនិយមថា ក្រោយកីឡាឃីកបុកស៊ីងកម្ពុជានឹងមានការរីកចម្រើនឆាប់រហ័ស ព្រោះកម្ពុជាសម្បូរធនធានកីឡាករប្រដាល់គុនខ្មែរ ស្របពេលកីឡាប្រដាល់ឃីកបុកស៊ីងនេះ ក៏មានបច្ចេកទេសខ្លះចេញពីប្រភេទកីឡាក្បាច់គុនបុរាណខ្មែរនេះដែរ ពោលគឺបិទតែការប្រើជង្គង់ និងកែងប៉ុណ្ណោះ។
គួរបញ្ជាក់ដែរថា មុនបង្កើតឲ្យមានសហព័ន្ធកីឡាប្រដាល់ឃីកបុកស៊ីងនេះ កីឡាករកម្ពុជាមួយចំនួនដែលកើតចេញពីប្រដាល់គុនខ្មែរ ក៏ធ្លាប់ប្រឡូលប្រភេទកីឡាមិនមែនអូឡាំពិកនេះ និងបានចូលរួមការប្រកួតអន្តរជាតិជាញឹកញាប់ផងដែរ ដូចជាកីឡាករ គង់ សំបូរ, សុខ ធី, ឡៅ ចិត្រា, ឡៅ ចន្ទ្រា, ខែម ចាន់ និង សុខ សាវិន ជាដើម ដែលធ្លាប់ចូលរួមប្រកួតលើសង្វៀន ONE Championship ក៏ដូចជាការប្រកួតកីឡាស៊ីហ្គេមឆ្នាំ២០១៩ នៅប្រទេសហ្វីលីពីនជាដើម៕ អត្ថបទ៖ លី ឈុនឡា
