Novak Djokovic ឈ្នះ Aslan Karatsev​ ឡើង​វគ្គ​ផ្ដាច់ព្រ័ត្រ Australian Open

50

វាយ​កូន​បាល់៖ ​ក្តី​ស្រមៃ​របស់​កីឡាករ​រុស្ស៊ី Aslan Karatsev​ ដែលជា​កីឡាករ​ឆ្លងកាត់​វគ្គ​ជំ​រុះ​នោះ​ចង់​ឡើង​វគ្គ​ផ្តាច់ព្រ័ត្រ Grand Slam, Australian Open ត្រូវបាន​បញ្ចប់​ត្រឹម​វគ្គ​ពាក់កណ្តាល​ផ្តាច់ព្រ័ត្រ ​ក្រោម​ស្នាដៃ​កីឡាករ​លំដាប់​លេខ១ ពិភពលោក Novak Djokovic​

​​ទោះបីជា​កីឡាករ​លំដាប់​លេខ១១៤ ពិភពលោក Aslan karatsev ​កំពុងមាន​ជំនឿ​ចិត្ត​ពុះកញ្ជ្រោល​នៅពេលនេះ​ក្តី Novak Djokovic នៅតែ​រក្សា​ទំរង់​លេង និង​ផ្ចិតផ្ចង់​គ្រប់ការ​ប្រកួត​ទាំងអស់​មិន​ថា​ជួប​នរណា​។ ​​កីឡាករ​វ័យ ៣៣ឆ្នាំ Djokovic បាន​យកឈ្នះ​លើ​កីឡាករ​រុស្ស៊ី Karatsev​ ដោយ​លទ្ធផល​បច្ចេកទេស ៣សិត​ផ្ទួនៗ ៦, ៤ និង ៦២​។ ​​Novak Djokovic ដែល​កំពុង​សំឡឹង​ឃើញ​ការ​ពន្លាត​កំណត់ត្រា​ឈ្នះ​ជើងឯក Australian Open លើក​ទី៩ នោះនឹងត្រូវ​ជួប​ជាមួយ​កីឡាករ​រុស្ស៊ី Daniil Medvedev រឺ Stefanos Tsitsipas ​នៅ​វគ្គ​ផ្តាច់ព្រ័ត្រ​ថ្ងៃអាទិត្យ​នេះ​។ ​​Daniil Medvedev និង​កីឡាករ​ក្រិ​ក Stefanos Tsitsipas ​នឹង​ជួបគ្នា​នៅ​ថ្ងៃ​សុក្រ​នេះ ខណៈ​អ្នក​ទាំងពីរ​ប៉ុនប៉ងឡើង​វគ្គ​ផ្តាច់ព្រ័ត្រ Australian Open លើកដំបូង​ដូចគ្នា​។

​​កីឡាករ​លំដាប់​លេខ១១៤ ពិភពលោក Aslan Karatsev ​គឺជា​កីឡាករ​មកពី​វគ្គ​ជំ​រុះ​ដំបូង ​ដែល​ឡើង​វគ្គ​ពាក់កណ្តាល​ផ្តាច់ព្រ័ត្រ Australian Open រាប់​ពី​ឆ្នាំ១៩៧៧ ដែល​ធ្វើបាន​ដោយ​កីឡាករ​អូស្ត្រាលី Bob Giltinan​។ ​Karatsev ​ក៏​ជា​កីឡាករ​ដែលមាន​លំដាប់ថ្នាក់​ពិភពលោក​ទាប​ជាងគេ​ដែរ​ ដែល​ឡើងមក​កាន់​វគ្គ​នេះ​គិតពី​ឆ្នាំ១៩៩១ ធ្វើបាន​ដោយ​កីឡាករ​លំដាប់​លេខ ១១៤ ពិភពលោក Patrick McEnroe

អត្ថបទ​៖​នាង សុភា​វុ​ធ