ពលរដ្ឋ​មាន​ជីវភាព​ខ្វះខាត​ក្នុង​ខេត្តកំពង់ធំ​ ទទួល​បាន​អំណោយ​ និង​ផ្ទះ​ថ្មី​ពី​សាខា​កាកបាទក្រហម​

62

កំពង់ធំ ៖ ​អំណោយ​មនុស្សធម៌​របស់​សាខា​កាកបាទក្រហមកម្ពុជា​ខេត្តកំពង់ធំ ត្រូវបាន​ផ្ដល់ជូន​ប្រជាពលរដ្ឋ ​មាន​ជីវភាព​ខ្វះខាត ចំនួន​៦០​គ្រួសារ ​និង​ផ្ទះ​ថ្មី ចំនួន​បី​ខ្នង ត្រូវបាន​ផ្ដល់​ជូន​ដល់​ជន​ចាស់ជរា​គ្មាន​ទីពឹង ស្ត្រី​មេម៉ាយ ​នៅក្នុង​ក្រុង​ស្ទឹងសែន ​ស្រុក​បារាយណ៍ ​និង​ស្រុក​តាំងគោក​។

ឯកឧត្ដម សុខ លូ អភិបាលខេត្ត​កំពង់ធំ និង​ជា​ប្រធាន​គណៈកម្មាធិការ​សាខា​កាកបាទក្រហម កម្ពុជា​ខេត្តកំពង់ធំ ​កាលពីថ្ងៃទី​២២ ខែកុម្ភៈ ​​ម្សិលមិញ ក្នុងពេល​បាន​ដឹកនាំ​ក្រុមការងារ​យក​អំណោយ​ទៅ​ផ្ដល់​ជូន​ប្រជា​ពល រដ្ឋ​ទាំងនេះ​ បាន​ថ្លែងថា ​កាក​បាទក្រហមកម្ពុជា ​ដែល​ដឹកនាំ​ដោយ​សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ​តែងតែ​គិតគូរ ​និង​យកចិត្តទុកដាក់​ពី​សុខទុក្ខ​របស់​ប្រជាពលរដ្ឋ​គ្រប់​ទីកន្លែង ​ដោយ​មិន​មានការ ​ប្រកាន់​នូវ​និន្នាការ​នយោបាយ ពណ៌​សម្បុរ ជាតិ​សាសន៍​នោះទេ​។

ឯកឧត្តម សុខ លូ បាន​អំពាវនាវ​ដល់​ប្រជាពលរដ្ឋ​ទាំងអស់ ឱ្យ​រស់នៅ​តាម​បែប​គន្លង​ថ្មី ក្នុង​បរិបទ​ នៃ​ជំងឺ​កូ​វីដ​១៩​នេះ ត្រូវ​ពាក់​ម៉ាស់ ​ធ្វើ​អនាម័យ​ខ្លួនប្រាណ​ឱ្យបាន​ញឹកញាប់ ​មិន​ត្រូវ​មាន​ការជួប​ជុំគ្នា​នោះ ទេ បើ​មិនចាំបាច់ ​ត្រូវ​រក្សា​គម្លាត​សុវត្ថិភាព​សង្គម និង​គម្លាត​សុវត្ថិភាព​បុគ្គល ចាប់​ពី​មួយ​ម៉ែត្រ​កន្លះ​ឡើង ទៅ ​ហូប​ស្អាត ផឹក​ស្អាត រស់នៅ​ស្អាត ដើម្បី​ទទួល​បាន​នូវ​សុខ​ភាពល្អ ​ទប់ទល់​នឹង​ជំងឺ​នានា ពិសេស ជំងឺ​កូ​វីដ​១៩​ ដែល​កំពុងតែ​រាតត្បាត​ក្នុងប្រទេស​កម្ពុជា​នេះ​។​ ម្យ៉ាងវិញទៀត ត្រូវ​បន្ត​ចូលរួម​គោរព​ច្បាប់ ចរាចរណ៍​ទាំងអស់គ្នា​ ដោយ​បើកបរ​ម៉ូតូ ត្រូវ​ពាក់មួក​សុវត្ថិភាព ទាំង​អ្នកបើកបរ និង​អ្នក​រួម​ដំណើរ ជិះ​រថ យន្ត​ត្រូវ​ពាក់​ខ្សែក្រវាត់ និង​ចូលរួម​ទប់ស្កាត់​បញ្ហា​គ្រឿងញៀន ​ហើយ​សូម​ចាត់ទុកថា​រឿងនេះ ​គឺជា​រឿង របស់​មនុស្ស​គ្រប់រូប​៕

អត្ថបទ​៖ លី សាង​ស៊ីន