អ៊ុយក្រែន៖ ប្រធានចារកម្មយោធាអ៊ុយក្រែនបាននិយាយថា ប្រទេសរុស្ស៊ីកំពុងពិចារណាបង្កើតសេនារីយ៉ូកូរ៉េសម្រាប់ប្រទេសអ៊ុយក្រែន និងការបែងចែកប្រទេសនេះជា ២ផ្នែកបន្ទាប់ពីបរាជ័យក្នុងការដណ្ដើមកាន់កាប់រដ្ឋធានីគីវ និងការផ្ដួលរំលំរដ្ឋាភិបាលរបស់អ៊ុយក្រែន។
ប្រធានអង្គភាពចារកម្មរបស់យោធាអ៊ុយក្រែនលោក Kyrylo Budanov បាននិយាយកាលពីថ្ងៃអាទិត្យ ខណៈត្រូវបានរាយការណ៍ដោយគណនី Telegram របស់ក្រសួងនេះថា ប្រធានាធិបតីរុស្ស៊ីលោក Vladimir Putin នឹងព្យាយាមដាក់បន្ទាត់បែងចែករវាងតំបន់ដែលខ្លួនពុំបានគ្របគ្រង និងតំបន់ដែលខ្លួនបានគ្របគ្រងនៅក្នុងប្រទេសរបស់យើង។ លោក Budanov បាននិយាយថា នេះគឺជាការប៉ុនប៉ងបង្កើតឲ្យមានកូរ៉េខាងជើង និងកូរ៉េខាងត្បូងនៅក្នុងប្រទេសអ៊ុយក្រែន។ និយាយជារួមលោក Vladimir Putin ពិតជាមិនអាចមានសមត្ថភាពលេបយកប្រទេសអ៊ុយក្រែនទាំងមូលបានទេ។
បន្ទាប់ពីជម្លោះនេះអូសបន្លាយជាង ៤សប្ដាហ៍ រុស្ស៊ីបានបរាជ័យក្នុងការដណ្ដើមកាន់កាប់ទីក្រុងធំៗរបស់អ៊ុយក្រែន ហើយក្រុង Moscow បានផ្ដល់សញ្ញាកាលពីថ្ងៃសុក្រថា ខ្លួនកំពុងកាត់បន្ថយមហិច្ឆតារបស់ខ្លួនក្នុងការផ្ដោតលើតំបន់ Donbas នៅក្នុងប្រទេសអ៊ុយក្រែនភាគខាងកើត ជាទីដែលក្រុមផ្ដាច់ខ្លួនគាំទ្រដោយរុស្ស៊ីបានកំពុងប្រយុទ្ធ ជាមួយកងកម្លាំងអ៊ុយក្រែនជាង ៨ឆ្នាំមកនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
