លទ្ធផលពីគណៈកម្មការរៀបចំការបោះឆ្នោតបានបង្ហាញកាលពីថ្ងៃព្រហស្បតិ៍ ១២ មីនា សប្ដាហ៍នេះ ថា គណបក្ស RSP កណ្តាលនិយមរបស់ប្រទេសនេប៉ាល់ ដែលដឹកនាំដោយតារាចម្រៀងរ៉េប លោក Balendra Shah បានឈ្នះសំឡេងភាគច្រើននៅក្នុងសភា ដោយទទួលបានអាសនៈចំនួន ១៨២។

ការបោះឆ្នោតកាលពីថ្ងៃទី៥ មីនា បានជ្រើសរើសសភាតំណាងរាស្រ្តថ្មី ដែលមានសមាជិកចំនួន ២៧៥ រូប ជាសភាជាន់ទាប ដោយមានអាសនៈចំនួន ១៦៥ ត្រូវបានជ្រើសរើសដោយផ្ទាល់ និង ១១០ តាមរយៈការបោះឆ្នោតសមាមាត្រ។

លោក Narayan Prasad Bhattarai អ្នកនាំពាក្យគណៈកម្មការបោះឆ្នោត បាននិយាយនៅក្នុងសេចក្តីថ្លែងការណ៍មួយថា ការរាប់សន្លឹកឆ្នោតសម្រាប់ការបោះឆ្នោតជ្រើសរើសសមាជិកសភាតំណាងរាស្រ្តត្រូវបានបញ្ចប់ហើយ។

នៅក្នុងការបោះឆ្នោតដោយផ្ទាល់ គណបក្ស RSP បានឈ្នះ ១២៥ អាសនៈក្នុងចំណោម ១៦៥ និងទទួលបាន ៥៧អាសនៈទៀតនៅក្នុងការបោះឆ្នោតសមាមាត្រ (PR) ដែលធ្វើឱ្យបក្សនេះខ្វះតែពីរអាសនៈទៀតប៉ុណ្ណោះ ដើម្បីធានាបានសំឡេងភាគច្រើនពីរភាគបីដ៏មានឥទ្ធិពល។

គណបក្សសមាជនេប៉ាល់ (Nepali Congress )ដែលជាគណបក្សធំជាងគេនៅក្នុងសភាចុងក្រោយ ទទួលបាន ៣៨ អាសនៈ ហើយគណបក្ស ម៉ាក្សនិយម (Marxists) តាមពីក្រោយដោយទទួលបាន២៥ អាសនៈ ហើយគណបក្សម៉ៅនិយម ទទួលបានអាសនៈចំនួនប្រាំពីរ។

គួររម្លឹកថា នេះគឺជាការបោះឆ្នោតលើកដំបូងចាប់តាំងពីការតវ៉ាប្រឆាំងអំពើពុករលួយដ៏សាហាវរបស់ក្រុមយុវជន Gen Z ក្នុងខែកញ្ញា ឆ្នាំ២០២៥ កន្លងទៅដែលបានឈាលដល់ការផ្តួលរំលំរដ្ឋាភិបាល៕