អង្គការសហប្រជាជាតិបាននិយាយកាលពីថ្ងៃព្រហស្បតិ៍ ទី ១២ ខែមីនាថា ជម្លោះបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់ បន្ទាប់មកដោយការវាយប្រហាររបស់អ៊ីរ៉ង់លើប្រទេសជាច្រើន បានធ្វើឱ្យមនុស្សរាប់លាននាក់ជម្លៀសខ្លួនចេញនៅទូទាំងតំបន់ និងធ្វើឱ្យស្ថានភាពមនុស្សធម៌ដែលអាក្រក់រួចទៅហើយនោះ កាន់តែធ្ងន់ធ្ងរថែមទៀត។

អ្នកនាំពាក្យអង្គការសហប្រជាជាតិ លោក Stephane Dujarric ដោយដកស្រង់សម្តីភ្នាក់ងារអង្គការសហប្រជាជាតិនិងអាជ្ញាធរជាតិ បាននិយាយថា មនុស្សជាង ៤,១ លាននាក់ត្រូវបានជម្លៀសខ្លួននៅក្នុងប្រទេសអាហ្វហ្គានីស្ថាន អ៊ីរ៉ង់ លីបង់ និងប៉ាគីស្ថាន ចាប់តាំងពីការកើនឡើងជម្លោះចាប់ផ្តើម ខណៈមនុស្សប្រហែល ១១៧.០០០ នាក់ បានភៀសខ្លួនឆ្លងកាត់ព្រំដែន។

នៅក្នុងប្រទេសអ៊ីរ៉ង់តែមួយ ទីភ្នាក់ងារជនភៀសខ្លួនអង្គការសហប្រជាជាតិបានប៉ាន់ប្រមាណថា គ្រួសារចន្លោះពី ៦០០.០០០ ទៅ១លានគ្រួសារ ឬប្រហែល ៣.២ លាននាក់ បានភៀសខ្លួនចេញជាបណ្តោះអាសន្ន ដោយគ្រួសារជាច្រើនបានភៀសខ្លួនចេញពីទីក្រុងតេអេរ៉ង់ និងទីក្រុងធំៗផ្សេងទៀតទៅកាន់តំបន់ភាគខាងជើង និងជនបទ។

លោក Dujarric បាននិយាយថា ភាពវឹកវរនេះក៏បានធ្វើឲ្យប៉ះពាល់ដល់ជនភៀសខ្លួនអាហ្វហ្គានីស្ថានដែលងាយរងគ្រោះនៅក្នុងប្រទេសអ៊ីរ៉ង់ខណៈរដ្ឋាភិបាលលីបង់បានចុះបញ្ជីជនភៀសខ្លួនជាង ៨១៦.០០០ នាក់ រួមទាំងកុមារប្រហែល ២៨៥.០០០ នាក់។

អង្គការសហប្រជាជាតិបានជំរុញឱ្យគ្រប់ភាគីទាំងអស់ការពារជនស៊ីវិល រក្សាដំណើរការចូលផ្នែកមនុស្សធម៌ និងវិលត្រឡប់ទៅរកការចរចាវិញ។