ការិយាល័យតំណាងពាណិជ្ជកម្មសហរដ្ឋអាមេរិក បាននិយាយកាលពីយប់ថ្ងៃព្រហស្បតិ៍ (១២ មីនា) ថា ខ្លួនបានចាប់ផ្តើមការស៊ើបអង្កេតលើការអនុវត្តពាណិជ្ជកម្មមិនយុត្តិធម៌តាម «មាត្រាទី ៣០១» ចំពោះប្រជាជាតិចំនួន ៦០ប្រទេស ពាក់ព័ន្ធនឹងអ្វីដែលខ្លួនហៅថា ជាបរាជ័យក្នុងការចាត់វិធានការលើបញ្ហាពលកម្មដោយបង្ខំ។

រដ្ឋបាលរបស់លោកប្រធានាធិបតីអាមេរិក Donald Trump បានខិតខំស្ដារសម្ពាធពន្ធគយឡើងវិញលើបណ្តាប្រទេសជុំវិញពិភពលោក បន្ទាប់ពីតុលាការកំពូលសហរដ្ឋអាមេរិក បានសម្រេចលុបចោលពន្ធសកលរបស់លោក ថាជាពន្ធខុសច្បាប់ កាលពីថ្ងៃទី២០ ខែកុម្ភៈ កន្លងទៅ។

លោក Jamieson Greer តំណាងពាណិជ្ជកម្មសហរដ្ឋអាមេរិក បានលើកឡើងក្នុងសេចក្តីថ្លែងការណ៍មួយថា៖ «ការស៊ើបអង្កេតទាំងនេះនឹងកំណត់ថា តើរដ្ឋាភិបាលបរទេសបានចាត់វិធានការគ្រប់គ្រាន់ដើម្បីហាមឃាត់ការនាំចូលទំនិញដែលផលិតដោយពលកម្មបង្ខំដែរឬទេ ហើយថា តើបរាជ័យក្នុងការលុបបំបាត់ការអនុវត្តដ៏គួរឱ្យខ្ពើមរអើមទាំងនេះ ប៉ះពាល់ដល់កម្មករ និងអាជីវកម្មរបស់សហរដ្ឋអាមេរិកយ៉ាងដូចម្តេចខ្លះ»។

បញ្ជីឈ្មោះប្រទេសទាំង ៦០នោះ រួមមានដៃគូពាណិជ្ជកម្ម និងសម្ព័ន្ធមិត្តសំខាន់ៗមួយចំនួនរបស់សហរដ្ឋអាមេរិក ដូចជា អូស្ត្រាលី កាណាដា សហភាពអឺរ៉ុប អង់គ្លេស អ៊ីស្រាអែល ឥណ្ឌា កាតា និងអារ៉ាប៊ីសាអ៊ូឌីត ហើយប្រទេសចិន និងរុស្ស៊ី ក៏ស្ថិតក្នុងបញ្ជីនេះដែរ។

លោក Trump បានដាក់ចេញនូវពន្ធគយ ១០% ក្នុងរយៈពេល ១៥ ថ្ងៃ ក្រោមមាត្រាទី១២២ នៃច្បាប់ពាណិជ្ជកម្មឆ្នាំ១៩៧៤ បន្ទាប់ពីមានសេចក្តីសម្រេចរបស់តុលាការកំពូល ខណៈអត្រានៃពន្ធនោះហាក់ប្រែប្រួលបន្តិចបន្តួច។ កាលពីថ្ងៃពុធកន្លងទៅ រដ្ឋបាលរបស់លោកបាននិយាយថា ខ្លួនកំពុងចាប់ផ្តើមការស៊ើបអង្កេតពាណិជ្ជកម្មលើបញ្ហាសមត្ថភាពផលិតកម្មឧស្សាហកម្មលើសកម្រិត លើប្រទេសជាដៃគូពាណិជ្ជកម្មសំខាន់ៗចំនួន ១៦ រួចមកហើយ៕