សហរដ្ឋអាមេរិក បានចេញការលើកលែងរយៈពេល ៣០ថ្ងៃ សម្រាប់បណ្តាប្រទេសនានាក្នុងការទិញប្រេងឆៅ និងផលិតផលប្រេងជាប់ទណ្ឌកម្មរបស់រុស្ស៊ី ដែលកំពុងជាប់គាំងនៅតាមសមុទ្រ។ រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយថា នេះគឺជាជំហានមួយដើម្បីធ្វើឱ្យទីផ្សារថាមពលសកលមានស្ថិរភាពឡើងវិញ បន្ទាប់ពីមានភាពរង្គោះរង្គើដោយសារសង្គ្រាមអ៊ីរ៉ង់។ បន្ទាប់ពីការប្រកាសលើកលែងរបស់សហរដ្ឋអាមេរិក តម្លៃប្រេងបានធ្លាក់ចុះនៅព្រឹកថ្ងៃសុក្រ ទី១៣ ខែមីនា នេះក្នុងទីផ្សារនៅតំបន់អាស៊ី។

វិធានការនេះគឺជាការប៉ុនប៉ងចុងក្រោយបង្អស់របស់រដ្ឋបាលលោកប្រធានាធិបតីអាមេរិក Donald Trump ដើម្បីទប់ស្កាត់តម្លៃថាមពល បន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែលទៅលើអ៊ីរ៉ង់ និងការឆ្លើយតបជាបន្តបន្ទាប់ពីទីក្រុងតេអេរ៉ង់ ដែលបានធ្វើឱ្យភាពតានតឹងក្នុងតំបន់កាន់តែរីកធំឡើង និងបង្កឱ្យមានការកកស្ទះដល់ការដឹកជញ្ជូនតាមច្រកសមុទ្រហ័រមូស ដោយរំខានដល់លំហូរប្រេង និងឧស្ម័នដ៏សំខាន់នៅមជ្ឈិមបូព៌ា និងធ្វើឱ្យតម្លៃថាមពលហក់ឡើងខ្ពស់ទូទាំងពិភពលោក។

កាលពីថ្ងៃពុធ ទីក្រុងវ៉ាស៊ីនតោនបានប្រកាសថា ខ្លួននឹងបញ្ចេញប្រេងចំនួន ១៧២ លានបារ៉ែល ពីឃ្លាំងបម្រុងប្រេងយុទ្ធសាស្ត្រ ក្នុងកិច្ចខិតខំប្រឹងប្រែងដើម្បីទប់ស្កាត់តម្លៃប្រេងដែលកំពុងហក់ឡើងខ្លាំង បន្ទាប់ពីសង្គ្រាមនៅអ៊ីរ៉ង់។ ការបញ្ចេញប្រេងនេះ គឺជាផ្នែកមួយនៃការប្តេជ្ញាចិត្តដ៏ទូលំទូលាយរបស់ទីភ្នាក់ងារថាមពលអន្តរជាតិ IEA ដែលមានសមាជិក ៣២ ប្រទេស ក្នុងការបញ្ចេញប្រេងសរុបចំនួន ៤០០ លានបារ៉ែល។

យោងតាមខ្លឹមសារនៃអាជ្ញាប័ណ្ណ ដែលបានបង្ហោះនៅលើគេហទំព័ររបស់ក្រសួងរតនាគារអាមេរិក បានឱ្យដឹងថា អាជ្ញាប័ណ្ណដែលចេញដោយទីក្រុងវ៉ាស៊ីនតោន កាលពីថ្ងៃព្រហស្បតិ៍នោះ អនុញ្ញាតឱ្យមានការដឹកជញ្ជូន និងការលក់ប្រេងឆៅ និងផលិតផលប្រេងរបស់រុស្ស៊ី ដែលបានផ្ទុកនៅលើនាវាត្រឹមថ្ងៃទី១២ ខែមីនា ហើយមានសុពលភាពរហូតដល់ពាក់កណ្តាលអធ្រាត្រ (ម៉ោងនៅទីក្រុងវ៉ាស៊ីនតោន) នៅថ្ងៃទី១១ ខែមេសា ពោលគឺ ការអនុញ្ញាតនេះមានរយៈពេល ៣០ថ្ងៃគត់៕