យោងតាមអ្នកស្ម័គ្រចិត្តក្នុងស្រុក និងសាក្សីដែលបានឃើញហេតុការណ៍ផ្ទាល់ភ្នែក យ៉ាងហោចណាស់មានជនស៊ីវិល ១៣នាក់ បានស្លាប់ នៅពេលដែលច្រកព្រំដែន Adre រវាងស៊ូដង់ និងឆាដ ត្រូវបានវាយប្រហារដោយយានដ្រូន កាលពីថ្ងៃព្រហស្បតិ៍។

ក្រុមប្រឹក្សាសម្របសម្រួលនៃបន្ទប់សង្គ្រោះបន្ទាន់ El Geneina ដែលជាក្រុមជនស៊ីវិលស្ម័គ្រចិត្ត បាននិយាយនៅក្នុងសេចក្តីថ្លែងការណ៍មួយថា យានដ្រូនមួយគ្រឿង បានបាញ់មីស៊ីលចំនួន ៤គ្រាប់ នៅច្រកព្រំដែន ដោយបានសម្លាប់មនុស្ស ១៣នាក់ ដែលពាក់ព័ន្ធនឹងការជួញដូរប្រេងឥន្ធនៈ ក្នុងនោះមានស្ត្រី ៥ នាក់ និងបានបណ្តាលឲ្យមនុស្ស ៥នាក់ ផ្សេងទៀត រងរបួស។

ក្រុមនេះ បានបញ្ជាក់ថា ការវាយប្រហារនេះ បានបំផ្លាញផ្សារប្រេងឥន្ធនៈនៅច្រកព្រំដែន បង្កការខូចខាតដល់យានជំនិះស៊ីវិលជាច្រើនគ្រឿង និងដុតបំផ្លាញស្តុកផ្គត់ផ្គង់ស្បៀងអាហារយ៉ាងច្រើន។

យោងតាមក្រុមប្រឹក្សានេះ ជនរងគ្រោះទាំងអស់ គឺជាពាណិជ្ជករខ្នាតតូច ដែលបានដឹកជញ្ជូនប្រេងឥន្ធនៈ និងទំនិញពីទីក្រុង Adre នៃប្រទេសឆាដ ទៅកាន់ច្រកព្រំដែន ដោយប្រើរទេះអូសសត្វជាលក្ខណៈប្រពៃណី ដែលជាផ្នែកមួយនៃសកម្មភាពចិញ្ចឹមជីវិតប្រចាំថ្ងៃរបស់ពួកគេ។

ក្រុមនេះបានបន្ថែមថា ច្រកព្រំដែននេះ ក៏ត្រូវបានប្រើប្រាស់សម្រាប់ប្រតិបត្តិការមនុស្សធម៌ផងដែរ រួមទាំងការដឹកជញ្ជូនសម្ភារៈសង្គ្រោះ ថ្នាំពេទ្យ និងសម្ភារៈជម្រក រួមទាំងការធ្វើដំណើររបស់បុគ្គលិកមនុស្សធម៌អន្តរជាតិ។

ទន្ទឹមនឹងនេះ សាក្សីម្នាក់ឈ្មោះ Adam Abdalla ដែលជាអ្នកជួញដូរប្រេងឥន្ធនៈក្នុងស្រុក បានប្រាប់សារព័ត៌មានស៊ីនហួថា ការវាយប្រហារនេះ បានកើតឡើង នៅព្រឹកព្រលឹម ខណៈពេលដែលពាណិជ្ជករ កំពុងរៀបចំចាប់ផ្តើមការងារប្រចាំថ្ងៃរបស់ពួកគេ៕