សភាកោះតៃវ៉ាន់ នៅថ្ងៃសុក្រ (១៣ មីនា) នេះ បានផ្ដល់សិទ្ធិឱ្យរដ្ឋាភិបាលរបស់កោះស្វ័យគ្រប់គ្រងមួយនេះ ចុះហត្ថលេខាលើកិច្ចព្រមព្រៀងជាមួយសហរដ្ឋអាមេរិក សម្រាប់ការទិញសព្វាវុធចំនួន ៤កញ្ចប់ បន្ទាប់ពីក្រុមមន្ត្រីបានព្រមានថា តៃវ៉ាន់នឹងត្រូវរង់ចាំនៅជួរចុងក្រោយគេ ប្រសិនបើខកខានថ្ងៃកំណត់។

រដ្ឋាភិបាលរបស់មេដឹកនាំកោះតៃវ៉ាន់ លោក Lai Ching-te បានព្យាយាមជំរុញឱ្យសភាអនុម័តការចំណាយលើវិស័យការពារជាតិបន្ថែមចំនួន ៤០ ពាន់លានដុល្លារ ប៉ុន្តែក្រុមប្រឆាំងដែលគ្រប់គ្រងអាសនៈភាគច្រើនក្នុងសភា បានលើកឡើងថា សំណើទាំងនោះមិនច្បាស់លាស់ ហើយពួកគេមិនអាចអនុម័ត «មូលប្បទានប័ត្រគ្មានសាច់ប្រាក់» បានទេ បើទោះបីជាពួកគេគាំទ្រវិស័យការពារជាតិក៏ដោយ។

គណបក្សប្រឆាំងទាំងពីរបានដាក់ចេញនូវសំណើផ្ទាល់ខ្លួនដែលមានតម្លៃទាបជាងមុន ប៉ុន្តែអាជ្ញាធរការពារជាតិកោះតៃវ៉ាន់ បានបញ្ជាក់ថា លិខិតផ្ដល់ជូន និងការទទួលយក សម្រាប់ទិញអាវុធរបស់សហរដ្ឋអាមេរិក ត្រូវតែចុះហត្ថលេខា បើមិនដូច្នោះទេ កោះតៃវ៉ាន់នឹងបាត់បង់ចំណាត់ថ្នាក់ក្នុងជួរផលិតកម្ម និងការដឹកជញ្ជូន។

សមាជិកសភាទាំងសងខាងបានព្រមព្រៀងគ្នាកាលពីថ្ងៃព្រហស្បតិ៍ថា រដ្ឋាភិបាលនៅតែអាចចុះហត្ថលេខាលើកិច្ចព្រមព្រៀងជាមុនសិនបាន ទោះបីការពិនិត្យលើសំណើចំណាយនេះមិនទាន់ត្រូវអនុម័តទាន់ពេលក៏ដោយ ហើយបន្ទាប់ពីនោះ សភាកោះតៃវ៉ាន់ក៏បានផ្ដល់ការអនុញ្ញាតតាមផ្លូវច្បាប់ជាផ្លូវការ។ ការអនុញ្ញាតនេះត្រូវបានអនុម័តជាឯកច្ឆន្ទ និងប្រកាសដោយប្រធានសភារបស់កោះមួយនេះ៕