ប្រធានាធិបតីសហរដ្ឋអាមេរិក លោក Donald Trump បានលើកឡើងកាលពីថ្ងៃព្រហស្បតិ៍ (១២ មីនា) ថា សហរដ្ឋអាមេរិក នឹងទទួលបានប្រាក់យ៉ាងច្រើនសន្ធឹកសន្ធាប់ពីតម្លៃប្រេងដែលហក់ឡើងខ្ពស់ ដោយសារសង្រ្គាមជាមួយអ៊ីរ៉ង់ ដែលសុន្ទរកថានេះ បានបង្កឱ្យមានការរិះគន់ពីសមាជិកសភាមួយចំនួន ដោយពួកគេបានចោទលោក Trump ថា គិតតែពីប្រយោជន៍របស់អ្នកមានទ្រព្យ។

តម្លៃប្រេងបានហក់ឡើងក្នុងការជួញដូរសកល ហើយបច្ចុប្បន្ននៅខ្ទង់ ១០០ដុល្លារក្នុងមួយបារ៉ែល ខណៈសង្រ្គាមរវាងអាមេរិក-អ៊ីស្រាអែល ជាមួយអ៊ីរ៉ង់ រាលដាលកាន់តែខ្លាំង។ នាវាដឹកប្រេងឆៅចំនួនពីរគ្រឿង បានឆេះយ៉ាងសន្ធោសន្ធៅនៅកំពង់ផែអ៊ីរ៉ាក់ បន្ទាប់ពីរងការវាយប្រហារ ខណៈនាវាដឹកប្រេងរាប់សិបគ្រឿងទៀត នៅតែជាប់គាំងដោយសារច្រកសមុទ្រ Hormuz ត្រូវបានបិទ។ បញ្ហាទាំងនេះ រួមផ្សំនឹងវិបត្តិផ្សេងទៀត ធ្វើឱ្យតម្លៃប្រេងកាន់តែហក់ឡើងយ៉ាងគំហុកទូទាំងពិភពលោក។

លោក Trump ដែលជាប្រធានាធិបតីមកពីបក្សសាធារណរដ្ឋ បានសរសេរលើបណ្តាញសង្គមថា៖ «សហរដ្ឋអាមេរិក គឺជាអ្នកផលិតប្រេងធំបំផុតនៅក្នុងពិភពលោក ដូច្នេះនៅពេលដែលតម្លៃប្រេងឡើងថ្លៃ អាមេរិករកប្រាក់បានយ៉ាងច្រើន»។ ប៉ុន្តែលោកក៏បានបន្តថា ការទប់ស្កាត់អ៊ីរ៉ង់ មិនឱ្យមានអាវុធនុយក្លេអ៊ែរ គឺមានសារៈសំខាន់ជាងនេះឆ្ងាយណាស់។

ក្រោយមក សមាជិកសភារបស់អាមេរិកជាច្រើនរូបមកពីបក្សប្រជាធិបតេយ្យ បានឆ្លើយតបទៅវិញ ដោយរិះគន់ថា ប្រជាជនអាមេរិកទូទៅ កំពុងរងគ្រោះដោយសារសង្រ្គាមដែលលោក Trump ជាអ្នកចាប់ផ្តើម ហើយអ្នកទទួលប្រយោជន៍ចំពោះតម្លៃប្រេងឡើងខ្ពស់ គឺជាក្រុមហ៊ុនប្រេងធំៗដែលមានទ្រព្យសម្បត្តិច្រើន។ អ្នកនាំពាក្យសេតវិមានមួយរូបបាននិយាយថា តម្លៃប្រេង និងឧស្ម័ន នឹងធ្លាក់ចុះមកវិញ បន្ទាប់ពី «ការរំខានរយៈពេលខ្លី» នៃសង្រ្គាមអាមេរិក-អ៊ីស្រាអែល លើអ៊ីរ៉ង់ ត្រូវបានបញ្ចប់៕