ប្រធានគោលនយោបាយការបរទេសប្លុកអឺរ៉ុប លោកស្រី Kaja Kallas បានលើកឡើងថា សហរដ្ឋអាមេរិកចង់ «បំបែកបំបាក់អឺរ៉ុប» និង «មិនចូលចិត្តសហភាពអឺរ៉ុបឡើយ» នៅក្នុងបទសម្ភាសន៍មួយដែលត្រូវបានចុះផ្សាយដោយកាសែត Financial Times (FT) នៅថ្ងៃសុក្រ (១៣ មីនា) នេះ បន្ទាប់ពីទំនាក់ទំនងឆ្លងមហាសមុទ្រអាត្លង់ទិក មានភាពរកាំរកូសអស់ជាងមួយឆ្នាំមកនេះ។

លោកស្រី Kallas ប្រាប់បទសម្ភាសន៍ FT ថា៖ «អ្វីដែលលោកស្រីគិតថាពិតជាមានសារៈសំខាន់សម្រាប់ឱ្យគ្រប់គ្នាស្វែងយល់គឺ សហរដ្ឋអាមេរិក បានបង្ហាញជំហរយ៉ាងច្បាស់ថា ពួកគេចង់បំបែកបំបាក់អឺរ៉ុប។ ពួកគេមិនចូលចិត្តសហភាពអឺរ៉ុបឡើយ»។

គួរឱ្យដឹងថា ប្រធានាធិបតីអាមេរិក លោក Donald Trump បានដាក់គោលដៅលើប្លុកអឺរ៉ុបជាញឹកញយនៅក្នុងអាណត្តិទីពីររបស់លោក ដោយការដំឡើងពន្ធលើបណ្តាប្រទេសជាសមាជិក និងប្រជាជាតិអឺរ៉ុបដទៃទៀត ព្រមទាំងភាពចម្រូងចម្រាសអំពីការគ្រប់គ្រងដែនដីហ្រ្គីនលែន។ នៅសប្តាហ៍នេះ រដ្ឋបាលរបស់លោក Trump បានបើកការស៊ើបអង្កេតពាណិជ្ជកម្មលើសហភាពអឺរ៉ុប និងប្រទេសដទៃទៀត ចំពោះអ្វីដែលលោកហៅថា ជាការអនុវត្តពាណិជ្ជកម្មមិនយុត្តិធម៌។

យោងតាមរបាយការណ៍ FT លោកស្រី Kallas បាននិយាយថា វិធីសាស្ត្ររបស់អាមេរិកចំពោះសហភាពអឺរ៉ុប គឺឆ្លុះបញ្ចាំងពីយុទ្ធសាស្ត្រដែលប្រើប្រាស់ដោយសត្រូវរបស់ប្លុកអឺរ៉ុប។ លោកស្រីបន្ថែមថា ប្រទេសនានាក្នុងសហភាពអឺរ៉ុប មិនគួរស្វែងរកការចរចាជាមួយលោក Trump ជាលក្ខណៈទ្វេភាគីរៀងខ្លួននោះទេ ប៉ុន្តែផ្ទុយទៅវិញ គួរតែរួមគ្នាដោះស្រាយជាមួយលោកជាធ្លុងមួយ។ ទោះជាយ៉ាងណាក៏ដោយ ចំពោះវិស័យការពារជាតិ លោកស្រី Kallas បានទទួលស្គាល់ថា ប្លុកអឺរ៉ុបចាំបាច់ត្រូវ «ទិញពីអាមេរិក ពីព្រោះអឺរ៉ុបមិនទាន់មានយុទ្ធោបករណ៍ លទ្ធភាព ឬសមត្ថភាពដែលខ្លួនត្រូវការនៅឡើយទេ»៕