អ្នកនាំពាក្យរបស់លោក Volodymyr Zelenskyy បាននិយាយថា ប្រធានាធិបតីអ៊ុយក្រែន បានធ្វើដំណើរទៅដល់ទីក្រុងប៉ារីសហើយ នៅថ្ងៃសុក្រ (ទី១៣ ខែមីនា ឆ្នាំ២០២៦) នេះ ដើម្បីពិភាក្សាជាមួយប្រធានាធិបតីបារាំង លោក Emmanuel Macron ពាក់ព័ន្ធនឹងការបង្កើនសម្ពាធលើរុស្ស៊ី។

ដំណើរទស្សនកិច្ចនេះកើតឡើងនៅពេលដែលការចរចា រវាងទីក្រុងគីវ និងទីក្រុងមូស្គូ ដែលមានការសម្របសម្រួលដោយសហរដ្ឋអាមេរិក ដើម្បីបញ្ចប់ការឈ្លានពានរយៈពេល ៤ឆ្នាំ ត្រូវបានរំខានដោយសារសង្គ្រាមអាមេរិក-អ៊ីស្រាអែល ជាមួយអ៊ីរ៉ង់។

លោក Sergiy Nykyforov អ្នកនាំពាក្យរបស់លោក Zelenskyy បានប្រាប់អ្នកសារព័ត៌មាន រួមទាំងអ្នកកាសែតរបស់សារព័ត៌មាន AFP ផងដែរថា «លោកប្រធានាធិបតីកំពុងស្ថិតនៅទីក្រុងប៉ារីសរួចហើយ» ដោយបានបន្ថែមថា មេដឹកនាំទាំង២ ត្រូវបានគេរំពឹងថា នឹងជួបគ្នាមុនពេលរសៀលតាមពេលវេលាក្នុងស្រុក និងធ្វើសន្និសីទសារព័ត៌មាន។

វិមានក្រឹមឡាំងបានឲ្យដឹងនៅដើមសប្តាហ៍នេះថា កិច្ចប្រជុំដែលបានគ្រោងទុកនេះ នឹងរារាំងដល់ដំណើរការសន្តិភាព ហើយថា «គំនិតនៃការព្យាយាមដាក់សម្ពាធលើប្រទេសរុស្ស៊ី គឺមិនសមហេតុផលឡើយ»។

កិច្ចពិភាក្សា រវាងលោក Macron និងលោក Zelenskyy នឹងផ្តោតលើការបង្កើនសម្ពាធទណ្ឌកម្មលើរុស្ស៊ី ដោយកំណត់គោលដៅ «កងនាវាស្រមោល» នៃនាវាដឹកប្រេងរបស់ប្រទេសនេះ ដែលប្រើសម្រាប់ដឹកជញ្ជូនប្រេង ដោយរំលោភលើទណ្ឌកម្មដែលត្រូវបានដាក់ ដោយសារការឈ្លានពានលើអ៊ុយក្រែន ក្នុងឆ្នាំ២០២២។ នេះបើយោងតាមការិយាល័យប្រធានាធិបតីបារាំង៕