នាថ្ងៃសុក្រ (ទី១៣ ខែមីនា ឆ្នាំ២០២៦) នេះ ប្រទេសចិនបានឲ្យដឹងថា ខ្លួននឹងបរិច្ចាគទឹកប្រាក់ចំនួន ២០០.០០០ដុល្លារ ដល់ឪពុកម្តាយរបស់សិស្សដែលបានបាត់បង់ជីវិត នៅក្នុងហេតុការណ៍ដែលខ្លួនចាត់ទុកថា ការវាយប្រហារដោយមីស៊ីល «មិនរើសអើង» ទៅលើសាលារៀនមួយកន្លែង នៅក្នុងប្រទេសអ៊ីរ៉ង់នៅដើមដំបូងនៃសង្គ្រាមមជ្ឈិមបូព៌ា។

ទីក្រុងតេអេរ៉ង់បានចោទប្រកាន់សហរដ្ឋអាមេរិក និងអ៊ីស្រាអែលថា បានធ្វើការវាយប្រហារដោយមីស៊ីលបណ្ដាលឲ្យមានអ្នកស្លាប់ច្រើនបំផុត លើសាលារៀន នៅភាគខាងត្បូងអ៊ីរ៉ង់ អំឡុងថ្ងៃដំបូងនៃសង្គ្រាម។

របាយការណ៍ប្រព័ន្ធផ្សព្វផ្សាយអ៊ីរ៉ង់ បានឲ្យដឹងថា ពិធីបុណ្យសពត្រូវបានធ្វើឡើង សម្រាប់មនុស្សយ៉ាងហោចណាស់ ១៦៥នាក់ ក្នុងនោះរួមទាំងកុមារ ដែលស្លាប់នៅក្នុងការវាយប្រហារនោះ។ ចំនួនអ្នកស្លាប់មិនទាន់ត្រូវបានផ្ទៀងផ្ទាត់ដោយឯករាជ្យនៅឡើយទេ។ ការស៊ើបអង្កេតរបស់យោធាអាមេរិកលើការវាយប្រហារនេះ កំពុងដំណើរការ។

ក្រសួងការបរទេសទីក្រុងប៉េកាំង បានឲ្យដឹងថា សមាគមកាកបាទក្រហមចិន នឹងបរិច្ចាគទឹកប្រាក់ចំនួន ២០០.០០០ដុល្លារ ជាជំនួយមនុស្សធម៌បន្ទាន់ ដល់សមាគមអឌ្ឍចន្ទក្រហមអ៊ីរ៉ង់ ជាពិសេសសម្រាប់ «ការចូលរួមរំលែកទុក្ខ និងរួមចំណែកខ្លះៗ» ដល់ឪពុកម្តាយរបស់សិស្សដែលបានបាត់បង់ជីវិត។

ជាមួយគ្នានេះ អ្នកនាំពាក្យក្រសួង លោក Guo Jiakun បានហៅការវាយប្រហារនេះថា ជា «ការរំលោភបំពានយ៉ាងធ្ងន់ធ្ងរ» លើច្បាប់មនុស្សធម៌អន្តរជាតិ។ លោក Guo បានប្រាប់អ្នកសារព័ត៌មាននៅក្នុងសន្និសីទសារព័ត៌មានជាប្រចាំថា៖ «ការវាយប្រហារលើសាលារៀន និងកុមារ គឺជាការរំលោភបំពានច្បាប់មនុស្សធម៌អន្តរជាតិធ្ងន់ធ្ងរបន្ថែមទៀត និងរំលោភលើគោលការណ៍សំខាន់នៃការមានសម្បជញ្ញៈ និងសីលធម៌របស់មនុស្ស»៕