​បាល់ទាត់៖ ​ក្រុមបាល់ទាត់​ជំរើសជាតិ​កាណាដា​បាន​កក់​កៅអី World Cup ជា​លើកដំបូង​ក្នុង​រយៈ​ពេល ៣៦​ឆ្នាំក្រោយ​យកឈ្នះ​ក្រុម​ភ្ញៀវ​ហ្សា​ម៉ា​អ៊ិ ៤-០​។ ​​បួន​គ្រាប់​របស់​កាណាដា​ធ្វើបាន​ដោយ Cyle Larin និង Tajon Buchanan នៅ​វគ្គ​ទី១ មុនពេល​ដែល Junior Hoilett និង Adrian Mariappa ភ្លាត់​ចូល​ទី​ខ្លួនឯងធ្វើឱ្យ​កាណាដា​ឈរលើ​គេ​ក្នុង​វគ្គ​ជំ​រុះ​នេះ​មាន ២៨ពិន្ទុ​។

​​រំលឹកថា ​កាណាដា​ខកខាន​មិនដែល​បាន​លេង World Cup តាំងពី​បង្ហាញខ្លួន​ចុងក្រោយ​នៅ​ឆ្នាំ១៩៨៦ លើទឹក​ដីម៉ិ​ក​ស៊ិ​ក​។ ​​ចំណែកឯ​ខ្សែប្រយុទ្ធ Chelsea, Christian Pulisic បាន​ស៊ុត​បញ្ចូល​ទី​ ៣គ្រាប់​ម្នាក់ឯង​ឱ្យ​ក្រុមបាល់ទាត់​អាមេរិក​យកឈ្នះប៉ា​ណា​ម៉ា​លទ្ធផល ៥-១ ខិតជិត​កក់​កៅអី​នៅ World Cup 2022 ប្រទេស​កាតា​។ ​​ប្រធាន​ក្រុម​អាមេរិក​រូបនេះ​រកបាន​គ្រាប់​ដំបូង​នៅ​នាទី​ទី១៧ ដោយ​បាល់​ពិន័យ ១១ម៉ែត្រ​មុនពេល​ដែល​អាមេរិកបន្ថែម​ការនាំ​មុខ ២-០ ដោយ Antonee Robinson នៅ​នាទី​ទី២៣​។ ​​Jesus Ferreira ក៏​រកបាន​គ្រាប់​នាំមុខ ៣-០ នៅ​នាទី​ទី២៧ មុនពេល​ដែល Christian Pulisic ជាថ្មី​ម្តងទៀត​ស៊ុត​បាល់​ពិន័យ ១១ម៉ែត្រ​គ្រាប់​ទី​ពីរ​របស់ខ្លួន​នាំមុខ ៤-០ ឱ្យ​អាមេរិក​នៅ​នាទី​ទី៤៥+២​។​ ​​Hat-Trick របស់​កីឡាករ​វ័យ ២៣ឆ្នាំ​រូបនេះ​សំរេចបាន​នៅ​វគ្គ​ទី២ នាទី​ទី៦៥​។​

​​បី​ពិន្ទុ​នេះ​ធ្វើឱ្យ​អាមេរិក​ខិតជិត​មាន​កៅអី​ស្វ័យប្រវត្តិ​ទៅហើយ ដោយ​ដាច់​ពិន្ទុ​ពី​ក្រុម​នៅ​តំបន់ Play-Off កូ​ស្តា​រី​កា ៣ពិន្ទុ​ខណៈ​សល់​តែមួយ​ប្រកួត​ទៀត​បញ្ចប់​វគ្គ​ជំ​រុះ​។ ​​ស្រដៀង​គ្នា​នឹង​អាមេរិក​ដែរ ក្រុមបាល់ទាត់​ម៉ិ​ក​ស៊ិ​ក​ក៏​រកបាន​បី​ពិន្ទុ​ដ៏​មាន​សារសំខាន់​ផងដែរ​ក្រោយ​យកឈ្នះ​នៅ​ទឹកដី​ហុង​ឌុយ​រ៉ា​ស់ ១-០ ដោយ​គ្រាប់​បាល់​របស់ Edson Alvarez​។ ​បី​ពិន្ទុ​នេះ​មានន័យថា ​ម៉ិ​ក​ស៊ិ​កមាន ២៥ពិន្ទុ​ស្មើគ្នា​ជាមួយ​អាមេរិក​តែ​ឈរ​លេខ៣ ពីលើ​កូ​ស្តា​រី​កា ៣ពិន្ទុ​៕

​អត្ថបទ​៖​នាង សុភា​វុ​ធ