រដ្ឋមន្ត្រីការបរទេស និងសេដ្ឋកិច្ចសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) នៅថ្ងៃសុក្រ (ទី១៣ ខែមីនា ឆ្នាំ២០២៦) នេះ បានអំពាវនាវឲ្យបញ្ឈប់សង្គ្រាមមជ្ឈិមបូព៌ាជាបន្ទាន់ ហើយបានបញ្ជាក់ថា ផលប៉ះពាល់នៃការហក់ឡើងតម្លៃប្រេង និងពាណិជ្ជកម្មដែលរងការរំខាន កំពុងប៉ះពាល់ដល់សេដ្ឋកិច្ចអាស៊ីអាគ្នេយ៍រួចទៅហើយ។

សមាជិកអាស៊ានមួយចំនួន បានចាប់ផ្តើមដាក់ចេញវិធានការ ដើម្បីទប់ទល់នឹងផលប៉ះពាល់ដល់សេដ្ឋកិច្ច ដោយរដ្ឋាភិបាលនានាបានមានចំណាត់ការយ៉ាងឆាប់រហ័ស ដើម្បីសន្សំសំចៃថាមពល ធ្វើឲ្យទីផ្សារក្នុងស្រុកមានស្ថិរភាព និងការពារវិស័យងាយរងគ្រោះ ដូចជាវិស័យទេសចរណ៍ជាដើម។

បន្ទាប់ពីមានកិច្ចប្រជុំពិសេសមួយ ពាក់ព័ន្ធនឹងវិបត្តិនេះ រដ្ឋមន្ត្រីការបរទេសហ្វីលីពីន លោកស្រី Theresa Lazaro បានប្រាប់សន្និសីទសារព័ត៌មានថា៖ «យើងបានបង្ហាញក្ដីបារម្ភយ៉ាងខ្លាំង ចំពោះស្ថានភាពនៅតំបន់មជ្ឈិមបូព៌ា និងផលប៉ះពាល់របស់វា នៅក្នុងតំបន់ ហើយបានសង្កត់ធ្ងន់ពីសារៈសំខាន់នៃការបញ្ឈប់អរិភាពជាបន្ទាន់។ អាស៊ានបានអំពាវនាវឲ្យគ្រប់ភាគីទាំងអស់អនុវត្តការអត់ធ្មត់ខ្ពស់បំផុត»។

ហ្វីលីពីន ដែលកំពុងធ្វើជាប្រធានអាស៊ាននៅឆ្នាំ២០២៦ បានកោះប្រជុំពិសេសនេះ ខណៈដែលកង្វល់អំពីជម្លោះអ៊ីរ៉ង់ កាន់តែធ្ងន់ធ្ងរឡើង។ រដ្ឋមន្ត្រីទាំងនោះបានអំពាវនាវឲ្យខ្សែច្រវាក់ផ្គត់ផ្គង់ថាមពលសកល ត្រូវបានបន្តបើកចំហ និងចាប់ផ្ដើមអនុវត្តយន្តការក្នុងតំបន់ដែលមានស្រាប់ ដើម្បីកាត់បន្ថយផលប៉ះពាល់ដល់សេដ្ឋកិច្ច។

ប្រេងឆៅកំពុងជួញដូរមានតម្លៃជិត ១០០ដុល្លារ ក្នុងមួយបារ៉ែល បន្ទាប់ពីមានការព្រួយបារម្ភ អំពីការផ្គត់ផ្គង់ដែលត្រូវបានបង្កើនឡើង ដោយសារការសន្យាពីមេដឹកនាំកំពូលថ្មីរបស់អ៊ីរ៉ង់ ក្នុងការបន្តបិទច្រកសមុទ្រ Hormuz ដែលជាផ្លូវសម្រាប់ការផ្គត់ផ្គង់ប្រេង ១ភាគ៥ របស់សកលលោក៕