ទីក្រុងប៉េកាំង បានឲ្យដឹងថា រដ្ឋមន្ត្រីការបរទេស លោក Wang Yi និងរដ្ឋមន្ត្រីការពារជាតិ លោក Dong Jun របស់ប្រទេសចិន នឹងធ្វើទសន្សកចិ្ច នៅវៀតណាម នាថ្ងៃអាទិត្យ (ទី១៥ ខែមីនា ឆ្នាំ២០២៦) ខណៈដែលភាគីទាំង២ កំពុងប្រឹងប្រែងលើកកម្ពស់ទំនាក់ទំនង និងពង្រឹងកិច្ចសហប្រតិបត្តិការសន្តិសុខ។

ទីក្រុងប៉េកាំងបានបង្ហាញពីខ្លួនឯងនៅក្នុងតំបន់ថា ជាជម្រើសអាចទុកចិត្តបាន ជំនួសភាពមិនប្រាកដប្រជារបស់ប្រធានាធិបតីអាមេរិក លោក Donald Trump ដែលបានចាប់ផ្តើមដាក់អត្រាពន្ធគយយ៉ាងទូលំទូលាយ កាលពីឆ្នាំមុន ដែលធ្វើឲ្យពាណិជ្ជកម្មពិភពលោកមិនមានស្ថិរភាព។

អ្នកនាំពាក្យក្រសួងការបរទេស លោក Guo Jiakun បានឲ្យដឹងនៅថ្ងៃសុក្រ (ទី១៣ ខែមីនា ឆ្នាំ២០២៦) នេះថា៖ «នៅចំពោះមុខទិដ្ឋភាពអន្តរជាតិបច្ចុប្បន្នដែលមានភាពច្របូកច្របល់ និងប្រែប្រួល វាមានសារៈសំខាន់ណាស់ សម្រាប់ប្រទេសចិន និងវៀតណាម ក្នុងការពង្រឹងការទំនាក់ទំនងជាយុទ្ធសាស្ត្រ និងការសម្របសម្រួលជាយុទ្ធសាស្ត្រឲ្យកាន់តែស៊ីជម្រៅ»។

លោក Guo បានបន្ថែមថា លោក Wang លោក Dong និងរដ្ឋមន្ត្រីសន្តិសុខសាធារណៈ លោក Wang Xiaohong នឹងជួបជាមួយសមភាគីវៀតណាមរបស់ពួកលោក និងពិភាក្សាអំពីប្រធានបទនានា «រួមទាំងកិច្ចសហប្រតិបត្តិការនយោបាយ និងសន្តិសុខទ្វេភាគី ការប្រយុទ្ធប្រឆាំងនឹងឧក្រិដ្ឋកម្ម កិច្ចសហការការពារជាតិ និងស្ថានភាពអន្តរជាតិ និងតំបន់»។ 

រដ្ឋមន្ត្រីរបស់ចិន នឹងស្ថិតនៅក្នុងប្រទេសវៀតណាមរហូតដល់ថ្ងៃអង្គារ៕