ជនភៀសខ្លួនរ៉ូហ៊ីងយ៉ារស់នៅក្នុងប្រទេសបង់ក្លាដែស និយាយថា ពួកគេព្រួយបារម្ភថា នឹងត្រូវបង្ខំចិត្តវិលត្រឡប់ទៅក្នុងព្រៃដ៏គ្រោះថ្នាក់វិញ ដើម្បីរកអុសសម្រាប់ចម្អិនអាហារ ស្របពេលដែលវិបត្តិសង្រ្គាមមជ្ឈិមបូព៌ា គំរាមកំហែងដល់ការផ្គត់ផ្គង់ហ្គាស LPG ។

ជនភៀសខ្លួននៅក្នុងជំរំ Kutupalong បានបង្ហាញការព្រួយបារម្ភរបស់ពួកគេចំពោះការវិលត្រឡប់ទៅរកអុសក្នុងព្រៃវិញ ដែលជាទម្លាប់មួយធ្វើឲ្យស្រ្តី និងកុមារជួបប្រទះសត្វព្រៃកាចសាហាវ ការវាយប្រហារ និងភាពតានតឹងជាមួយអ្នកភូមិក្នុងស្រុក ។

អ្នកស្រី Noor Haba គឺជាជនភៀសខ្លួនរ៉ូហ៊ីងយ៉ាវ័យ ៣២ឆ្នាំមួយរូបរស់នៅក្នុងជំរំ Kutupalong និយាយថា បើសិនជាហ្គាសត្រូវបានកាត់ផ្តាច់ វានឹងកាន់តែលំបាកសម្រាប់ពួកយើង ដើម្បីទ្រទ្រង់គ្រួសារ ។

ជំរំដ៏ធំល្វឹងល្វើយ សាងសង់នៅក្នុងជម្រកសត្វដំរីអាស៊ី កាលពីមុនធ្លាប់រងការកាប់បំផ្លាញព្រៃឈើយ៉ាងធ្ងន់ធ្ងរ ស្របពេលដែលគ្រួសារអស់ប្រេងឥន្ធនៈ ។ ការព្រួយបារម្ភរបស់ពួកគេ កាន់តែធ្ងន់ធ្ងរថែមមួយកម្រិតទៀត ក្រោយទីភ្នាក់ងារជំនួយបញ្ឈប់ការផ្គត់ផ្គង់ធុងហ្គាស LPG ដល់កោះ Bhasan Char ជាទីផ្តល់ជម្រកសម្រាប់ជនភៀសខ្លួនរ៉ូហ៊ីងយ៉ាប្រហែល ៣២.០០០នាក់ ដែលបានបំលាស់ទីទៅរស់នៅទីនោះ ក្នុងរយៈពេលប៉ុន្មានឆ្នាំកន្លងមកនេះ ។

ក្រុមអាជ្ញាធរ និងក្រុមការងារជំនួយ ព្រមានថា ការអាក់ខានខ្សែចង្វាក់ផ្គត់ផ្គង់ហ្គាស LPG របស់បង់ក្លាដែស មិនត្រឹមតែបង្កគ្រោះថ្នាក់ដល់ជនភៀសខ្លួន ១,២លាននាក់ប៉ុណ្ណោះទេ ប៉ុន្តែវានឹងធ្វើឲ្យអន្តរាយផងដែរដល់ការងើបឡើងវិញរបស់បរិស្ថាន ទាំងក្នុង និងជុំវិញជំរំជាទីដែលគម្របព្រៃឈើវិលត្រឡប់មកដូចដើមវិញបន្តិចម្តងៗ បន្ទាប់ពីការណែនាំឲ្យប្រើប្រាស់ហ្គាស LPG ។

បង់ក្លាដែសពឹងផ្អែកស្ទើទាំងស្រុងលើតំបន់ឈូងសមុទ្រ សម្រាប់ការដឹកជញ្ជូនហ្គាសឆ្លងកាត់ច្រកសមុទ្រ Hormuz ដែលបានក្លាយជាតំបន់ហាមឃាត់យ៉ាងមានប្រសិទ្ធភាព ស្របពេលភាពតានតឹងកើនឡើងរវាងអ៊ីរ៉ង់ សហរដ្ឋអាមេរិក និងសម្ព័ន្ធមិត្តរបស់ពួកគេ ៕