​

អ៊ីស្រាអែល បានបំផ្លាញស្ពានមួយកន្លែងនៅភាគខាងត្បូងប្រទេសលីបង់កាលពីថ្ងៃសុក្រ ទី១៣ ខែមីនា និងបានទម្លាក់ខិត្តប័ណ្ណនៅទីក្រុងបេរូតដោយគំរាមកំហែងដល់ការបំផ្លិចបំផ្លាញទ្រង់ទ្រាយធំនៅតំបន់ហ្កាហ្សា ខណៈខ្លួនបានដាក់ពង្រាយកងទ័ពបន្ថែមទៀតដើម្បីប្រយុទ្ធប្រឆាំងក្រុមហេសបូឡាគាំទ្រដោយអ៊ីរ៉ង់ និងបានព្រមានពីការវាយប្រហារបន្ថែមទៀតលើហេដ្ឋារចនាសម្ព័ន្ធរបស់ប្រទេសនេះ។

នៅពេលដែលយន្តហោះចម្បាំងរបស់អ៊ីស្រាអែលបានបាញ់ផ្លោងនៅតំបន់ជាយក្រុងបេរូតដោយការវាយប្រហារតាមអាកាស រដ្ឋមន្ត្រីក្រសួងមហាផ្ទៃលីបង់បាននិយាយថា អាជ្ញាធរមិនអាចផ្តល់ទីជម្រកដល់មនុស្សរាប់ម៉ឺននាក់ដែលស្វែងរកការជ្រកកោននៅក្នុងរដ្ឋធានីបានទេ។ អ៊ីស្រាអែល បានចាប់ផ្តើមការវាយលុករបស់ខ្លួនប្រឆាំងក្រុមហេសបូឡា បន្ទាប់ពីក្រុមនេះបានបើកការបាញ់ប្រហារនៅថ្ងៃទី២ ខែមីនា ដើម្បីសងសឹកចំពោះការសម្លាប់មេដឹកនាំកំពូលអ៊ីរ៉ង់នៅពេលចាប់ផ្តើមសង្គ្រាមអាមេរិក-អ៊ីស្រាអែលលើប្រទេសអ៊ីរ៉ង់។

យោធាអ៊ីស្រាអែលបាននិយាយថា ខ្លួនបានវាយប្រហារស្ពាន Zrarieh ដែលឆ្លងកាត់ទន្លេ Litani កាលពីព្រឹកថ្ងៃសុក្រ ដោយអះអាងថា វាត្រូវបានប្រើប្រាស់ដោយក្រុមសកម្មប្រយុទ្ធហេសបូឡា ដើម្បីធ្វើដំណើររវាងភាគខាងជើងនិងខាងត្បូងប្រទេសលីបង់។ យោធា មិនបានផ្តល់ភស្តុតាងសម្រាប់ការអះអាងនេះទេ។ វាទំនងជាលើកដំបូងហើយ ដែលអ៊ីស្រាអែលបានទទួលស្គាល់ការវាយប្រហារលើហេដ្ឋារចនាសម្ព័ន្ធស៊ីវិលក្នុងអំឡុងពេលយុទ្ធនាការយោធាបច្ចុប្បន្នរបស់ខ្លួននៅក្នុងប្រទេសលីបង់។