អ៊ុយក្រែន និងសម្ព័ន្ធមិត្តអឺរ៉ុបរបស់ខ្លួន បានរិះគន់ការសម្រេចចិត្តរបស់រដ្ឋបាលប្រធានាធិបតីសហរដ្ឋអាមេរិក លោក Donald Trump ក្នុងការបន្ធូរបន្ថយទណ្ឌកម្មដោយផ្នែកប្រឆាំងរុស្ស៊ី ក្នុងពេលមានការកើនឡើងតម្លៃថាមពលទាក់ទងនឹងសង្គ្រាមនៅអ៊ីរ៉ង់។

ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃសុក្រថា ចំណាត់ការនេះនឹង «ពង្រឹងជំហររបស់រុស្ស៊ី» ខណៈកិច្ចខិតខំប្រឹងប្រែងគាំទ្រដោយសហរដ្ឋអាមេរិក ដើម្បីឈានដល់កិច្ចព្រមព្រៀងបញ្ចប់សង្គ្រាមជាងបួនឆ្នាំមកនេះ ទំនងជាជាប់គាំង។ លោក Zelenskyy បានពិភាក្សាជាមួយសមភាគីបារាំងរបស់លោក គឺលោក Emmanuel Macron ក្នុងអំឡុងពេលសន្និសីទសារព័ត៌មាននៅទីក្រុងប៉ារីសថា «រុស្ស៊ីកំពុងចំណាយប្រាក់ដែលខ្លួនរកបានពីការលក់ថាមពល ទៅលើសព្វាវុធ ហើយទាំងអស់នេះត្រូវបានប្រើប្រាស់ប្រឆាំងមកលើយើង»។ សហរដ្ឋអាមេរិក កាលពីថ្ងៃព្រហស្បតិ៍សប្តាហ៍នេះបានចេញការលើកលែងរយៈពេល៣០ថ្ងៃសម្រាប់ប្រទេសនានា ដើម្បីទិញប្រេងនិងផលិតផលប្រេងរបស់រុស្ស៊ីដែលត្រូវបានដាក់ទណ្ឌកម្ម ដែលបច្ចុប្បន្នជាប់គាំងនៅសមុទ្រ ខណៈទីផ្សារថាមពលសកលបានរង្គោះរង្គើដោយសង្គ្រាមរបស់សហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់។ លោក Macron និងមេដឹកនាំអឺរ៉ុបដទៃទៀត បានរិះគន់ការសម្រេចចិត្តរបស់រដ្ឋបាល លោក Trump ក្នុងការបន្ធូរបន្ថយការរឹតបន្តឹងសេដ្ឋកិច្ចលើប្រទេសរុស្ស៊ី ដែលបានប្រឈមនឹងទណ្ឌកម្មសកលចាប់តាំងពីរុស្ស៊ី បានឈ្លានពានអ៊ុយក្រែនក្នុងខែកុម្ភៈ ឆ្នាំ២០២២។ លោក Antonio Costa ប្រធានក្រុមប្រឹក្សាអឺរ៉ុប បាននិយាយថា ចំណាត់ការនេះ «គួរឱ្យព្រួយបារម្ភខ្លាំង ព្រោះវាប៉ះពាល់ដល់សន្តិសុខអឺរ៉ុប»។ លោក Costa បានសរសេរនៅលើបណ្តាញ X ថា «ការកើនឡើងសម្ពាធសេដ្ឋកិច្ចលើរុស្ស៊ីឲ្យទទួលយកការចរចាសម្រាប់សន្តិភាពដ៏យុត្តិធម៌ និងយូរអង្វែង»។