ប្រធានាធិបតីគុយបា លោក Miguel Diaz-Canel បាននិយាយកាលពីថ្ងៃសុក្រថា គុយបា បានជួបចរចាជាមួយសហរដ្ឋអាមេរិក ដើម្បីពិភាក្សាអំពីភាពខ្វែងគំនិតគ្នាសំខាន់ៗរវាងប្រទេសទាំងពីរ និងដោះស្រាយបញ្ហាដែលអាចធ្វើទៅបានតាមរយៈការសន្ទនា។

លោក Gong Xiangcheng អ្នកសារព័ត៌មាននៃក្រុមសារព័ត៌មានចិន (CMG) បានដកស្រង់សម្តីរបស់លោក Diaz-Canel នៅក្នុងសន្និសីទសារព័ត៌មានមួយថា «ប្រធានាធិបតីគុយបា លោក Miguel Diaz-Canel បានបញ្ជាក់កាលពីថ្ងៃសុក្រថា មន្ត្រីគុយបា កាលពីពេលថ្មីៗនេះ ទើបតែបានជួបចរចាជាមួយអ្នកតំណាងរដ្ឋាភិបាលសហរដ្ឋអាមេរិក ដើម្បីពិភាក្សាអំពីភាពខ្វែងគំនិតគ្នាសំខាន់ៗ ព្រមទាំងដើម្បីវាយតម្លៃឆន្ទៈនយោបាយក្នុងការចាត់វិធានការជាក់ស្តែងដើម្បីផលប្រយោជន៍របស់ប្រទេសទាំងពីរ»។

គួបញ្ជាក់ថា ការសន្ទនានៅតែស្ថិតក្នុងដំណាក់កាលដំបូង លោក Diaz-Canel បាននិយាយថា គុយបាមានឆន្ទៈក្នុងការបន្តការផ្លាស់ប្តូរជាមួយសហរដ្ឋអាមេរិកដោយផ្អែកលើសមភាព និងការគោរពចំពោះប្រព័ន្ធនយោបាយ អធិបតេយ្យភាព និងការសម្រេចចិត្តដោយខ្លួនឯងទៅវិញទៅមក ក្នុងគោលបំណងរក្សាសន្តិសុខនិងស្ថិរភាពនៅក្នុងប្រទេសទាំងពីរនិងតំបន់ ដោយកំណត់វិស័យនៃកិច្ចសហប្រតិបត្តិការ និងបញ្ចៀសការប្រឈមមុខដាក់គ្នា។

លោកបានសង្កត់ធ្ងន់ថា ដំណើរការសន្ទនាមានភាពទន់ភ្លន់ ហើយគុយបា នឹងបន្តទៅមុខដោយប្រុងប្រយ័ត្ន ការទទួលខុសត្រូវ និងភាពម៉ឺងម៉ាត់។ លោកប្រធានាធិបតី បានស្តីបន្ទោសការបិទផ្លូវថាមពលរបស់សហរដ្ឋអាមេរិកចំពោះការដាក់សម្ពាធយ៉ាងខ្លាំងលើប្រទេសគុយបា ដោយនិយាយថា គ្មានការដឹកជញ្ជូនប្រេងឥន្ធនៈណាមួយបានទៅដល់ប្រទេសកោះមួយនេះទេ ក្នុងរយៈពេលបីខែកន្លងទៅនេះ។