យោងតាមប្រភពផ្លូវការរបស់លីបង់ អ៊ីស្រាអែលបានបន្តការវាយប្រហារតាមអាកាសនៅភាគខាងត្បូងប្រទេសលីបង់នៅយប់ថ្ងៃសុក្រ ដោយបានសម្លាប់មនុស្សយ៉ាងហោចណាស់ ១៣នាក់ និងបានត្រូវចំបរិវេណកងវរសេនាធំនេប៉ាល់នៃកងកម្លាំងបណ្តោះអាសន្នរបស់អង្គការសហប្រជាជាតិ នៅលីបង់ (UNIFIL)។

មជ្ឈមណ្ឌលប្រតិបត្តិការសង្គ្រោះបន្ទាន់របស់ក្រសួងសុខាភិបាលលីបង់ បាននិយាយថា ការវាយប្រហាររបស់អ៊ីស្រាអែល បានកំណត់គោលដៅដោយផ្ទាល់ទៅលើចំណុចសង្គ្រោះបន្ទាន់រួមគ្នាដែលដំណើរការដោយអាជ្ញាធរសុខភាពឥស្លាមនេះ និងក្រុមកាយរឹទ្ធិឥស្លាម Risala ដោយបានសម្លាប់អ្នកជួយសង្គ្រោះពីរនាក់ និង ៥នាក់ផ្សេងទៀតរងរបួស។

នៅក្នុងទីក្រុង Nabatieh មនុស្ស ៦នាក់ ក្នុងនោះមានក្មេងស្រីម្នាក់ ត្រូវបានសម្លាប់ នៅពេលដែលយន្តហោះចម្បាំងអ៊ីស្រាអែល បានវាយប្រហារផ្ទះមួយខ្នង នៅក្នុងសង្កាត់ Al-Rahibat នៃទីក្រុងនេះ។ នេះបើយោងតាមទីភ្នាក់ងារសារព័ត៌មានជាតិរបស់រដ្ឋលីបង់។

ការវាយប្រហារមួយផ្សេងទៀតរបស់អ៊ីស្រាអែលនៅលើទីក្រុងព្រំដែនភាគខាងត្បូង Bint Jbeil បានសម្លាប់មនុស្ស បីនាក់ ខណៈដែលកុមារពីរនាក់ ត្រូវបានសម្លាប់ នៅពេលដែលការវាយប្រហារតាមអាកាស បានត្រូវចំអគារមួយ នៅក្នុងទីក្រុងឆ្នេរសមុទ្រ Ghazieh៕