​រុស្ស៊ី៖ ក្រុមហ៊ុន Roskomnadzor ដែល​ជា​និយតករ​ក្រុមហ៊ុន​ទូរគមនាគមន៍ និង​ប្រព័ន្ធ​សែន​ស៊រ​ Internet របស់​រុស្ស៊ី កំពុង​ព្រមាន​សារព័ត៌មាន​នានា​ក្នុង​ប្រទេស​រុស្ស៊ី​ មិន​ឲ្យ​ចេញផ្សាយ​ការ​សម្ភាសន៍​ថ្មី​រវាង​ប្រធានាធិបតី​អ៊ុយ​ក្រែ​ន​លោក Volodymyr Zelensky និង​អ្នកសារព័ត៌មាន​រុស្ស៊ី​ឡើយ។​

​សារព័ត៌មាន Washington Post បាន​រាយការណ៍​ថា ក្រុមហ៊ុន​ទូរគមនាគមន៍ និង​បច្ចេកវិទ្យា​សហព័ន្ធ Roskomnadzor និយាយ​ថា ខ្លួន​កំពុង​ស៊ើបអង្កេត​លើ​សារព័ត៌មាន​មួយ​ចំនួន​ ដែល​បាន​រៀប​ចំ​បទ​សម្ភាសន៍​ដើម្បី​កំណត់​ពី​វិសាលភាព​នៃ​ការទទួលខុសត្រូវ និង​ការ​ចាត់​វិធានការ​ឆ្លើយ​តប​។ លោក Zelenskyy បាន​ចែករំលែក​បទសម្ភាសន៍​នេះ​នៅ​លើ​បណ្ដាញ​សង្គម Telegram របស់​លោក។ លោក​បាន​ប្រាប់​ក្រុម​អ្នកសារព័ត៌មាន​ថា ជនជាតិ​រុស្ស៊ី​ត្រូវតែ​គាំទ្រ​ការពិត ហើយ​លោក​ចង់​ជួប​លោក​ប្រធានាធិបតី​រុស្ស៊ី Vladimir Putin នៅ​ក្នុង​ប្រទេស​អព្យា​ក្រឹត្យ​មួយ ដូច្នេះ​ពួក​គេ​អាច​ចាប់ផ្ដើម​ចរចា​ដើម្បី​បញ្ចប់​ការ​លុកលុយ​ចូល​អ៊ុយ​ក្រែ​ន​។​

​កាលពី​ដើមខែ​នេះ​លោក Putin បាន​ចុះហត្ថលេខា​លើ​វិធានការ​មួយ​ ដែល​ហាមប្រាម​ព័ត៌មាន​ក្លែង​ក្លាយ​អំពី​សកម្មភាព​យោធា​របស់​រុស្ស៊ី​។ ​ច្បាប់​នេះ​ហាម​មនុស្ស​មិន​ឲ្យ​ហៅ​ជម្លោះ​នៅ​អ៊ុយ​ក្រែ​ន​ថា ​ជា​ការ​ឈ្លានពាន ឬ​សង្គ្រាម ហើយ​អ្នក​ដែល​ត្រូវ​បាន​រក​ឃើញ​ថា​បាន​បំពាន​ច្បាប់​នេះ អាច​ប្រឈម​នឹង​ការ​ជាប់​ពន្ធនាគារ​រយៈ​ពេល​ ១៥ឆ្នាំ៕

អត្ថបទ៖ សុខមាន