​ប្រណាំង​រថយន្ត៖ ជើងឯក Formula One ពិភពលោក Max Verstappen បាន​ប្រជែង​ឈ្នះ​ការ​ប្រ​កួតប្រណាំង F1 នៅ​ប្រទេសអារ៉ាប៊ីសាអ៊ូឌីត ក្រោយ​មានការ​ប្រកួតប្រជែង​ខ្លាំង​ជាថ្មី​ម្តងទៀត​ជាមួយ Charles Leclerc​។ ​​ចេញដំណើរ​ដំបូង​កីឡាករ​របស់ Red Bull មួយរូប​ទៀត Sergio Perez ដែល​ឈ្នះ​ការប្រណាំង​យក​ទី​ចេញដំណើរ​កាលពី​ថ្ងៃ​សៅរ៍​នោះ មិនអាច​រក្សា​ការនាំ​មុខ​ដល់ទី​បញ្ចប់​ឡើយ បន្ទាប់ពី​មានការ​ប្រជែង​ខ្លាំង​ពី​កីឡាករ​របស់ Ferrari ទាំងពីរ Charles Leclerc និង Carlos Sainz ក៏ដូចជា​មិត្ត​រួម​ក្រុម Max Verstappen​។

​​កីឡាករ​ម៉ូ​ណា​កូ Charles Leclerc បាន​នាំមុខ​ជាច្រើន​ជុំ​ជាមួយនឹង​ការ​ប្រដេញ​ពីក្រោយ​ដោយ Max Verstappen​។ ​​កីឡាករ​ទាំងពីរ​កាល​ពី​ទីលាន​ទីមួយ​នៅ​បា​រ៉ែ​ន​ក៏​ប្រជែង​គ្នា​ខ្លាំង​ដែរ​ដោយ Charles Leclerc ជា​អ្នកឈ្នះ ​ខណៈ Verstappen មាន​បញ្ហា​គ្រឿង​ម៉ាស៊ីន​នៅ​ទីបញ្ចប់​។​ ​​តែ​លើក​នេះ Verstappen ជា​អ្នកឈ្នះ​វិញ​ម្តង​ក្រោយ​វ៉ា​ផុត Charles Leclerc នៅ​បួន​ជុំ​ចុងក្រោយ​ ខណៈ​អ្នក​ទាំងពីរ​មកដល់​ទី​ព្រ័ត្រ​ប្រកៀក​ប្រកិត​គ្នា​។ ​​លេខ៣ បាន​ទៅ​កីឡាករ​របស់ Ferrari មួយរូប​ទៀត Carlos Sainz ដែល​មានន័យថា​ ពីរ​ទីលាន​ជាប់​គ្នា​ហើយ​ដែល​កីឡាករ​របស់ Ferrari ទាំងពីរ​នាក់​ឈរលើ​វេទិកា​កិ​ត្ត​យស​។ ​​ទោះជា​បាន​ត្រឹម​លេខ២ ក្តី Charles Leclerc បន្ត​នាំមុខគេ​ក្នុង​តារាង​ជើងឯក​មាន ៤៥ពិន្ទុ​តាម​ពី​ក្រោយ​ដោយ Carlos Sainz មាន ៣៣ពិន្ទុ និង​លេខ៣ Max Verstappen មាន ២៥ពិន្ទុ​។​ ​ចំណែក​ជើងឯក​ពិភពលោក ៧សម័យ Lewis Hamilton មិន​ជោគជ័យ​ឡើយ​នៅ​អារ៉ាប៊ីសាអ៊ូឌីត​នេះ​ ដោយ​បាន​បញ្ចប់​ត្រឹម​ចំណាត់ថ្នាក់​លេខ ១០៕

​អត្ថបទ​៖​នាង សុភា​វុ​ធ