អ៊ីស្រាអែលបាននិយាយកាលពីថ្ងៃអាទិត្យ ទី១៥ ខែមីនា ថា ខ្លួននៅតែមានគោលដៅរាប់ពាន់កន្លែងទៀតដើម្បីវាយប្រហារនៅក្នុងប្រទេសអ៊ីរ៉ង់ ខណៈសាធារណរដ្ឋអ៊ីស្លាមមួយនេះបានព្រមានប្រទេសដទៃ កុំឱ្យចូលរួមក្នុងសង្គ្រាម ដែលបានរាលដាលនៅទូទាំងតំបន់មជ្ឈិមបូព៌ា។

ការព្រមានរបស់ទីក្រុងតេអេរ៉ង់ បានធ្វើឡើងនៅពេលដែលទីក្រុងរ៉ូម បានរាយការណ៍ថាមូលដ្ឋានមួយកន្លែងនៅក្នុងប្រទេសគុយវ៉ែតដែលទទួលកងទ័ពអាមេរិក និងអ៊ីតាលី ត្រូវបានវាយប្រហារដោយយានដ្រូន ខណៈអ៊ីរ៉ង់បានប្រាប់ប្រទេសជិតខាងខ្លួនថាអ៊ីរ៉ង់មានភស្តុតាងគ្រប់គ្រាន់ ដែលមូលដ្ឋានរបស់សហរដ្ឋអាមេរិកនៅលើទឹកដីរបស់ប្រទេសទាំងនេះកំពុងត្រូវបានប្រើប្រាស់ដើម្បីបើកការវាយប្រហារ។

អ្នកនាំពាក្យយោធាអ៊ីស្រាអែល ឧត្តមសេនីយ៍ Effie Defrin បាននិយាយថា «យើងនៅតែមានគោលដៅរាប់ពាន់កន្លែងទៀតនៅក្នុងប្រទេសអ៊ីរ៉ង់ ហើយយើងកំពុងកំណត់អត្តសញ្ញាណគោលដៅថ្មីៗជារៀងរាល់ថ្ងៃ» ជាងពីរសប្តាហ៍នៅក្នុងយុទ្ធនាការតាមអាកាសរបស់សហរដ្ឋអាមេរិក និងអ៊ីស្រាអែលប្រឆាំងប្រទេសអ៊ីរ៉ង់។

ទីក្រុងតេអេរ៉ង់ បានឆ្លើយតបទៅនឹងសង្គ្រាមដោយគំរាមកំហែងដល់ការដឹកជញ្ជូនទំនិញនៅច្រកសមុទ្រ Hormuz ដ៏សំខាន់ ដែលជាធម្មតាមើលឃើញការឆ្លងកាត់២០ភាគរយនៃការនាំចេញប្រេង និងឧស្ម័នសកល ជាបញ្ហាមួយដែលប្រធានាធិបតីសហរដ្ឋអាមេរិក លោក Donald Trump បានពិភាក្សាជាមួយនាយករដ្ឋមន្ត្រីអង់គ្លេស លោក Keir Starmer កាលពីថ្ងៃអាទិត្យ ។

កាលពីថ្ងៃមុន លោក Trump បានអំពាវនាវឱ្យប្រទេសដទៃធ្វើការជាមួយទីក្រុងវ៉ាស៊ីនតោនដើម្បីធានាសុវត្ថិភាពដល់ច្រកសមុទ្រនេះ ដែលការបិទច្រកសមុទ្រ បានធ្វើឱ្យទីផ្សារថាមពលធ្លាក់ចូលទៅក្នុងភាពវឹកវរចាប់តាំងពីជម្លោះបានផ្ទុះឡើង។