រដ្ឋមន្ត្រីការបរទេសអ៊ីរ៉ង់និយាយថា ការវាយប្រហាររបស់ប្រទេសលោកដាក់គោលដៅតែលើ «មូលដ្ឋានកងទ័ព និងទីតាំងយោធារបស់សហរដ្ឋអាមេរិក»នៅក្នុងតំបន់ ពុំមែនលើទីតាំងលំនៅឋានឬស៊ីវិល ណាមួយឡើយ ជាផ្នែកមួយនៃ«ការការពារខ្លួន»ប្រឆាំងការវាយប្រហាររបស់សហរដ្ឋអាមេរិក។

លោក Abbas Araghchi បានធ្វើអត្ថាធិប្បាយបែបនេះនៅក្នុងបទសម្ភាសន៍មួយធ្វើឡើងដោយប្រព័ន្ធផ្សព្វផ្សាយអារ៉ាប់ កាលពីថ្ងៃអាទិត្យ។ លោកបាននិយាយថា គន្លងបាញ់នៃមីស៊ីលដែលត្រូវបានប្រើដើម្បីវាយប្រហារកោះ Kharg របស់អ៊ីរ៉ង់បានបង្ហាញថា វាត្រូវបានបាញ់ចេញពីទីតាំងពីរកន្លែងនៅប្រទេសអារ៉ាប់រួម។ លោក Araghchi បាននិយាយថា មីស៊ីលទាំងនោះ ត្រូវបានបាញ់ចេញពីអ្វីដែលជាតំបន់លំនៅឋាន ហើយកងកម្លាំងអាមេរិក «លាក់ខ្លួននៅពីក្រោយតំបន់លំនៅឋាន»។ រដ្ឋមន្ត្រីរូបនេះ ក៏បានអះអាងផងដែរថា សហរដ្ឋអាមេរិកបានផលិតយន្តហោះគ្មានមនុស្សបើកស្រដៀងគ្នានឹងយានដ្រូនអត្តឃាត Shahed របស់អ៊ីរ៉ង់។ លោកបានបង្ហាញថា អ៊ីរ៉ង់ ទទួលបានព័ត៌មានដែលបង្ហាញថា ឧបករណ៍បែបនេះអាចត្រូវបានបាញ់បង្ហោះដើម្បីវាយប្រហារគោលដៅនានានៅក្នុងប្រទេសអារ៉ាប់។ លោក Araghchi បង្ហាញថា អ៊ីរ៉ង់ត្រៀមរួចជាស្រេចដើម្បីស៊ើបអង្កេតការវាយប្រហារបែបនេះ រួមគ្នាជាមួយប្រទេសជាច្រើនទៀតនៅក្នុងតំបន់។ លោកបានអះអាងថា ការវាយប្រហារមួយចំនួន អាចមានន័យថាធ្វើឱ្យប៉ះពាល់ដល់ទំនាក់ទំនងមិត្តភាពរវាងអ៊ីរ៉ង់ និងប្រទេសជិតខាងអារ៉ាប់របស់ខ្លួន។ លោក Araghchi បាននិយាយបន្ថែមថា លោកជឿជាក់ថា តាមរយៈការកំណត់គោលដៅលើទីតាំងស៊ីវិល អ៊ីស្រាអែលព្យាយាមជំរុញទំនាក់ទំនងរវាងអ៊ីរ៉ង់ និង «មិត្តភក្តិអារ៉ាប់» ឲ្យឈានទៅរកផ្លូវអវិជ្ជមាន។ ទន្ទឹមនឹងនេះ ក្រសួងការពារជាតិអារ៉ាប់រួម បានសរសេរនៅក្នុងសារមួយនៅលើបណ្តាញផ្សព្វផ្សាយសង្គមកាលពីថ្ងៃអាទិត្យថា ការការពារដែនអាកាសរបស់ខ្លួនកំពុងឆ្លើយតបទៅនឹងការគំរាមកំហែងដោយមីស៊ីល និងយានដ្រូនពីអ៊ីរ៉ង់។ យោធាប្រទេសបារ៉ែន ក៏បានប្រើប្រាស់ប្រព័ន្ធផ្សព្វផ្សាយសង្គមផងដែរ ដោយនិយាយថា ខ្លួនកំពុងប្រឈមនឹងរលកវាយប្រហារជាបន្តបន្ទាប់ពីអ៊ីរ៉ង់។