ការតវ៉ាបានផ្ទុះឡើងនៅទូទាំងប្រទេសឥណ្ឌាកាលពីថ្ងៃអាទិត្យ ទី១៥ ខែមីនា ខណៈប្រជាជន និងគណបក្សនយោបាយក្នុងតំបន់បានធ្វើបាតុកម្ម និងបិទផ្លូវនៅក្នុងទីក្រុងជាច្រើន ដោយលើកឡើងពីកង្វះឧស្ម័នចម្អិនអាហារធ្ងន់ធ្ងរដែលកាន់តែអាក្រក់ទៅៗ ដោយសារតែសង្គ្រាមរបស់អាមេរិកនិងអ៊ីស្រាអែល ជាមួយអ៊ីរ៉ង់ នៅតែបន្ត។

ការតវ៉ា បានកើតឡើងខណៈប្រទេសឥណ្ឌាប្រឈមនឹងវិបត្តិឧស្ម័នដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍មកនេះ ដោយរដ្ឋាភិបាលបានកាត់បន្ថយការផ្គត់ផ្គង់សម្រាប់ឧស្សាហកម្ម ដើម្បីការពារគ្រួសារពីការខ្វះឧស្ម័នចម្អិនអាហារ។

ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមយុទ្ធនាការទម្លាក់គ្រាប់បែកលើអ៊ីរ៉ង់នៅថ្ងៃទី២៨ ខែកុម្ភៈ ទីក្រុងតេអេរ៉ង់បានបញ្ឈប់ចរាចរណ៍ភាគច្រើនតាមរយៈច្រកសមុទ្រ ដែលឆ្លងកាត់ឆ្នេរសមុទ្ររបស់ខ្លួន ហើយតាមរយៈច្រកនេះ ប្រេង និងឧស្ម័នធម្មជាតិរាវប្រហែល២០%នៅទូទាំងពិភពលោកត្រូវបានផ្គត់ផ្គង់។

អ្នកនាំពាក្យក្រសួងការបរទេសបាននិយាយថា ប្រទេសឥណ្ឌា បានស្វែងរកផ្លូវឆ្លងកាត់ដោយសុវត្ថិភាពសម្រាប់នាវាចំនួន២២គ្រឿងរបស់ខ្លួនដែលជាប់គាំងនៅភាគខាងលិចច្រកសមុទ្រ Hormuz បន្ទាប់ពីអ៊ីរ៉ង់ បានអនុញ្ញាតឱ្យនាវាឥណ្ឌាមួយចំនួនធ្វើដំណើរឆ្លងកាត់ក្នុងករណីលើកលែងដ៏កម្រចំពោះការបិទផ្លូវ។