ប្រធានាធិបតីអាមេរិក លោក Donald Trump បានលើកឡើងកាលពីថ្ងៃអាទិត្យ (១៥ មីនា) ថា សហរដ្ឋអាមេរិកអាចនឹងឈានដល់កិច្ចព្រមព្រៀងជាមួយគុយបា ក្នុងពេលឆាប់ៗ ប៉ុន្តែក៏ព្រមានថា សហរដ្ឋអាមេរិកក៏អាចនឹង «ចាត់វិធានការផ្សេងទៀតផងដែរ» ក្រោយចប់បញ្ហានៅអ៊ីរ៉ង់ ដែលជាសញ្ញាបង្ហាញថា ការវិវត្តល្អឬអាក្រក់នៃទំនាក់ទំនងដែលតានតឹងយូរមកហើយនេះ អាចនឹងកើតមានឡើងក្នុងពេលឆាប់ៗ។

ថ្លែងប្រាប់អ្នកយកព័ត៌មានលើយន្តហោះ Air Force One លោក Trump បាននិយាយថា៖ «គុយបាក៏ចង់ធ្វើកិច្ចព្រមព្រៀងដែរ ហើយលោកគិតថា អាមេរិកនឹងធ្វើកិច្ចព្រមព្រៀង ឬធ្វើអ្វីក៏ដោយដែលអាមេរិកត្រូវធ្វើក្នុងពេលឆាប់ៗ។ ក្រុមមន្រ្តីទីក្រុងវ៉ាស៊ីនតោនកំពុងពិភាក្សាជាមួយគុយបា ប៉ុន្តែសហរដ្ឋអាមេរិកនឹងដោះស្រាយបញ្ហាជាមួយអ៊ីរ៉ង់ជាមុនសិន ទើបងាកទៅគុយបា»។

ការអត្ថាធិប្បាយទាំងនេះបានកើតឡើង ខណៈភាពតានតឹងរវាងទីក្រុងវ៉ាស៊ីនតោន និងទីក្រុងឡាហាវ៉ាន នៅតែមានកម្រិតខ្ពស់ បន្ទាប់ពីការដាក់ទណ្ឌកម្មជាច្រើនឆ្នាំ ការប៉ះទង្គិចផ្នែកការទូត និងជម្លោះលើបញ្ហាអន្តិប្រវេសន៍ និងសន្តិសុខ។

ប៉ុន្មានសប្តាហ៍ថ្មីៗនេះ លោក Trump បានធ្វើសេចក្តីថ្លែងការណ៍ជាបន្តបន្ទាប់ ដោយនិយាយថា គុយបាកំពុងស្ថិតក្នុងមាត់ជ្រោះនៃការដួលរលំ ឬក៏ថា ពួកគេកំពុងតែចង់ធ្វើកិច្ចព្រមព្រៀងជាមួយអាមេរិក។ កាលថ្ងៃចន្ទសប្ដាហ៍មុន លោក Trump និយាយថា គុយបាអាចនឹងរងនូវការចូលគ្រប់គ្រងដោយ «ការបញ្ជ្រាបឥទ្ធិពលតាមរយៈការចរចា» ហើយបន្ទាប់មកបានបន្ថែមថា «ក៏អាចមិនមែនបែបនោះដែរ»។

ប្រធានាធិបតីគុយបា លោក Miguel Díaz-Canel បាននិយាយថា គុយបាបានបើកកិច្ចចរចាជាមួយអាមេរិក ខណៈប្រទេសកោះមួយនេះកំពុងប្រឈមនឹងវិបត្តិសេដ្ឋកិច្ចដ៏ធ្ងន់ធ្ងរបំផុតមួយក្នុងរយៈពេលរាប់សិបឆ្នាំមកនេះ។ លោក Diaz-Canel សង្កត់ធ្ងន់ថា៖ «កិច្ចចរចាទាំងនេះមានគោលបំណងស្វែងរកដំណោះស្រាយតាមរយៈការសន្ទនា ចំពោះការខ្វែងគំនិតគ្នាទ្វេភាគីរវាងប្រទេសទាំងពីរ»៕