ក្រុមមន្ត្រីមូលដ្ឋាននៅសហរដ្ឋអាមេរិក បាននិយាយកាលពីថ្ងៃអាទិត្យ (១៥ មីនា) ថា ចំហេះព្រៃយ៉ាងសន្ធោសន្ធៅជាច្រើនកន្លែង រួមទាំងចំហេះព្រៃដែលធំបំផុតក្នុងប្រវត្តិសាស្ត្ររបស់រដ្ឋ Nebraska បានដុតបំផ្លាញផ្ទៃដីអស់ជាង ២៤០.០០០ ហិកតា។

អភិបាលរដ្ឋ លោក Jim Pillen បាននិយាយថា គិតត្រឹមថ្ងៃសៅរ៍ ទី១៤ ខែមីនា កន្លងទៅ ចំហេះព្រៃទ្រង់ទ្រាយធំបំផុតមួយកន្លែង ដែលមន្រ្តីឱ្យឈ្មោះថាចំហេះ Morrill បានឆាបឆេះផ្ទៃដីអស់ជាង ១៨០.០០០ ហិកតា និងបានសម្លាប់មនុស្សម្នាក់។ ក្រុមមន្ត្រីរបស់រដ្ឋបានបញ្ជាក់ថា ចំហេះព្រៃនេះ រួមជាមួយចំហេះធំៗចំនួន ៣កន្លែងទៀត នៅទូទាំងតំបន់ភាគកណ្តាល និងភាគខាងលិចនៃរដ្ឋ Nebraska នៅមិនទាន់អាចគ្រប់គ្រងបានទាំងស្រុងនៅឡើយទេ គិតត្រឹមថ្ងៃសៅរ៍ដដែលនោះ។

យោងតាមមន្រ្តីមកពីមជ្ឈមណ្ឌលអគ្គិភ័យអន្តរភ្នាក់ងារជាតិ (NIFC) ប្រចាំរដ្ឋ បានឱ្យដឹងថា អាកាសធាតុអាក្រក់ដែលពាក់ព័ន្ធនឹងព្យុះរដូវរងាដ៏ខ្លាំងក្លានៅតំបន់ភាគខាងលិចប៉ែកកណ្ដាលរបស់សហរដ្ឋអាមេរិក បានរារាំងដល់កិច្ចប្រឹងប្រែងពន្លត់អណ្ដាតភ្លើង។

កាលពីថ្ងៃសុក្រសប្ដាហ៍មុន អភិបាលរដ្ឋ Nebraska បានប្រកាសដាក់រដ្ឋក្នុងគ្រាអាសន្ន ដោយបានចល័តកងកម្លាំងឆ្មាំជាតិ និងយន្តហោះដើម្បីឆ្លើយតបនឹងគ្រោះមហន្តរាយនេះ។ យោងតាមសេចក្តីប្រកាសអាសន្នបានឱ្យដឹងថា ខ្យល់បក់ខ្លាំង សំណើមទាប និងស្ថានភាពស្ងួតហួតហែង បានបង្កឱ្យមានចំហេះព្រៃកាលពីថ្ងៃព្រហស្បតិ៍សប្ដាហ៍មុន ហើយក្រោយមក នៅត្រឹមថ្ងៃបន្ទាប់ កម្រិតនៃគ្រោះអគ្គិភ័យនេះរាលដាលបានលើសពីសមត្ថភាពឆ្លើយតបរបស់ក្រុមពន្លត់អគ្គិភ័យក្នុងតំបន់៕