កាលពីថ្ងៃអាទិត្យ (១៥ មីនា) លោកប្រធានាធិបតីសហរដ្ឋអាមេរិក Donald Trump បានចោទប្រកាន់អ៊ីរ៉ង់ថា បានប្រើប្រាស់បញ្ញាសិប្បនិម្មិត (AI) ធ្វើជា «អាវុធផ្សព្វផ្សាយព័ត៌មានមិនពិត» ដើម្បីបំភាន់អំពីភាពជោគជ័យ និងការគាំទ្រក្នុងកំឡុងពេលសង្គ្រាម។

ថ្លែងទៅកាន់ក្រុមអ្នកយកព័ត៌មានលើយន្តហោះ AirForce One លោក Trump បាននិយាយថា៖ «AI អាចមានគ្រោះថ្នាក់ខ្លាំងណាស់ គ្រប់គ្នាត្រូវតែប្រុងប្រយ័ត្នខ្ពស់ចំពោះបច្ចេកវិទ្យានេះ»។ ការថ្លែងបែបនេះបានធ្វើឡើង បន្ទាប់ពីលោកបង្ហោះសារលើបណ្តាញសង្គម Truth Social ដោយចោទប្រកាន់ស្ថាប័នព័ត៌មានលោកខាងលិច ដោយមិនផ្ដល់ភស្តុតាងថា ពួកគេមាន «ការសម្របសម្រួលយ៉ាងជិតស្និទ្ធ» ជាមួយអ៊ីរ៉ង់ ដើម្បីផ្សព្វផ្សាយ «ព័ត៌មានក្លែងក្លាយ» ដែលបង្កើតឡើងដោយ AI។

សេចក្ដីអត្ថាធិប្បាយទាំងនេះកើតឡើង ស្របពេលមានភាពតានតឹងជាថ្មីរវាងគណៈកម្មការទំនាក់ទំនងសហព័ន្ធ (FCC) និងស្ថាប័នផ្សព្វផ្សាយមួយចំនួន បន្ទាប់ពីលោក Trump បានរិះគន់ការចុះផ្សាយព័ត៌មានអំពីសង្គ្រាមរវាងសហរដ្ឋអាមេរិក និងអ៊ីស្រាអែល ទល់នឹងអ៊ីរ៉ង់។ កាលពីថ្ងៃសៅរ៍ ប្រធាន FCC លោក Brendan Carr បានព្រមានដកអាជ្ញាប័ណ្ណពីស្ថាប័នផ្សព្វផ្សាយណាដែលមិនព្រម «កែតម្រូវដំណើរការ» លើការចុះផ្សាយរបស់ពួកគេ។

កាលពីថ្ងៃអាទិត្យ លោក Trump បានលើកឧទាហរណ៍ចំនួន៣ ដែលអះអាងថា អ៊ីរ៉ង់ប្រើ AI ដើម្បីបំភានសាធារណជន។ នៅលើបណ្ដាញសង្គម Truth Social លោកបានបញ្ជាក់ថា អ៊ីរ៉ង់អះអាងពីការបាញ់ទម្លាក់ «ទូកដ្រូនអត្តឃាត» ដែលគ្មានវត្តមានពិតប្រាកដ ហើយអ៊ីរ៉ង់ប្រើ AI ដើម្បីបង្ហាញរូបភាពមិនពិតនៃការវាយប្រហារដោយជោគជ័យលើនាវាផ្ទុកយន្តហោះ USS Abraham Lincoln របស់អាមេរិក ចំណែកឯរូបភាពដែលបង្ហាញពីជនជាតិអ៊ីរ៉ង់ «២៥ម៉ឺននាក់» ជួបជុំគ្នាគាំទ្រមេដឹកនាំកំពូលថ្មីរបស់អ៊ីរ៉ង់គឺ «បង្កើតឡើងដោយ AI សុទ្ធសាធ» ហើយព្រឹត្តិការណ៍នេះ «មិនដែលកើតឡើងនោះទេ»៕