បណ្តារដ្ឋមន្ត្រីការបរទេសរបស់សហភាពអឺរ៉ុប នឹងបើកកិច្ចពិភាក្សានៅថ្ងៃចន្ទ ទី១៦ ខែមីនា នេះ អំពីការបន្ដពង្រឹងបេសកកម្មជើងទឹកទ្រង់ទ្រាយតូចមួយនៅក្នុងតំបន់មជ្ឈិមបូព៌ា ប៉ុន្តែតាមប្រភពពីមន្ត្រី និងអ្នកការទូតបានឱ្យដឹងថា ពួកគេមិនរំពឹងថានឹងមានការសម្រេចចិត្តលើការពង្រីកតួនាទីរបស់បេសកកម្មនេះ ទៅដល់តំបន់ច្រកសមុទ្រហ័រមូស ដែលកំពុងត្រូវបានបិទខ្ទប់នោះទេ។

បេសកកម្មជើងទឹកនៅតំបន់មជ្ឈិមបូព៌ាឈ្មោះថា Aspides របស់សហភាពអឺរ៉ុប ត្រូវបានបង្កើតឡើងក្នុងឆ្នាំ២០២៤ ដើម្បីការពារនាវាពីការវាយប្រហារដោយក្រុមឧទ្ទាមហ៊ួទី របស់ប្រទេសយេម៉ែន នៅក្នុងសមុទ្រក្រហម។ បច្ចុប្បន្ន បេសកកម្មនេះរួមមាន នាវារបស់អ៊ីតាលីមួយគ្រឿង និងក្រិកមួយគ្រឿង ដែលស្ថិតនៅក្រោមបញ្ជាផ្ទាល់ ហើយក៏អាចកោះហៅនាវារបស់បារាំងមួយគ្រឿង និងនាវាអ៊ីតាលីមួយគ្រឿងទៀត សម្រាប់ជួយគាំទ្រផងដែរ។

ដោយសារច្រកសមុទ្រហ័រមូស ត្រូវបានបិទស្ទើរតែទាំងស្រុង ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមវាយប្រហារលើប្រទេសអ៊ីរ៉ង់ កាលពីថ្ងៃទី២៨ ខែកុម្ភៈមក មន្ត្រីអឺរ៉ុបមួយចំនួនបានពិចារណាថា តើបេសកកម្មរបស់សហភាពអឺរ៉ុបនេះ អាចជាផ្នែកមួយនៃកិច្ចខិតខំប្រឹងប្រែងដើម្បីស្តារសេរីភាពនៃការធ្វើនាវាចរណ៍នៅក្នុងតំបន់ឈូងសមុទ្រនោះឡើងវិញដែរឬទេ។

សមត្ថភាពរបស់អ៊ីរ៉ង់ ក្នុងការបិទខ្ទប់ចរាចរណ៍តាមច្រកសមុទ្រហ័រមូស ដែលជាផ្លូវដឹកជញ្ជូនមួយភាគប្រាំនៃប្រេង និងឧស្ម័នធម្មជាតិរាវរបស់ពិភពលោក បានក្លាយជាការគំរាមកំហែងយ៉ាងធ្ងន់ធ្ងរដល់សេដ្ឋកិច្ចសកល។ ទោះជាយ៉ាងណាក៏ដោយ ក្រុមមន្ត្រី និងអ្នកការទូតប្លុកអឺរ៉ុប បានលើកឡើងថា ការពិភាក្សារបស់រដ្ឋមន្ត្រីនៅថ្ងៃចន្ទនេះ នៅក្នុងទីក្រុងព្រុចសែល ទំនងជានឹងផ្តោតតែលើការជំរុញរបស់ប្រមុខគោលនយោបាយការបរទេសសហភាពអឺរ៉ុប លោកស្រី Kaja Kallas ក្នុងការបញ្ជូននាវាបន្ថែមទៀតទៅក្នុងបេសកកម្មមួយនេះតែប៉ុណ្ណោះ៕