ក្រុមមន្ត្រីក្នុងតំបន់បាននិយាយថា មានអ្នកជំងឺយ៉ាងហោចណាស់ ១០នាក់ បានស្លាប់នៅក្នុងហេតុការណ៍អគ្គិភ័យមួយ ដែលបានឆាបឆេះនៅក្នុងអង្គភាពថែទាំអ្នករបួសនៃមន្ទីរពេទ្យមួយកន្លែង នៅក្នុងរដ្ឋ Odisha ភាគខាងកើតនៃប្រទេសឥណ្ឌា នៅថ្ងៃចន្ទ (១៦ មីនា) នេះ ហើយមនុស្សមួយចំនួនទៀតបានរងរបួសធ្ងន់ធ្ងរ។

លោក Mohan Charan Majhi អភិបាលរដ្ឋ Odisha បានប្រាប់អ្នកយកព័ត៌មានបន្ទាប់ពីបានចុះទៅពិនិត្យមើលមន្ទីរពេទ្យនោះថា៖ អគ្គីភ័យនេះទំនងជាបណ្តាលមកពីទុស្សេអគ្គិសនីនៅក្នុងមជ្ឈមណ្ឌលព្យាបាលរបួស នៅព្រឹកព្រលឹមថ្ងៃចន្ទនេះ។

មានអ្នកជំងឺយ៉ាងតិចចំនួន ២៣ នាក់ កំពុងស្ថិតក្រោមការព្យាបាលនៅក្នុងបន្ទប់ថែទាំជំងឺកម្រិតធ្ងន់មួយនោះ ហើយមនុស្ស ១០ នាក់ក្នុងចំណោមអ្នកជំងឺទាងនោះបានស្លាប់ ខណៈពេលកំពុងត្រូវបានផ្លាស់ប្តូរទៅកាន់តំបន់ដែលមានសុវត្ថិភាពឆ្ងាយពីអគ្គិភ័យ។ លោក Majhi បាននិយាយថា៖ «បុគ្គលិកពេទ្យ និងបុគ្គលិកសន្តិសុខ បានប្រថុយជីវិតរបស់ពួកគេក្នុងការជួយសង្គ្រោះអ្នកជំងឺ ហើយក៏បានរងរបួសផងដែរក្នុងអំឡុងពេលនោះ»៕