រុស្ស៊ីបាននិយាយនៅថ្ងៃចន្ទ (១៦ មីនា) នេះថា អ៊ុយក្រែនបានបើកការវាយប្រហារដោយយានដ្រូនទ្រង់ទ្រាយធំទៅលើទីក្រុងមូស្គូ ជាមួយនឹងដ្រូនច្រើនជាង ១០០ គ្រឿង កាលពីចុងសប្តាហ៍មុន ខណៈយានដ្រូនប្រភេទ «អត្តឃាត» រយៈចម្ងាយឆ្ងាយជាច្រើនរលក ត្រូវបានបាញ់ទម្លាក់ដោយប្រព័ន្ធការពារអាកាស ក្នុងអំឡុងពេលធ្វើដំណើរឆ្ពោះទៅកាន់រដ្ឋធានីរុស្ស៊ីមួយនេះ។

តួលេខដែលរាយការណ៍ដោយអភិបាលក្រុងមូស្គូ លោក Sergei Sobyanin បានបង្ហាញថា យានដ្រូនជាង ១០០គ្រឿង ត្រូវបានបាញ់ទម្លាក់ក្នុងពេលពីរថ្ងៃ។ ភ្នាក់ងារសារព័ត៌មាន TASS បានដកស្រង់សម្តីប្រភពពីក្រសួងការពារជាតិដោយនិយាយថា យ៉ាងហោចណាស់មានដ្រូនចំនួន ១៤៥គ្រឿង ត្រូវបានបាញ់ទម្លាក់ក្នុងពេលពេញមួយយប់ រួមទាំង ៥៣ គ្រឿងនៅលើតំបន់មូស្គូ។

ទីភ្នាក់ងារត្រួតពិនិត្យអាកាសចរណ៍រុស្ស៊ី បាននិយាយថា អាកាសយានដ្ឋានសំខាន់ៗរបស់ទីក្រុងមូស្គូ បានដាក់កំហិតលើជើងហោះហើរ ដោយសារការវាយប្រហារនេះ។ ទីក្រុងមូស្គូ រួមជាមួយតំបន់ជុំវិញមូស្គូ មានប្រជាជនសរុបប្រហែល ២២ លាននាក់។

ក្រៅពីតំបន់រដ្ឋធានីមួយនេះ អាជ្ញាធរមូលដ្ឋានរាយការណ៍ថា ការវាយប្រហារដោយដ្រូនមួយករណី បានបង្កការឆាបឆេះឃ្លាំងប្រេងមួយនៅភាគខាងត្បូងរុស្ស៊ី នៅថ្ងៃចន្ទដដែលនេះ ដែលបង្ហាញឱ្យឃើញពីការពង្រីកវិសាលភាពនៃការវាយប្រហារកាន់តែជ្រៅចូលក្នុងទឹកដីរុស្ស៊ី។ ក្រុមមន្ត្រីក្នុងតំបន់និយាយថា ឃ្លាំងប្រេងក្នុងក្រុង Labinsk តំបន់ Krasnodar បានឆាបឆេះបន្ទាប់ពីការវាយប្រហារ។ តំបន់នោះបានក្លាយជាគោលដៅម្តងហើយម្តងទៀតនៃយានដ្រូនអ៊ុយក្រែន ដែលជាផ្នែកមួយនៃយុទ្ធនាការវាយប្រហារតាមអាកាសកាន់តែរីកធំឡើង ប្រឆាំងនឹងហេដ្ឋារចនាសម្ព័ន្ធថាមពល និងយោធារបស់រុស្ស៊ី៕