លោក Simon Stiell ប្រធានផ្នែកអាកាសធាតុនៃអង្គការសហប្រជាជាតិ (UN) ថ្លែងប្រាប់ដល់សមាជិកសភារបស់សហភាពអឺរ៉ុប នៅក្នុងកិច្ចប្រជុំនាថ្ងៃចន្ទ (១៦ មីនា) នេះថា ការរំខានដល់ទីផ្សារថាមពលដែលបង្កឡើងដោយសង្គ្រាមនៅអ៊ីរ៉ង់ គឺជា «មេរៀនដ៏អាម៉ាស់» មួយអំពីហានិភ័យនៃការរំពឹងផ្អែកលើឥន្ធនៈហ្វូស៊ីល ហើយជម្លោះនេះក៏បានសង្កត់ធ្ងន់ផងដែរលើតម្រូវការឱ្យរដ្ឋាភិបាលនានាកាត់បន្ថយការប្រើប្រាស់ប្រេង និងឧស្ម័ននៅក្នុងសេដ្ឋកិច្ចរបស់ពួកគេ។

ទោះបីជាស្ថិតនៅឆ្ងាយពីវិបត្តិក្នុងតំបន់មជ្ឈិមបូព៌ាក៏ដោយ ក៏សហភាពអឺរ៉ុបបានរងផលប៉ះពាល់ពីការរំខាននេះ តាមរយៈការហក់ឡើងនៃតម្លៃថាមពលសកល។ តម្លៃឧស្ម័ននៅអឺរ៉ុប បានហក់ឡើងដល់ទៅ ៥០% ក្នុងអំឡុងសង្គ្រាមពីរសប្តាហ៍កន្លងមកនេះ។

លោក Stiell លេខាធិការប្រតិបត្តិនៃអនុសញ្ញាក្របខ័ណ្ឌអង្គការសហប្រជាជាតិស្តីពីបម្រែបម្រួលអាកាសធាតុ (UNFCCC) ថ្លែងទៅកាន់ក្រុមមន្ត្រី និងរដ្ឋមន្ត្រីរដ្ឋាភិបាលប្លុកអឺរ៉ុប នៅទីក្រុងព្រុចសែលថា៖ «ការពឹងផ្អែកលើឥន្ធនៈហ្វូស៊ីល កំពុងតែបំផ្លាញសន្តិសុខជាតិ និងអធិបតេយ្យភាព ហើយជំនួសមកវិញនូវការគោរពតាមអ្នកដទៃ និងកំណើនថ្លៃចំណាយរបស់រដ្ឋាភិបាលនានា»។

ក្នុងសុន្ទរកថានោះ លោក Stiell លើកឡើងថា៖ «អឺរ៉ុបពឹងផ្អែកលើការនាំចូលឥន្ធនៈហ្វូស៊ីលច្រើនជាងសេដ្ឋកិច្ចធំៗដទៃទៀតស្ទើរតែទាំងអស់»។ លោកព្រមានថា ការពឹងផ្អែកលើឥន្ធនៈហ្វូស៊ីលបានធ្វើឱ្យអ្នកប្រើប្រាស់ស្ថិតក្នុង «កណ្ដាប់ដៃនៃភាពង្គោះរង្គើភូមិសាស្ត្រនយោបាយ និងភាពមិនស្ថិតស្ថេរនៃតម្លៃ» ខណៈសហភាពអឺរ៉ុបនាំចូលប្រេងជាង ៩០% និងឧស្ម័ន ៨០% នៃតម្រូវការសរុប។

មេដឹកនាំសហភាពអឺរ៉ុប កំពុងប្រញាប់ប្រញាល់ធ្វើសេចក្ដីព្រាងវិធានការបន្ទាន់ ដើម្បីការពារអ្នកប្រើប្រាស់ពីការកើនឡើងតម្លៃថាមពល និងដើម្បីចៀសវាងការកើតមានឡើងវិញនូវវិបត្តិថាមពលឆ្នាំ២០២២ របស់អឺរ៉ុប នៅពេលដែលរុស្ស៊ី បានកាត់បន្ថយការផ្គត់ផ្គង់ឧស្ម័ន ដែលធ្វើឱ្យតម្លៃហក់ឡើងខ្ពស់បំផុតមិនធ្លាប់មានពីមុនមក៕