ស្ថាប័នសម្របសម្រួលសកម្មភាពរដ្ឋាភិបាលក្នុងតំបន់ដែនដី (COGAT) របស់អ៊ីស្រាអែល កាលពីថ្ងៃអាទិត្យ (១៥ មីនា) បានប្រកាសក្នុងសេចក្តីថ្លែងការណ៍មួយថា ខ្លួននឹងបើកច្រកព្រំដែនរ៉ាហ្វា របស់តំបន់ហ្កាហ្សា ឡើងវិញនៅថ្ងៃពុធ សប្ដាហ៍នេះ ដែលច្រកឆ្លងកាត់នោះគឺជាខ្សែជីវិតដ៏សំខាន់សម្រាប់អ្នកស្រុកក្នុងតំបន់ហ្កាហ្សា។ យោងតាមសេចក្តីថ្លែងការណ៍ ច្រកព្រំដែនដីគោកនេះ នឹងបើកដំណើរការឡើងវិញទាំងពីរទិសដៅ សម្រាប់ការធ្វើដំណើររបស់មនុស្សក្នុងកម្រិតកំណត់តែប៉ុណ្ណោះ។

ស្ថាប័ន COGAT បានឱ្យដឹងថា ការសម្រេចចិត្តបើកឡើងវិញនេះត្រូវបានធ្វើឡើង «បន្ទាប់ពីមានការវាយតម្លៃផ្នែកសន្តិសុខ និងការត្រួតពិនិត្យលើលក្ខខណ្ឌដែលអនុញ្ញាតឱ្យមានការបន្តប្រតិបត្តិការនៅច្រកព្រំដែនឡើងវិញ ដោយរក្សានូវការរឹតបន្តឹងសន្តិសុខចាំបាច់ ស្របតាមស្ថានភាពសន្តិសុខ និងការគំរាមកំហែងនៅក្នុងតំបន់»។

សេចក្តីថ្លែងការណ៍បានបន្ថែមថា ច្រកព្រំដែននោះនឹងត្រូវដំណើរការស្របតាមយន្តការដែលមានស្រាប់នៅមុនពេលបិទ។ ការឆ្លងកាត់របស់អ្នកស្រុកតាមច្រកនេះ នឹងត្រូវសម្របសម្រួលជាមួយប្រទេសអេហ្ស៊ីប បន្ទាប់ពីមានការអនុម័តផ្នែកសន្តិសុខជាមុនពីសំណាក់អ៊ីស្រាអែល និងស្ថិតក្រោមការត្រួតពិនិត្យរបស់បេសកកម្មសហភាពអឺរ៉ុប។

ដោយស្ថិតនៅតាមបណ្តោយព្រំដែនរវាងភាគខាងត្បូងដែនដីហ្កាហ្សា និងប្រទេសអេហ្ស៊ីប ច្រករ៉ាហ្វា គឺមានសារៈសំខាន់បំផុតសម្រាប់ជំនួយមនុស្សធម៌ទៅកាន់តំបន់ហ៊ុមព័ទ្ធហ្កាហ្សា។ ច្រកនេះត្រូវបានបិទភាគច្រើន ចាប់តាំងពីកងកម្លាំងប្រដាប់អាវុធអ៊ីស្រាអែល បានចូលគ្រប់គ្រងផ្នែកព្រំដែនខាងហ្កាហ្សា កាលពីខែឧសភា ឆ្នាំ២០២៤ ដែលធ្វើឱ្យដែនដីប៉ាឡេស្ទីនដ៏តូចចង្អៀតមួយនេះត្រូវបានកាត់ផ្តាច់ពីពិភពខាងក្រៅ និងធ្វើឱ្យវិបត្តិមនុស្សធម៌កាន់តែធ្ងន់ធ្ងរឡើង៕