ប្រធានាធិបតីអាមេរិក លោក Donald Trump បានអំពាវនាវដល់សម្ព័ន្ធមិត្តឲ្យជួយធានាសុវត្ថិភាពច្រកសមុទ្រ Hormuz ដែលជាផ្លូវដឹកជញ្ជូនថាមពលសកលដ៏សំខាន់មួយ ខណៈដែលកងកម្លាំងអ៊ីរ៉ង់បន្តវាយប្រហារលើនាវារបស់សហរដ្ឋអាមេរិក និងសម្ព័ន្ធមិត្តរបស់ខ្លួន នៅលើផ្លូវទឹកនេះ អំឡុងសង្គ្រាមអាមេរិក-អ៊ីស្រាអែលជាមួយអ៊ីរ៉ង់។ តែការឆ្លើយតបពីដៃគូសំខាន់ៗ ទាំងនៅតំបន់អឺរ៉ុប និងអាស៊ី បានបង្ហាញថា រដ្ឋាភិបាលជាច្រើននៅតែមានភាពប្រុងប្រយ័ត្ន ចំពោះការប្តេជ្ញាចិត្តធ្វើបេសកកម្មបែបនេះ។

លោក Trump បាននិយាយថា រដ្ឋបាលរបស់លោកបានទាក់ទងប្រទេសចំនួន ៧ រួចហើយ ប៉ុន្តែបានបដិសេធមិនបង្ហាញឈ្មោះប្រទេសទាំងនោះឡើយ។ ហើយនៅក្នុងការបង្ហោះលើបណ្ដាញសង្គមមុននេះ មេដឹកនាំអាមេរិករូបនេះបានលើកឡើងថា លោកសង្ឃឹមថា បារាំង ជប៉ុន កូរ៉េខាងត្បូង អង់គ្លេស និងប្រទេសដទៃទៀតនឹងចូលរួម។ ទោះបីជាមានការអំពាវនាវរបស់ទីក្រុងវ៉ាស៊ីនតោនក៏ដោយ ក៏រដ្ឋាភិបាលជាច្រើន នៅតែស្ទាក់ស្ទើរក្នុងការប្តេជ្ញាចិត្ត ចំពោះការមានបេសកកម្មយោធា ខណៈជម្លោះនៅតែបន្តមាន។ 

សម្រាប់តំបន់អាស៊ី រដ្ឋមន្ត្រីរដ្ឋាភិបាលម្នាក់ បាននិយាយនៅថ្ងៃចន្ទ (ទី១៦ ខែមីនា ឆ្នាំ២០២៦) នេះថា អូស្ត្រាលីនឹងមិនបញ្ជូននាវាកងទ័ពជើងទឹកទៅជួយបើកច្រកសមុទ្រ Hormuz ឡើងវិញឡើយ។ ហើយការិយាល័យប្រធានាធិបតីកូរ៉េខាងត្បូង បានឲ្យដឹងកាលពីថ្ងៃអាទិត្យថា៖ «យើងនឹងបន្តមានទំនាក់ទំនងយ៉ាងជិតស្និទ្ធជាមួយសហរដ្ឋអាមេរិក ទាក់ទងនឹងបញ្ហានេះ ហើយធ្វើការសម្រេច បន្ទាប់ពីបានពិនិត្យយ៉ាងប្រុងប្រយ័ត្ន»។ 

នៅតំបន់អឺរ៉ុប អ្នកនាំពាក្យវិមាន Downing Street បានប្រាប់កាលពីថ្ងៃអាទិត្យថា លោកនាយករដ្ឋមន្ត្រី Keir Starmer បានពិភាក្សាអំពីតម្រូវការក្នុងការបើកច្រកសមុទ្រឡើងវិញ ដើម្បីបញ្ចប់ការរំខានដល់ការដឹកជញ្ជូនសកលជាមួយលោក Trump តែមិនទាន់សម្រេចយ៉ាងណានោះទេ។ រីឯរដ្ឋមន្ត្រីការបរទេសអាល្លឺម៉ង់ លោក Johann Wadephul បាននិយាយថា លោកមិនទាន់ប្រាកដថា តើបេសកកម្មកងទ័ពជើងទឹកសហភាពអឺរ៉ុប អាចធ្វើឲ្យប្រសើរឡើងនូវសន្តិសុខនៅក្នុងច្រកសមុទ្រនេះបានដែរ ឬទេ។ សម្រាប់បារាំង លោកប្រធានាធិបតី លោក Emmanuel Macron បាននិយាយកាលពីថ្ងៃទី៩ ខែមីនាថា បារាំង និងសម្ព័ន្ធមិត្តរបស់ខ្លួន កំពុងរៀបចំបេសកកម្ម «ការពារ» ដើម្បីជួយបើកច្រកសមុទ្រឡើងវិញ ប៉ុន្តែលុះត្រាណាតែមាននូវអ្វីដែលលោកបានពិពណ៌នាថា ជា «ដំណាក់កាលក្តៅបំផុត» នៃជម្លោះ បានបញ្ចប់។ 

ច្រកសមុទ្រ Hormuz ដោះស្រាយប្រហែល ១ភាគ៤នៃពាណិជ្ជកម្មប្រេង តាមសមុទ្រសកល ដែលធ្វើឲ្យការរំខានណាមួយក្លាយជាកង្វល់ដ៏ធំ សម្រាប់ទីផ្សារសកល។ តែយ៉ាងណាក្ដី លោក Stefan Wolff សាស្ត្រាចារ្យសន្តិសុខអន្តរជាតិ នៅសាកលវិទ្យាល័យ Birmingham ក្នុងប្រទេសអង់គ្លេស បានប្រាប់ប្រព័ន្ធផ្សព្វផ្សាយ CGTN ថា ប្រទេសអឺរ៉ុបភាគច្រើនមានការប្រុងប្រយ័ត្ន ក្នុងការទាញចូលក្នុងជម្លោះក្នុងតំបន់ដ៏ទូលំទូលាយ៕