ប្រមុខគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas នៅថ្ងៃចន្ទ (ទី១៦ ខែមីនា ឆ្នាំ២០២៦) នេះ បាននិយាយថា លោកស្រីបានពិភាក្សាជាមួយអង្គការសហប្រជាជាតិ (UN) អំពីគំនិតនៃការធ្វើឲ្យងាយស្រួលដល់ការដឹកជញ្ជូនប្រេង និងឧស្ម័នតាមរយៈច្រកសមុទ្រ Hormuz ដោយយកតម្រាប់តាមកិច្ចព្រមព្រៀងដែលជួយឲ្យគ្រាប់ធញ្ញជាតិបាននាំចេញពីអ៊ុយក្រែន ក្នុងអំឡុងពេលសង្គ្រាម។

នៅពេលធ្វើដំណើរទៅដល់ សម្រាប់កិច្ចប្រជុំរដ្ឋមន្ត្រីការបរទេសរបស់ EU នៅទីក្រុងប្រ៊ុចសែល ប្រទេសបែលហ្ស៊ិក លោកស្រី Kallas បាននិយាយថា លោកស្រីបានជជែកជាមួយអគ្គលេខាធិការ UN លោក Antonio Guterres អំពីគំនិតនៃការមិនបិទខ្ទប់ច្រកសមុទ្រនេះ ដែលបច្ចុប្បន្នត្រូវបានរាងស្ទះដោយសារតែសង្គ្រាមអ៊ីរ៉ង់។

លោកស្រី Kallas បានបញ្ជាក់ថា៖ «ខ្ញុំបានពិភាក្សាជាមួយលោក Antonio Guterres អំពីថា តើវាអាចធ្វើទៅបានដែរ ឬទេ ក្នុងការមានគំនិតផ្តួចផ្តើមប្រភេទតែមួយ ដូចដែលយើងមាន (ជាមួយ) គំនិតផ្តួចផ្តើមសមុទ្រខ្មៅ»។

អ៊ីរ៉ង់បានបិទច្រកសមុទ្រ Hormuz យ៉ាងមានប្រសិទ្ធភាព អំឡុងសង្គ្រាម រវាងសហរដ្ឋអាមេរិក-អ៊ីស្រាអែល លើអ៊ីរ៉ង់ ដែលឥឡូវនេះចូលដល់សប្តាហ៍ទី៣ ហើយ។ កងកម្លាំងអ៊ីរ៉ង់បានវាយប្រហារនាវានានា នៅក្នុងច្រកសមុទ្រដ៏តូចចង្អៀត ដែលស្ថិតចន្លោះអ៊ីរ៉ង់ និងអូម៉ង់ ដោយបានរារាំងដល់ការផ្គត់ផ្គង់ប្រេងសកល ១ភាគ៥ ដែលជាការរំខានដ៏ធំបំផុតមិនធ្លាប់មាន៕