នៅថ្ងៃចន្ទ (ទី១៦ ខែមីនា ឆ្នាំ២០២៦) នេះ សម្តេច ប៉ាប Leo បានជំរុញឲ្យអ្នកសារព័ត៌មានលើកឡើងពីទុក្ខវេទនាដែលបណ្តាលមកពីសង្គ្រាម ដោយស្នើឲ្យប្រុងប្រយ័ត្ន ចំពោះរបាយការណ៍ព័ត៌មានដែលប្រថុយធ្លាក់ចូលទៅក្នុងការឃោសនា ដោយលើកតម្កើងជម្លោះ ឬបម្រើជា «មេក្រូ» (ឧបករណ៍បំពងសំឡេង) ដើម្បីពង្រីកសំឡេងរបស់ក្រុមមានឥទ្ធិពល។

អំឡុងពេលយាងជួបកិច្ចប្រជុំជាមួយអ្នកផ្សាយពីកម្មវិធីព័ត៌មានទូរទស្សន៍ TG2 របស់ប្រទេសអ៊ីតាលី សម្តេច ប៉ាប បានធ្វើការអំពាវនាវដោយផ្ទាល់ដល់អ្នកសារព័ត៌មាន «ឲ្យពណ៌នាអំពីទិដ្ឋភាពសង្គ្រាម និងរៀបរាប់ពីវា តាមរយៈភ្នែករបស់ជនរងគ្រោះ ដើម្បីកុំឲ្យវាប្រែក្លាយត្រឹមតែជាវីដេអូហ្គេម»។

សម្ដេច Leo ដែលជាសម្តេចប៉ាបជនជាតិអាមេរិកដំបូងគេ បានមានបន្ទូលថា «នៅក្នុងកាលៈទេសៈដ៏គួរឲ្យតក់ស្លុត ដោយសារសង្គ្រាម ដូចជាអ្វីដែលយើងកំពុងជួបប្រទះនេះ សារព័ត៌មានត្រូវតែការពារប្រឆាំងនឹងហានិភ័យ ដោយធ្វើយ៉ាងណាកុំឲ្យព័ត៌មានក្លាយទៅជាការឃោសនា»។

សម្ដេច ប៉ាប បានមានបន្ទូលបន្ថែមថា អ្នកសារព័ត៌មានត្រូវតែធ្វើការ «ក្នុងការផ្ទៀងផ្ទាត់ព័ត៌មាន ដើម្បីកុំឱ្យក្លាយជាមេក្រូរបស់អំណាច»។ យ៉ាងណាក្ដី ព្រះអង្គមិនបានលើកឡើងពីជម្លោះជាក់លាក់ណាមួយ នៅថ្ងៃចន្ទនេះទេ ប៉ុន្តែសម្ដេចបានបង្កើនការអំពាវនាវក្នុងរយៈពេលប៉ុន្មានថ្ងៃថ្មីៗនេះ ឲ្យបញ្ចប់សង្គ្រាមអាមេរិក-អ៊ីស្រាអែលដែលកំពុងពង្រីក ប្រឆាំងនឹងអ៊ីរ៉ង់។

កាលពីថ្ងៃអាទិត្យ ព្រះអង្គបានអំពាវនាវឲ្យមានបទឈប់បាញ់ជាបន្ទាន់ ចំពោះអ្វីដែលសម្ដេចចាត់ទុកថា «អំពើហិង្សាដ៏ឃោរឃៅ» នៃជម្លោះនេះ នៅក្នុងសុន្ទរកថាដ៏ខ្លាំងក្លាបំផុតមួយចំនួនរបស់ព្រះអង្គ រហូតមកដល់ពេលនេះ៕