ទីក្រុងប៉េកាំងបាននិយាយកាលពីថ្ងៃចន្ទ ១៦ មីនាដើមសប្ដាហ៍នេះថា ថាខ្លួនកំពុងពិភាក្សាជាមួយទីក្រុងវ៉ាស៊ីនតោន អំពីដំណើរទស្សនកិច្ចត្រូវបានរំពឹងទុករបស់ប្រធានាធិបតីអាមេរិកលោក Donald Trump ដែលបានដាក់សម្ពាធលើសម្ព័ន្ធមិត្តណាតូរួមទាំងចិនឱ្យជួយបើកច្រកសមុទ្រ Hormuz ឡើងវិញ។

អ្នកនាំពាក្យក្រសួងការបរទេសចិនលោក Lin Jian បានប្រាប់សន្និសីទសារព័ត៌មានកាលពីថ្ងៃចន្ទថា ក្រុងប៉េកាំងនិងវ៉ាស៊ីនតោននៅតែកំពងបន្តការទាក់ទងគ្នាសម្រាប់ដំណើររបស់លោកTrumpមកចិន។

ពាណិជ្ជកម្មត្រូវបានកំណត់ឱ្យក្លាយជាចំណុចកណ្តាលនៅក្នុងការចរចាដែលអាចកើតមានរវាងលោកប្រធានាធិបតី Xi Jinping និងលោកTrump នៅចុងខែនេះ ទោះអ្នកនាំពាក្យរបស់សេតវិមានលោកស្រី Karoline Leavitt បាននិយាយថាកិច្ចប្រជុំនេះអាចត្រូវបានពន្យារពេល ជុំវិញសង្គ្រាមអ៊ីរ៉ង់ក៏ដោយ។ 

កាលពីថ្ងៃអាទិត្យ លោក Trump បានលើកឡើងថាលោកអាចពន្យារពេលកិច្ចប្រជុំជាមួយលោក Xi ប្រសិនបើទីក្រុងប៉េកាំងមិនជួយបើកច្រកសមុទ្រឡើងវិញ ហើយបានព្រមានថាការមិនគោរពតាមសំណើរបស់លោកនឹងអាក្រក់ខ្លាំងណាស់សម្រាប់អនាគតរបស់ណាតូ។

ផ្លូវទឹកដែលមានសារៈសំខាន់ចំពោះការដឹកជញ្ជូនប្រេង ត្រូវបានបិទដោយអ៊ីរ៉ង់ជាការសងសឹកចំពោះសង្គ្រាមអាមេរិក និងអ៊ីស្រាអែលប្រឆាំងនឹងទីក្រុងតេអេរ៉ង់។

ទីក្រុងវ៉ាស៊ីនតោនបាននិយាយថា លោក Trump នឹងបំពេញទស្សនកិច្ចទៅចិនចាប់ពីថ្ងៃទី៣១ មីនា ដល់ថ្ងៃទី២មេសា ទោះបីជាទីក្រុងប៉េកាំងពុំទាន់បានបញ្ជាក់ពីកាលបរិច្ឆេទក៏ដោយ។

មន្ត្រីសេដ្ឋកិច្ចជាន់ខ្ពស់របស់អាមេរិក និងចិនបានបញ្ចប់ការចរចាពាណិជ្ជកម្មនៅទីក្រុងប៉ារីសកាលពីចុងសប្តាហ៍នេះក្នុងកិច្ចប្រជុំមួយដែលត្រូវបានគេមើលឃើញយ៉ាងទូលំទូលាយថាជាការបើកផ្លូវសម្រាប់ដំណើរទស្សនកិច្ចរបស់លោក Trump៕