ជើងហោះហើរជាង ១២.៥០០ របស់សហរដ្ឋអាមេរិកត្រូវបានពន្យារពេល ឬលុបចោលកាលពីថ្ងៃចន្ទ១៦មីនាសប្ដាហ៍នេះ ក្នុងអំឡុងព្យុះជាបន្តបន្ទាប់ដែលប៉ះពាល់ដល់អាកាសយានដ្ឋានសំខាន់ៗជាច្រើនតាមបណ្តោយឆ្នេរសមុទ្រភាគខាងកើត និងតំបន់មួយចំនួនទៀត។

ដោយសារហានិភ័យនៃខ្យល់បក់បោកខ្លាំង និងរន្ទះបាញ់ធ្ងន់ធ្ងរ រដ្ឋបាលអាកាសចរណ៍សហព័ន្ធបានបញ្ជាឱ្យមានការពន្យារពេលនៅអាកាសយានដ្ឋានទាំងបីនៃតំបន់ទីក្រុងញូវយ៉ក អាកាសយានដ្ឋាន LaGuardia និង JFK របស់ទីក្រុងញូវយ៉ក និងអាកាសយានដ្ឋាន Newark ក្នុងរដ្ឋ New Jersey ក៏ដូចជានៅអាកាសយានដ្ឋានជាតិ Reagan Washington, Orlando, អាកាសយានដ្ឋាននៅ ទីក្រុងCharlotte និង Atlanta និងអាកាសយានដ្ឋាន Bush របស់ទីក្រុង Houston។

រដ្ឋមន្ត្រីក្រសួងដឹកជញ្ជូនលោក Sean Duffy បាននិយាយថា អាកាសធាតុកំពុងប៉ះពាល់ដល់ជើងហោះហើរទូទាំងប្រទេស។ ព្យុះរដូវរងាដ៏ធំមួយក៏បានធ្វើឱ្យជើងហោះហើរនៅទូទាំងរដ្ឋតំបន់ Midwest និង Great Lakes មានភាពរអាក់រអួលផងដែរ។ 

FlightAware ដែលជាគេហទំព័រតាមដានជើងហោះហើរ បាននិយាយថា ជើងហោះហើរជាង ៨.៥០០ របស់សហរដ្ឋអាមេរិកត្រូវបានពន្យារពេល និង ៤.០០០ ជើង ត្រូវបានលុបចោលគិតត្រឹមម៉ោង ៤ រសៀល ថ្ងៃចន្ទ ម៉ោងនៅអាមេរិក។

យោងតាម FlightAware ក្រុមហ៊ុនអាកាសចរណ៍ American Airlines ក្រុមហ៊ុន Southwest Airlines និងក្រុមហ៊ុន Delta Air Lines សុទ្ធតែបានពន្យារពេល ឬលុបចោលជើងហោះហើរចំនួន ៤៥% ខណៈក្រុមហ៊ុន United Airlines មានជើងហោះហើរចំនួន ៣៦% ដែលត្រូវបានពន្យារពេល ឬលុបចោល។

ជើងហោះហើរប្រហែល ៥៧% នៅទីក្រុង Atlanta រដ្ឋ ចចា (Georgia) ត្រូវបានលុបចោល ឬពន្យារពេល ៥១% នៅអាកាសយានដ្ឋានអន្តរជាតិ Chicago O'Hare និង ៥៧% នៅអាកាសយានដ្ឋានអន្តរជាតិ LaGuardia របស់ ទីក្រុង New York ៕