​អ៊ុយក្រែន៖ បន្ទាប់ពី​ការ​ប្រយុទ្ធ​គ្នា​យ៉ាង​ខ្លាំង​រយៈពេល​មួយ​ខែ តំបន់​ Luhansk ដែល​គ្រប់គ្រង​ដោយ​រដ្ឋាភិបាល​កំពុង​ប្រឈម​នឹង​វិបត្តិ​មនុស្សធម៌​។​ ប្រជាជន​កំពុង​ជួប​ការ​លំបាក​ដោយ​គ្មាន​អាហារ ទឹក និង​សម្ភារៈ​ប្រើប្រាស់ ហើយ​មន្ត្រី​និយាយ​ថា ជំនួយ​មនុស្សធម៌​មិន​អាច​ទៅដល់​តំបន់​មួយ​ចំនួន​បានទេ​។​

​លោក Serhii Haidai ប្រធាន​រដ្ឋបាល​យោធា​ស៊ីវិល​តំបន់ Luhansk និយាយ​ថា ប្រជាជន​មួយ​ចំនួន​មិន​ព្រម​ចាក​ចេញពី​លំនៅឋាន​របស់​ពួកគេ​នោះ​ទេ ​រហូតដល់​ការ​ប្រយុទ្ធ​គ្នា​កាន់តែ​កៀក​ដែល​ធ្វើ​ឲ្យពួកគេ​ភ័យខ្លាច​។​ ទោះបីជានៅពេលដែល​តំបន់​ជិតខាង​កំពុង​ត្រូវបាន​បាញ់​ផ្លោង​ដោយ​កាំភ្លើង​ត្បាល់ ឬ​អាវុធ​ផ្សេងទៀត និង​នៅពេល​មានការ​ផ្ទុះ និង​មាន​មនុស្ស​ស្លាប់​នៅ​ទីនោះ ប្រជាជន​នៅតែ​នៅ​កន្លែង​របស់​ពួកគេដោយ​មិន​ព្រម​ចាកចេញ រហូត​ទាល់តែ​នៅក្បែរ​លំនៅឋាន ឬ​ច្រកចូល​ក្បែរ​លំនៅឋាន​របស់​ពួកគេ ​ត្រូវបាន​បាញ់​ផ្លោង​ដាក់​ទើប​ពួកគេ​ភ័យ​ស្លន់ស្លោ ប៉ុន្តែ​នៅពេលនោះ​វា​ពិបាក​ក្នុងការ​ជម្លៀស​ប្រជាជន​។

​លោក Haidai និយាយថា ជំនួយ​មនុស្សធម៌​ត្រូវ​បានទទួល ប៉ុន្តែ​តំបន់​ជាច្រើន​មិនអាច​ទៅដល់បាន​នោះទេ ដោយ​សារ​តែ​មានការ​ប្រយុទ្ធ​គ្នា​ខ្លាំង​។​ ​ទីប្រជុំជន Popasna និង Rubizhne ស្ថិត​ក្នុង​ចំណោម​តំបន់​ដែល​ការ​ផ្តល់ជំនួយ​មិនអាច​ទៅដល់​បាន​។ មាន​មនុស្ស​ជាច្រើន​នៅ​លាក់ខ្លួន​ក្នុង​ទីជម្រក​ ដោយ​គ្មាន​សញ្ញា​បណ្តាញទូរស័ព្ទ​ដើម្បី​ហៅ និង​ប្រាប់​ពី​ទីតាំង​របស់​ពួកគេ ឬ​ដើម្បី​សុំ​ជំនួយ​មនុស្សធម៌ ឬ​ការជម្លៀសចេញ​៕

អត្ថបទ៖ ប៊ុនថន