មេដឹកនាំនៃប្រទេសលោកខាងលិចចំនួន ៥ បាននិយាយនៅក្នុងសេចក្តីថ្លែងការណ៍រួមមួយកាលពីថ្ងៃចន្ទថា ប្រតិបត្តិការថ្មើរជើងទ្រង់ទ្រាយធំរបស់អ៊ីស្រាអែលនៅលីបង់ «ត្រូវតែជៀសវាង»។

សេចក្តីថ្លែងការណ៍រួមពីមេដឹកនាំនៃប្រទេសកាណាដា បារាំង អាល្លឺម៉ង់ អ៊ីតាលី និងចក្រភពអង់គ្លេស បានលើកឡើងថា៖«ការវាយលុកថ្មើរជើងពេញបន្ទុករបស់អ៊ីស្រាអែល នឹងមានផលវិបាកមនុស្សធម៌យ៉ាងធ្ងន់ធ្ងរ និងអាចនាំឲ្យជម្លោះនេះអូសបន្លាយកាន់តែយូរ»។

សេចក្តីថ្លែងការណ៍នេះ បានបញ្ជាក់ថា មេដឹកនាំទាំងនោះ «មានការព្រួយបារម្ភយ៉ាងខ្លាំងចំពោះអំពើហិង្សាដែលកំពុងកើនឡើងនៅលីបង់» ហើយបានអំពាវនាវឲ្យមាន «ការចូលរួមដ៏មានអត្ថន័យដោយតំណាងអ៊ីស្រាអែល និងលីបង់ ដើម្បីចរចាដំណោះស្រាយនយោបាយប្រកបដោយចីរភាព»។

នាព្រឹកថ្ងៃចន្ទ យោធាអ៊ីស្រាអែល បាននិយាយថា ខ្លួនបានចាប់ផ្តើមប្រតិបត្តិការថ្មើរជើង «មានកំណត់» ប្រឆាំងនឹងក្រុមហេសបូឡា នៅភាគខាងត្បូងប្រទេសលីបង់។

សេចក្តីថ្លែងការណ៍របស់មេដឹកនាំទាំងនោះ បានសង្កត់ធ្ងន់ថា៖«ស្ថានភាពមនុស្សធម៌នៅលីបង់ រួមទាំងការផ្លាស់ទីលំនៅយ៉ាងច្រើនដែលកំពុងបន្ត គឺពិតជាគួរឲ្យព្រួយបារម្ភណាស់»៕