លោក Hans Grundberg បេសកជនអង្គការសហប្រជាជាតិប្រចាំប្រទេសយេម៉ែន កាលពីថ្ងៃចន្ទ បានអំពាវនាវឲ្យមានការការពារជនស៊ីវិល បន្ទាប់ពីមនុស្ស ៨នាក់ ត្រូវបានសម្លាប់ នៅក្នុងការវាយប្រហារមួយ ខណៈពេលកំពុងតមអាហារនៃពិធីបុណ្យរ៉ាម៉ាឌនរបស់ពួកគេ នៅក្នុងខេត្ត Hajjah ភាគពាយ័ព្យនៃប្រទេសយេម៉ែន។

នៅក្នុងសេចក្តីថ្លែងការណ៍សារព័ត៌មានដែលបានបង្ហោះនៅលើគណនីផ្លូវការរបស់លោកនៅលើប្រព័ន្ធ ផ្សព្វផ្សាយ X លោក Grundberg បាននិយាយថា លោកមានការព្រួយបារម្ភយ៉ាងខ្លាំងអំពីការវាយប្រហារកាលពីថ្ងៃអាទិត្យ ដែលបានកើតឡើងនៅក្នុងស្រុក Hairan នៃខេត្តនេះ។

លោកបានបញ្ជាក់ថា៖«យោងតាមព័ត៌មានបឋម ការវាយប្រហារនេះ បានសម្លាប់ជនស៊ីវិលយ៉ាងហោចណាស់ ៨នាក់ និងបង្កឲ្យមនុស្សរាប់សិបនាក់រងរបួស រួមទាំងកុមារ ដែលបានប្រមូលផ្តុំគ្នា ដើម្បីតមអាហារ អំឡុងខែបុណ្យរ៉ាម៉ាឌនដ៏ពិសិដ្ឋ។

លោក Grundberg បានសង្កត់ធ្ងន់ថា៖«ជនស៊ីវិលត្រូវតែត្រូវបានការពារគ្រប់ពេលវេលា ស្របតាមច្បាប់មនុស្សធម៌អន្តរជាតិ ហើយអ្នកដែលទទួលខុសត្រូវចំពោះការវាយប្រហារនេះ ត្រូវតែចាប់ឲ្យទទួលខុសត្រូវ»។

ទីភ្នាក់ងារសារព័ត៌មាន Saba ដែលគ្រប់គ្រងដោយរដ្ឋាភិបាល បានរាយការណ៍កាលពីថ្ងៃអាទិត្យថា ជន  ស៊ីវិលជាង ៣០នាក់ ត្រូវបានសម្លាប់ ឬរងរបួស «ដោយសារការបាញ់ផ្លោងកាំភ្លើងធំដែលធ្វើឡើងដោយកងជីវពលហ៊ួទី ដែលកំណត់គោលដៅលើការជួបជុំរបស់អ្នកស្រុក ខណៈពេលដែលពួកគេ កំពុងទទួលទានអាហារពេលល្ងាចនៃថ្ងៃបញ្ចប់ការតមអាហារ នៅក្នុងស្រុក Hairan នៃខេត្ត Hajjah»។

ក្រុមហ៊ួទីមិនបានធ្វើអត្ថាធិប្បាយភ្លាមៗលើហេតុការណ៍នេះទេ៕